Read Thado Chin Jeremiah 50 Bible Online

Jeremiah 50 - Thado Chin bible

Jeremiah 50

¹ Babylon le Chaldea te gam chungchanga Jeremiah themgaova kona Pakai thusei chu ahi.

²Namtin lah-a phongjalun lang thejah-un, ponlap domsangun, thejah-un, imhih-un, Babylon akilatai, Bel akisudongtai, Merodach ahal halin achiptai; asong milimhou ajahchatan, amilimhou ahal hallin achiptai, tiuvin.

³Sahlama konin nam khatnin ahinsatnun, hichun agam akamhelsah-a, koimacha chua chenglou ding, mile sa agoma kichonuva adalhah diu ahi.

⁴chuche nikhole chuche phatna chu, Israel chate, amahole Judah chate chu kappuma hungkhom uva, Pakai a-Pathen'u chu agahol diu ahi, tin Pakaiyin aseije.

⁵Zion lam amaingat uva alampi adoh dingu, hungun, suhmil kit louhel dingin tonsot thulhunna eihotah-in Pakai chu jomuhite, atidiu ahi.

⁶Kamite chu kelngoi mang ahiuvin, achinghouvin alamvaisah-uvin, molchung ho-a akihei manguvin, mola konin lhang danga acheuvin, ahongsungu asumil taove.

⁷Amuchanin amaho avallhumun, akidoupihouvin hitin aseijuve, keihon kasukhel pouve, ajehchu amaho thudihtah chenna Pakai, apateu kinepna Pakai ngei douna chun achonseuvin ahi.

⁸ Babylon lailunga konin potdoh unlang, Chaldea te gama konin chedoh-un, chule kel hon lah-a kelchal bangin umun.

⁹Ajehchu, veuvin, Babylon satding sahlama konin namho loupitah-a kikhom khom chu choh thouving ting, ama dou dinga kigoltoh uva, chua patna alah diu ahin, athalchangu chu mihat galbol thema tobang hintin, khatcha kimohle lou ding ahi.

¹⁰Chaldea chu kichom ding ahin, achom jouse chu lunglhaisel diu ahi, tin Pakaiyin aseije.

¹¹Nakipa jeh-un, nathanop jeh-un, Vo kagoulo sumanga nangho, hamhing ne bongla banga hung thaodoh-in bongchal bangin naham lutlut jenge.

¹²Nanu chu hatah-a kijumsah ding ahi, nahingnu chu jahcha lheh ding ahi; Veuvin, namho lah-a anukhah pen chu gamthip gam, gamgo, chule neldi gam hiding ahitai.

¹³Pakai lunghan jeh-a chenna mun hilou ding, apuma kamhel joding, Babylon'a chechan asetnaho jouse jeh-a adatmouva chehsasa cheng ding ahiuve.

¹⁴Babylon kimvela kigolun lang, thalpi kamsa kichoi jousen ama chu kapmun, thalchang khatcha khen hih-un; ajehchu Pakai dounan achonsetai.

¹⁵Akimvela hatah-in aovun, aman akhut apedohtai, akhopibul jouse alhutan, akulpihou achimlhatai, Pakai phulah ahijeh in achunga phu lauvin, aman abol bangin ama jong bolun.

¹⁶Babylon'a konin muchi thepa chule chang atlaija koite choipa sumang uvin, suhgentheina chemjam jeh-a amaho amitakip amite lamcheh-a kiheija, amitakip agamcheh-a jamdiu ahi.

¹⁷Israel hi keipin adelmang kelngoi vahcheh chu ahin, Assyria lengpan abahgam masapenin, achainan Babylon lengpa Nebuchadnezzar'in aguho asubongin ahi.

¹⁸Hijeh chun janel Pakai Israel Pathen'in hitin aseije, Veuvin, Babylon lengpa le agam chu Assyria lengpa talen kapeh banga talen kapeh ding ahi.

¹⁹Chule Israel chu aumna-a kapuikitna Karmel le Bashan'a kivah-a, Ephraim le Gilead mol chunga ahinnao lunglhaisel ding ahi.

²⁰Pakaiyin, chuche nikhole chuche phat tengle Israel khansetna chu kikhola, khatcha kimu lou ding, Judah setna jong kimu lou ding ahi. Ajehchu keiman kakhehho chu kangaidam ding ahi, ati.

²¹Merathaim le Pekod'a chengho tah chu doudin kontouvun, amaho chu thatnun, sumanghelun, kathupeh jouse bangin bolun, tin Pakaiyin aseije.

²²Chuche gama gal kisatle suhmangna nasatah husa aginge.

²³Leiset pumpi sehtum iti kikehso-a, kisu bonga hitam? Namtinho lah-a Babylon iti hung kamhela hitam?

²⁴Vo Babylon thang kakampeh-in, na-ohtan, nangin nakihetpon; nangma nakiholdoh-in nakimantai. Ajehchu Pakai nakisatpin ahi.

²⁵Pakaiyin agalvon kholna chu ahongin, alungsatna galvonho aladohtai. Ajehchu hichehi Chaldea te gamsunga janel Pakai Pathen natoh ahi.

²⁶Gamgi monglhapena konin adouvin hungun, athilkholna inho hongun, sepkhomun lang sumang helun, a-imacha khen hih-un.

²⁷Abongchal jouse akisuhmang nao nikho ahunglhun jeh-in, Ohe adao ahi!

²⁸Pakai i-Pathen'u phulahna, a-houin dinga phulahna Zion'a phongdoh dinga Babylon'a kona hungjamdohho awgin khu ngaijun.

²⁹ Babylon doudin thalthem ho koukhom un; thalkap jousen akimvela ponbuh kisonun, koimacha hoidohsah hih-un; athilbol dungjuijun lethuh un, athilbol jouse dungjuijin achunga bolun, ajehchu ama Pakai dounale, Israel mithengpa douna-a ahoithon ahi.

³⁰Agollhanghou kholaija lhulhop diu, chuche nile agal hat jouseu kisumanghel ding ahi, tin Pakaiyin aseije.

³¹Vetan, mihoitho penpa, kadou nahi, ajehchu nangma gotna kapeh ding phat, nanikho chu ahung lhungtai, tin janel Pakai Pathen'in aseije.

³²Mihoitho pen chu kipala lhuding, koimachan akaithou lou ding ahi. Chule akhopi sunga mei kachokonga, akimvel jouse akahchai ding ahi.

³³Janel Pakaiyin hitin aseije, Israel chate leh Judah chate suhgentheijin aumkhomun, sohchanga kaiho jousen atuhdetnun, lhadoh ding anompouve.

³⁴Alhatdohpao chu ahatnin, janel Pakai chu amin ahi. Gamsunga olna aumtheina dingle Babylon'a chengte asuhboi theina dinga, ama amaho lama pang ding ahi.

³⁵Chaldea te chungle Babylon'a chengte chule apipuiteu, amichingteu chunga chemjam achutai, tin Pakaiyin aseije.

³⁶Mijouho chunga chemjam achun, amaho lunglhom diu; amihatteu chunga chemjam achun, amaho lungthoi diu ahi.

³⁷A sakol houle akangtalaihou, chule alah uva michoplop ho chunga chemjam achutan, amaho numei ho bang diu ahitai. Agoukhol hou chunga chemjam achun, chule hicheho chu kichom mang ding ahi.

³⁸Atuiho chunga twikana alhungin, hichu kanghel ding ahi. Ajehchu milim semthu gam ahin, asong milimhouvah angolgam taove.

³⁹ Hijeh achu nelphai gamsahole twikol gamsaho chua chenguva, sumbupi jong cheng ding ahin, a-itih-a kilokit talou ding, akhang akhanga kilo talouhel ding ahitai.

⁴⁰ Pathen'in Sodom le Gomorrah chule nai vela khopi ho asuhmang banga, chuachu koimacha umlou ding, mihem chapa jong khatcha cheng louhel ding ahitai, tin Pakaiyin aseije.

⁴¹Veovin, sahlama kona mipi honkhat hunguntin, chule nam lentahle leng tamtah, leiset kolkimvela konin hung kitol touvunte.

⁴²Amahon thalle teng apatdiu ahi. Engsetahle hepina beihel twipi kinong banga kitum lenglunga, sakola touvuva, mitin galbolmi banga kivona, Vo Babylon chanu, nahin satdiu ahitai.

⁴³Babylon lengpan athulhutnu ajan, akhut tha angoilhatai. Numei naosonat bangin, hesohnale natna-in naman chomtai.

⁴⁴Veuvin, ama Jordan twi kinonga kona mihat umna lama keipibahkai banga hungtou ding, ahinla keiman ama-a kona kajam mangsah paiding ahi. Achunga vaihomna katun ding pasal lhentum koiham? Keitobang koi umam? Koijin phat eiteppeh ding ham? Ka anga dingding kelngoichingpa chu koiham?

⁴⁵Hijeh chun Babylon douna-a Pakai thumop, Chaldea te douna-a alunggot, anangaito chu ngaijun, kelngoihon lah-a aneopen jong kikai manga, thonlou hella aumnao chu amaho toh kamhela alhatei ding ahi.

⁴⁶Babylon kilah dohna hu-ginin leiset ahot lingin, akanao namtin vaipi lah-a akijai.