Read Thado Chin Jeremiah 52 Bible Online

Jeremiah 52 - Thado Chin bible

Jeremiah 52

¹Zedekiah chu leng ahung channin kum somni le khat ahin, Jerusalem'a kum somlekhat alengchange, anu min chu Hamutal ahin, Libnah kho-a Jeremiah chanu ahi.

²Chuin aman Jehoiakim boljouse bangin Pakai mitmun thilse abolin ahi.

³Hitichun Pakai lunghanna konin Jerusalem le Judah gamsung chu amasanga kona apaidohhel kahsen ahung hitin ahi, Zedekiah chu Babylon lengpa dounan akiphinin ahi.

⁴ Chuin alengchan kumko lhinkum, lhasom channa, nisom na-a chun ahitin ahi, Babylon lengpa Nebuchadnezzar chu asepaite jouseto Jerusalem satdin ahungun, amaidon na chun ponbuh asongun, akhopi kimvela galkul akaikhum taove.

⁵Hitichun Zedekiah lengpa lengchankal kum somlekhat lhin geijin khopi chu aumchah taove.

⁶Chuin lhalina niko nin khopi sunga chun kel akhohtan, gamsung mite din nehding abeitei.

⁷ Chuin khopi chu akehtan, galbol miho jouse chu khopi-a konin jan-in, kulbang ni kah-a lengpa hon lampi kotpi-a chun ajamdoh-un, (tun Chaldea te chu khopi pam kimvela panga ahiuvin) Phaicham lampi chu ajon taove.

⁸Ahinla Chaldea sepaiten lengpa chu anungdelun, Jericho phaichama Zedekiah chu aphapao vin, asepaite jouse ama-a konin akithecheh taove.

⁹Chuin lengpa chu amanun, Hamath gama Riblah a Babylon lengpa henga apui taove. Hia chun achunga thu atanlhatai.

¹⁰Chuin Babylon lengpan Zedekiah chapate chu amitmu tah-in athatnin, Judah pipuiho jouse jong Riblah a chun athat gamtai.

¹¹ Chujouvin Zedekiah mitchang teni chu akaldoh peh-in, Babylon lengpa chun thihkhaovin akanin, Babylon lama akaijin, athi nikho geijin songkul'a ahentai.

¹²Tun lhanga na, chuche lha nisom na-a chun, hichu Babylon lengpa Nebuchadnezzar lengchan kum somleko lhinna ahin, Babylon lengpa kinbol, sepai gal lamkai Nebuzaradan chu Jerusalem'a ahungin,

¹³ Pakaiyin le lengpa in, chule Jerusalem'a in ho ahalin, milenho in jouse jong meijah ahalvam soh heltai.

¹⁴Chuin sepai gal lamkai toh hung kilhon Chaldea sepai jouse chun Jerusalem kimvela kulbang jouse avochim soh hel taove.

¹⁵Chujouvin sepai gal lamkai Nebuzaradan'in miho lah-a migenthei phabeple khopi sunga umnalai amohho, Babylon lengpa henga kipelut ho, chule mipi dangho chu sohchangin akaimangtai.

¹⁶Ahinla sepai lamkai Nebuzaradan'in gamsunga genthei phabep chu lengpilei lhoudingle ngahdin adalhatai.

¹⁷ Pakai insunga um sum-eng khompihole akitun naho, Pakai insunga sum-eng twikong jong chu Chaldea ten avoseovin, asum-eng jouse Babylon'a apotaove.

¹⁸Khangbel lenho jong, vutloho, chaicheho, kongtong ho, meivah khomho, thihkheho, akinbolnao sum-eng lheng, lhengkong ho apomangsoh taove.

¹⁹Chule khon neoho le vutloho, kongtong ho, khangbel lenho, meivah khom ho, thihkhe ho, chule khon ho, sana-a kisem chu sana in, dangka-a kisem chu dangka-in, sepai lamkaipa chun akilah-in ahi.

²⁰Khompi ni, twikong khat, atunna noija sum-eng bongchal somleni, hichu Solomon lengpan Pakai insunga asem ahin, hiche lheng le khonho jouse sum-eng chu te jouhoi ahipoi.

²¹Khompi thudol; khompi khat chu asandan tong somleget, akimvel tong somlenin akol khumin, hichu bel li sa-a ahin, asung hom ahi.

²²Achunga sum-eng luboh khat aumin, aluboh khat chu tong nga sanga, alubohho chung chu kolbuthei lima themneltah-a kijempah ahin, aboncha sum-eng jeng ahi. Sutpi nina jong chu hiche tobangahi kolbutheija kijempah ahi.

²³Apang khatna kolbuthei somko le gup cheh aumin, themneltah-a kijem chunga chu kolbuthei jakhat-in akimvel ahi.

²⁴Chuin sepai lamkaipan thempulen Seraiah le thempu ni channa Zephaniah chule kotngah thumho chu akaijin;

²⁵Aman gal hat ho chunga vaipo nukiso pa, khopi sunga um lengpa koma umjing le akivoppi jing mi sagi, sepai janelho lekhasunpa, khopi lailunga kimudoh gamsung mi somgup jong khopi-a konin akaidoh in ahi.

²⁶Hitichun sepai lamkai Nebuzaradan'in amaho chu Babylon lengpa henga Riblah ah akaijin ahi.

²⁷Chuin Babylon lengpan amaho chu ajepmin, Hamath gama Riblah mun'a athatgamtai. Hitobang chun Judah chu amatah gama konin sohchangin akaimangtan ahi.

²⁸Hichehi Nebuchadnezzar'in sohchanga akaimangho chu ahi. Alengchan kum sagina chun Judah te sangthum le somni le thum ahiuve.

²⁹Nebuchadnezzar lengchan kum somlegetna in Jerusalem'a konin mi jagetle somthumle ni akaimangin ahi.

³⁰Nebuchadnezzar lengchan kum somni le thum lhinna in sepai lamkai Nebuzaradan'in Judah te jasagi le somli le nga akaimangin, abonun mi sangli le jagup ahiuve.

³¹Judah lengpa Jehoiachin sohchan kum somthumle sagi lhinna, lha somlenina, chuche lha nisomni le nga nin ahitin ahi, Evil-Merodach Babylon lengpa chu alengchan kum khatna chun, Judah lengpa Jehoiachin lu chu adomsangin, sohchan na-a konin apuidoh-in ahi.

³²Ama chu lungset tah-in ahoupin, Babylon gamsunga alengchanpi ho laltouna vuma alaltouna adosangpeh penin,

³³asohchanna vonho akhelpeh-in, ahinkho lhumkeijin amasangah changlhah anejom jingpehtan ahi.

³⁴Chule aneh le chah dingin, Babylon lengpan tahsa phatnading anpha ape jingin; ahinkho lhumkei, athini geijin tanglouvin niseh-in apejing tan ahi.