Read Thado Chin Jeremiah 5 Bible Online

Jeremiah 5 - Thado Chin bible

Jeremiah 5

¹Nangho Jerusalem kholaiho-a suhle tungin lhaijun, tun veuvin lang heuvin, chule munlen ho-a holun, dihtah'a thutan mi khattou namule, keiman amanu ngaidaminge.

²Chule amahon, Pakai chu ahinge tinama jongleu, jouva kihahsel tahbeh ahiuve.

³Vo Pakai, thutah chu navet lhihjing hilou ham? Nangin amaho chu najepjin; amahola alunghem pouve; nangin nachaihel tan, ahinla kisuhdihsah ding anomdeh pouve, amaiju songpi sangin atahsah cheh-un, kile ding anompouve.

⁴Hijeh achu keiman, hitehohi vaicha tahbeh; mingol tahbeh ahiuve kati ahi. Ajehchu amahon Pakai lampi le a-Pathenu thutanna ahepouve.

⁵Keima miloupiho henga chengting, ajah uva thu seijinge; ajehchu amahon Pakai lampi, a-Pathenu thutanlhahna ahethemun, ahinla hiteho hin anamkoljon'u ahehbongun, akikan gomnahou atumtan taove.

⁶Hijeh achu gamlah-a keipibahkai'in athaova, nilhah lang sial'in asuhmang diu, lutnu [1] in akhopihou anga-a, chua kona vahdoh tapou chu asitel jeng ding ahije. Ajehchu asuhkhel nao atamin, anungchon nao apungin ahi.

⁷Hijeh-achu nangho iti kangaidam diu ham? Nachateovin eidalhaovin, pathen hilouho-ah akihahseluvin; amaho kavahva petnin jonthanhoi abolun, ahon honin notiho ina akikhomun ahi.

⁸Amaho jingkah kivahva sakol ho abangun; mitin aheng akom inneipi henga angih lhehlhut-uve.

⁹Hitiho jeh-a hi kavil lou dingu ham? Hitobang nam mitehi kahinnan aphulah lou ding ham? tin Pakaiyin aseije.

¹⁰Akulbang hou chunga kaltouvin lang suchimun; achaina helvang hisah hih-un; apal hou lamangun; ajehchu hiho chu Pakaiya ahipouve.

¹¹Ajehchu Israel le Judah insung chu keima dounan akhangse lheh taove, tin Pakaiyin aseije.

¹²Amahon Pakai chu ajoulhep mun, amahi ahipoi, ichunguva thilse jong chupontin; chule chemjam ahiloule kellhah jong tohpouhite atiuvin ahi.

¹³Chule themgaoho chu hui hungsoh uva, asunguva thu umlou ding ahi; hitia chu amaho kibol ding ahiuve.

¹⁴Hijeh chun janel ho Pakai Pathen chun hitin aseije, nanghon hitia nasei jeh-un, veuvin, kathuhohi nakam uva mei kahisah-a, hiche mitehi thing hiuva, meichun akahvam dingu ahi.

¹⁵Ven, vo Israel insung, gamlatah-a kona vaipi khat kahinpoh khumding ahi, tin Pakaiyin aseije. Ama chu nam hattah ahin, khangluilai nam, a-pauvu jong nahetlou, chule ipi aseiju jong nahethei lou nam hiding ahiuve.

¹⁶Alivatheiju lhankot kihong tobang ahin, amaho mi hattah jeng ahiuve.

¹⁷Chule nachanuteu le nachapateo nehding, nalousohle changlhah chu aneh chaidiu, nakelngoi hon, nagancha hon aneh chaijuva, natheichang phung hou anehjou dingu, natahsan tah-u kul kithodet nakhopihou chu chemjam'a asuhchatvai dingu ahi.

¹⁸Hijengta jongle, chuche nikhoho-a chu kichaihel loulai dingu nahiuve, tin Pakaiyin aseije.

¹⁹Chule Pakai i-Pathen'un ibola hicheho jousehi ichunguva alhunsah ham? tia nasei tengule hung hiti ding ahi, Chuteng amaho chu nadonbutna, nanghon neidalhah uva, nagamsunguva gamchom pathenho nahou banguva chutobanga chu nangho-a hilou gamchom khatna midangho najen diu ahi.

²⁰Hichehi Jacob insunga phongdoh unlang, Judah gama phongjalun lang, hitin seijun,

²¹ Tun hichehi ngaijun, lungthimbei, mit neija mulou; nakhang neija jalou; vo mingol ho,

²² neigin louvu ham? tin Pakaiyin aseije. Agalkai joulouna dinga, twipi gamgi dinga, a-itih-a thupeh-a neldi umsahpa keima anga nakithin loudiu ham? Twinong chu kinuh nuh jongle ajolou ding, kitum lullul jongle achunga galkaijou loulai diu ahi.

²³Ahinla hiche mite hin dounale lungchang huhel aneijuvin; dou apanun, achemangji taove.

²⁴Amahon alungthim uva, go masale go nunung aphatcha eipeuva, eiho dinga chang-at phat ho eikheh tuppeh uva Pakai i-Pathen'u ama chu tun gingtao hite, tinjong aseidoh pouve.

²⁵Nakhan gitlouna houvin hiche hohi aheimanga, chule nachonsetna houvin nangho-a kona thilpha ho atuhtang ahitai.

²⁶Ajehchu kamite lah-a, migilouho aumin, thang kam bangin mi achang lhiuvin, thang akamun, mi apojiuve.

²⁷Bom sung vachaho adimset abangin, a-in jouseu lheplhahna adimsetne, hijeh chun amaho alendoh-un, chule ahaodoh gamtaove.

²⁸Amaho athaovun, akiti theijun; chule amahon khang gilouho natoh chu akhokhelun, pabeiho ding agelpouve, ahinla aphatheijun, alhasamho chanding agelpeh pouve.

²⁹Hitiho jeh-a hi kabolgim louding ham? Hitobang nam chungahi kahinna-in phu alah louding ham? tin Pakai chun aseije.

³⁰Datmo umtahle tijat umtah thilkhat gamsunga hin akiboltai.

³¹Themgaoho jouvin agaovun, themputen anopnop mun vai apouvin, kamiten chutia bol ding adeijuve, ajonale ipi nabol diu hitam?