Read Thado Chin Jeremiah 51 Bible Online

Jeremiah 51 - Thado Chin bible

Jeremiah 51

¹Pakaiyin hitin aseije, Babylon chunga chule alah uva cheng Keima eidouva pangho chunga, suhmangna huipi katildoh ding ahi.

²Keiman Babylon'a chang jap ho kasola, amahon ajap childiu; ajehchu lungkham nile aveluva adouvuva pang ding ahi.

³Ama douva thal choile ama douva janel lah-a kisong thal hemin athal lhahen; agolhanghou khen hih-un, ajanelpi chu sumangsoh helun.

⁴Hitia chu Chaldea gamsungle khosung lamlen ho-a akithatho lhuchap ding ahiuve.

⁵Ajehchu Israel mithengpa douna-in agamu chonsetnin dimjongle, Israel le Judah chu a-Pathen'u janel Pakaiyin adalhapoi.

⁶Babylon na konin jamdoh un lang, mitinin ahinna kihuh hinghen; akhangit lounao thipi hih-un, ajehchu hichehi Pakai phulah phat ahin, aman alethuh ding mong ahi.

⁷ Babylon chu leiset pumpi khamsah, Pakai khutna sana khon chu ahi, namtin vaipin aju chu adon khamuva, hichea chu ngolgama ahitaove.

⁸Babylon chu alhu phungin akisumang tai; ama chu kouvin, ama chu damthei ding ahile, anatna nuding thingnailou lauvin.

⁹ Babylon chu kadamsah nom-in, ahinla adam chompoi; dalhauvin, igam cheh-a kicheo hite. Ajehchu athu kitan lhah na-in van asun, vandum gei sana kidomsang ahitai.

¹⁰Pakaiyin ichon phatnao aphongdoh tai. Hungun, Pakai i-Pathen'u thilbol Zion'a seichoi juhite.

¹¹Thalchang ho notvalun, lumho chom khomun, Pakaiyin Mede lengte lung asuthoutai. Ajehchu atup chu Babylon dinga suhmang ding chu ahi, ajehchu hichu Pakai phulah, a-houin phulahna ahi.

¹²Babylon kulbang vuma ponlap tungdoh-un, khongah hatsah-un, khongah ho tungdoh-un, ajehchu Babylon mite douna-a Pakaiyin asei chu agongtoh-in, atong chaitai.

¹³ Vo nang twi tamtah chunga chenga, gou haotah pa, nakichainale nakiloset tetohna chu ahung lhungtai.

¹⁴Janel Pakai chu amatah akihahselin, aseije, khaokhoho tobang hela mihem'a kahindip teitei ding nahi, amahon nangma douna-a ahin aodiu ahi.

¹⁵Pathen'in athaneina-a leiset asema, achihna-a vannoi atundoh-a, ahetchetna-a kona jong aphajal ahitai.

¹⁶Aman a-aw asodoh teng, van ho-a twipi tamtahpi ahung umjin, kolmong ho-a konin twimei akaltou sahjin, kolphele go asemin, hui chu akikholna-a konin alhadoh jin ahi.

¹⁷Mitin ahetnaova ngola ahiuvin, thil podoh takip semthu milima kijumso ahiuve. Ajehchu amilim semthu uchu joubulom ahin, amaho-a haitheina hu aumpoi.

¹⁸Hicheho chu mohseh, thilbol dihlou ahin, gotna akipeh phat tengule mangthah cheh diu ahi.

¹⁹Jacob chanvang hicheho tobang chu ahipoi, thil jouse kipatna ahi. Israel chu agoulo moljol ahin, amin chu janel Pakai ahi.

²⁰Nangma kagal heichale kagalvonho chu nahi. Ajehchu namdangho chu nangma-a kasuhchipma, nangma-a lenggam ho kasuhmang ding ahi.

²¹Chule nangma-a sakolle achunga toupa kasuh chip ding, chule nangma-a kangtalai le achunga atoupa kasuhchip ding ahi.

²²Nangma-a pasal le numei kasuhchipma, tehse le khangthah kasuhchip ding ahi, chule nangma-a nungah le gollhang jong kasuhchip ding ahi.

²³Nangma-a kelngoichingpa le akelngoihon jong kasuhchip ding, nangma-a loubolpa le abongchalho koljon, chule agal lamkaiho le vaihomho kasuhchip ding ahi.

²⁴Chule nangma mitmu tah-a Zion chunga athilsebol jouseu chu Babylon'a le Chaldea te chunga kachuhsah ding ahi, tin Pakaiyin aseije.

²⁵Leiset pumpi sumanga vo suhmangna mollen, vetan kadou nahi, tin Pakaiyin aseije, nachunga kakhut kalhan doh-a, songpi ho-a kona kejel lhah-a, akavamsa mol kaso ding nahi.

²⁶Nanga kona in-ning song dingle inbul song ding alah lou diu ahitan, ahinla a-itih-a kamhel ding nahitai, tin Pakaiyin aseije.

²⁷Gamsunga ponlap khat tahdoh-un lang, namtin vaipi lah-a sumkon mut un lang, ama doudin namho gongun lang, Ararat, Minni, chule Ashchenaz lenggam ho ama doudin gallamkai semun lang, khaokhoho bangin sakol ho hungtou sah-un.

²⁸Ama doudin namho, Mede lengte, agal lamkaihou, avaihomho jouse, aloinehna gam jouse gonguvin.

²⁹Chuche Babylon gam chu kihot hotna lungdong diu ahi. Ajehchu Babylon gam chu chenna louva akamhelna dinga Pakai thilgon jouse guilhung ding ahi.

³⁰Babylon gal hat ho galsat ahaijun, akul sunguva aumden taove. Ahatnau adailhatan, numei asohgam taove. Achendetnau ahal lha uvin, akotgol hou abong gamtai.

³¹Thusep khat chu achomto kisuto ding, thangkou khat chu achom khatto kisuto-a, akhopi chu among khatna konin akilatai ti hil dingin Babylon gama alhaijun ahi.

³²Lampiho atutanun, pumpeng aneihou meija akihal lhan, gal hat ho akichagam taove.

³³Ajehchu janel Pakai, Israel Pathen'in hitin aseije, Babylon chanu chu phol tobang ahin, ama kivoh phat ahitai. Hijengjongle chomcha khat joule achang atphat hunglhung ding ahitai.

³⁴Babylon lengpa Nebuchadnezzar'in einechaijin, eisugoijin, belhomkeo eisotai, dragon bangin eival lhumin, kasa atuilai jouse anevasetnin, aman eipaidoh tai.

³⁵Keile katahsa chunga hunama eikibol naho, Babylon chunga umhen tia Zion'a chengten aseijuva, Jerusalem in kathisan Chaldea te chunga chuhen, atidiu ahi.

³⁶Hijeh-a chu Pakaiyin, Veovin, nangma lama pangin ting, naphu lahpeh inge, chule atuipi gotsah ingting, atuinah kansah inge, ati.

³⁷Babylon chu hung kilhu vuma, dragonho chenna mun, datmo umle chehsatna, mi chen louna hung hiding ahi.

³⁸Amaho keipiho banga kitum khomuva, keipibahkai nouho banga ngih ngihdiu ahi.

³⁹Akhampetnule agolvah-u kabolsah-a kakhamsah ding, hitia chu kipah thanomuva, a-itih-a ihmuva, thoukit talouhel ding ahiuve, tin Pakaiyin aseije.

⁴⁰Athat dingpa henga kelngoinou kakaisah-a, kelngoi chalto kelchal kikai banga amaho chu kapuisuh ding ahi.

⁴¹Sheshach chu iti kimat ham? Leiset pumpi vahchoipa chu iti datmo um hitam? Babylon chu datmo um iti hungsoh hitam?

⁴²Babylon chu twipin achuptan, chuche twinong tamtah chun akhutai.

⁴³Akhopiho chu akamhelin, gamgo, gamthip, mi khatcha chenlouna gam, mihem chapa khatchan ajotpa louhel asohtai.

⁴⁴Chule Babylon sunga Bel chu talen kapeh-a, aval lhumsapa kamsunga kona kiloidoh ding; chule namtin vaipi chu ahenga hung kilhonlut khomkit talou ding ahiuve, Babylon kul chu chimlha ding ahitai.

⁴⁵Kamite, alah-a konin potdoh-un lang, Pakai lungsat tijat umtah-a konin nangma cheh hinna kihuhhingun.

⁴⁶Ajole nalungu hopmintin, chuche gama kijading thuthang jeh in tijagetnun nate, kum khatle thuthang khat hung lhungin tin, chujou kum khatle thuthang khatma, chule gamsunga hunam patna, vaipole vaipo kidouna hunglhung ding ahi.

⁴⁷Hijeh chun veuvin, Babylon'a milim kikhengho thu katanna ding nikho ahung lhunge, agam pumpi jahcha-a, ami kithat jouse agamlaija lhuchap ding ahi.

⁴⁸ Chuteng vanle lei, chule asunga umjousen Babylon jeh-a penga la asahdiu ahi. Ajehchu sahlama kona asumangho ahenga hung ding ahi, tin Pakaiyin aseije.

⁴⁹ Babylon'in Israel atha-a alhuhsah banga chu, leiset pumpi kithat chu Babylon'a chudiu ahi.

⁵⁰Nangho chemjam'a hoidohho chemangun, dingden hih-un, gamlatah-a konin Pakai galdoh un, nalunguva Jerusalem chu geldoh jingun.

⁵¹Houset kajah jeh-un kajum-un, jachatna-in kamaiju akhutai. Ajehchu Pakai ina muntheng sunga gamdang mi ahung lutnuve.

⁵²Hijeh chun veuvin, nikho alhunge, Pakaiyin aseije, amilimhou chunga thu katan ding, chule agam pumpi-a mapuho peng ding ahiuve.

⁵³Babylon chu van'a kaltouhen lang, akulsung chu detsah jengjongle, keija kona ahenga misumang ho hungnalai diu ahi, tin Pakaiyin aseije.

⁵⁴Babylon'a kona kana le Chaldea gama kona suhmangna nasatah husa athongin,

⁵⁵Pakaiyin Babylon asim jeh-a, a-awginu nasatah chu athipsah-a, akinon ginu chu twi tamtah nasatah kinon gin tobang ahin, a-awginu chu a-ong jeju jengin ahi.

⁵⁶Ajehchu misugam ahenga ahungin, Babylon chungtah-a chun achun, amihatteu aman gamun athalpiu cheh-u abong gamtan, ajehchu lethuhji Pakaiyin alethuh tei ding ahitai.

⁵⁷Chule apipuitele amichingte, agal lamkaiho le avaihomte, chule amihatte kakhamsah gam ding ahi, amaho tonsot imutna ihmuva, thoukit talouhel ding ahiuve, tin lengpa amin janel Pakaiyin aseije.

⁵⁸Janel Pakaiyin hitin aseije, Babylon kul nasatahho chu chimsoh hela, akotpi bangho kavamsoh ding ahi, miten mohseh-a atohgimuva, amahon mei dinga bou acholpi dingu ahi.

⁵⁹Judah lengpa Zedekiah Alengchan kal kum lina-a Maaseiah chapa Neriah Chapa Seriah, Zedekiah to Babylon lama achepet lhona Jeremiah themgao'in athupeh; chule hiche Seriah hi lenga thil le lo ching pipuipen ahi.

⁶⁰Hitichun Jeremiah chun Babylon chunga thilse hung chuding jouse, Babylon chungchang thu kisun jouse jong lekhabu khatna asunlutne.

⁶¹Chuin Jeremiah chun Seriah jah-a, Babylon'a nahunga, hiche thuho hi namu ding, chule aboncha nasimding ahi.

⁶²Chuteng nangman nasei ding ahi, Vo Pakai, nangman, asunga mile sa khatcha jong umlouhel dinga kisumang hela, a-itih-a kamheljo ding ahi, tin hiche mun douna-a thu naseitan ahi.

⁶³ Chule hiti ding ahi, lekhabu hi nasim joutengle, song khat toh nakanbeh-a, Euphrates lailunga naselut ding ahi:

⁶⁴Achunga kahinpohlut ding thilse-a kona thoudoh lou dinga, hiti ahi Babylon lhalut ding ahitai, nati ding ahi. Chule amaho chollheh diu ahi. Hichanhi Jeremiah thuho chu ahi.