Read Thado Chin Jeremiah 6 Bible Online

Jeremiah 6 - Thado Chin bible

Jeremiah 6

¹Vo Benjamin chate, Jerusalem lailunga kona jamdoh dingin kikhomun lang, Tekoah'ah sumkon mut un chule Beth-haccerem 'ah melchih mei domsangun. Ajehchu sahlama konin thilphaloule suhmangna lentah khat ahung kilang doh-e.

²Keiman Zion chanu chu numei hoitah le nouchet toh kakilo sah-e.

³Kelngoi chingho chu akelngoihon utoh amanu henga hungun tin, amanu doudinga akimvela ponbuh asondiu, amahon ama ama muncheh a avahdiu ahi.

⁴Amanutoh kisatdin kigouvin, kipat un, chule sunin kontouvuhite. Ohe! idau ahitai; ajehchu sun achemangin nilhah lam alep heihoi tai.

⁵Kipat un, janle cheohitin, aleng inpihou gasuseu hite.

⁶Ajehchu janel Pakaiyin hitin aseije, thingho phuhlhu uvin lang, Jerusalem dou nadin kul khouvin, hichehi hunama gotna kipeding khopi chu ahi. Amanu apumpia kisugenthei ahi.

⁷Twinah in twi asodoh bangin, agitlounaho ahinsodoh jin ahi. Hunamle suhmangna amanu-ah akijadohin, kamasanga hin thohgimnale maha aum jingin ahi.

⁸Vo Jerusalem, kichih theijin, ajole nanga konin kahinna kichondoh khantin, chennalou gam akamhel kaso lounadin, gamgoh-in umsah khange.

⁹Janel Pakaiyin hitin ati, amahon Israelte amoh-aumsun chu lengpigui khai banga alokhumuva, lengpiga loupan pochaho sunga alelut banga nakhutnu ale kaleh ding ahi.

¹⁰Ajahtheina diuva koi henga kaseija kagihsal dingham? Veuvin, akol aseh-un, ajathei pouve, veuvin, Pakai thu chu isahlou vin aneijun, kipanan anei pouvin ahi.

¹¹Hijeh chun Pakai lunghanna chun kadimsetnin, kakitim timnan kacholtai. Keiman hichehi pama um chate chungle khangdong kikhomho chunga kabuh lhah ding ahi, ajehchu ajipa ajinu geija, tehse le atehkem geija kikaidoh ding ahiuve.

¹² A-inhou chu alouhou puma midangho kipe ding ahiuve. Ajehchu gamsunga chengho chunga kakhut kalhandoh ding ahi, tin Pakaiyin aseije.

¹³Ajehchu amaho aneopena pat alenpen geija, amitakip kilosetna lama akipeuvin, chule themgaova pat thempu geijin dihloutah in akimangun ahi.

¹⁴ Amahon chamna umlou petnin chamna, chamna atiuvin, amite chanu kisuhkhahna chu adamsah bolluve.

¹⁵Amahon thil thet um abol tengule jahcha jiuvem? achutipoi, ajahcha naisai pouve, amaiju jong asanji poi. Hijeh chun amaho alhu ho lah-a lhu-u vintin; keiman amaho kagasuh gim phat tengle amaho sotlhah-a umdiu ahi, tin Pakaiyin aseije.

¹⁶ Pakai chun hitin aseije, keng lampiho-a dingun lang, veuvin, chule lamluiho chu dongun, hia chun lampha aume, nahinnaova choldona namu dingu ahi. Ahinla amahon, hichea chun chepouving-e, atiuve.

¹⁷Nachung uva khongah ho jong katundohpeh un, sumkon gin chu ngaijun, atiuve. Ahivangin amahon ngaipou vinge, atiuvin ahi.

¹⁸Hijeh chun nangho namtin hon ngaijun, chule vo Houkhom ho, alah uva ipi um ahi, heuvin.

¹⁹Ngaijin, vo leiset, ven, hiche mite chungahi thilphalou, alungputnu ga thilse kalhutkhum ding ahi. Ajehchu amahon kathule kadanthupeh nitlouvin, anotthap jotaove.

²⁰Ipi ngaitona-a Sheba'a kon bego le gamlatah-a kona kolchu lhum kahenga hung kipolut ham? Nagovam thiltoule naganlhai nao tuitah jong chu kei dinga santhei ahitapoi.

²¹Hijeh chun Pakaiyin hitin aseije, vetan, hiche mite anga kipal lhuh naho kakoipeh ding, achunga chu pate le chapate lhukhom diu, aheng akomle agolhou mangthah diu ahi.

²²Pakai chun hitin aseije, Veuvin, sahlam gama kon mipi ahung kitolin, leiset ningtin ho-a kona namlentah khat tundoh-a umding ahi.

²³Vo Zion chanu, amahon thal le teng apat diu, mi engse le hepinabei ahiuvin, ahusao twipinong abangin, nangma dounan galsat miho bangin sakol chunga atou vun akigoltoh taove.

²⁴Aminthanjeu kajataovin, kakhut hou angoilha gamin, hesohnan kadimtauve, chule numei naosonat bangin kanasoh taovin ahi.

²⁵Loujaova potdoh hih-un, lampia jong vahle hih-un, ajehchu melmate chemjamle tijatna-in ningtin alotai.

²⁶Vo kamite chanu, khaodip pon kigah-in, vut kinun, chapa changkhat jeh-a lunghem lheh jeng bangin lunghemin, ajehchu michomgampa chu phulou helouva ichunguva hunglhung ding ahi.

²⁷Nangin alampiu nahetna, napatep theina dinga kamite lah-a inchungsang khatle kulpidet khatna katun nahitai.

²⁸Amaho abonchauva lunggim umtah chohchi bol, miseisea vahlea, sum engle thih ahiuvin, abonuva misuboh ahiuve.

²⁹Pumlong teni akatan, ngen chu meijin ahaljol lhan, asuhthengna bul chu amoh junlhah jengin ahi, ajehchu migilouho akipaidohpoi.

³⁰Amaho chu mihon dangka lahtheilou asahdiu ahi. Ajehchu Pakaiyin amaho chu adeilou ahitai.