Read Thado Chin Jeremiah 7 Bible Online

Jeremiah 7 - Thado Chin bible

Jeremiah 7

¹Pakaiya kona Jeremiah henga thu hung lhung chun, hitin aseije.

²Pakaiyin kotpi phunga dingin lang, hiche thuhi phongjalin chule seijin, nangho Judah mijouse, Pakai hou dinga hiche kotpi phungho sunga lut hon Pakai thu chu ngaijun.

³Janelho Pakai, Israelte Pathen chun hitin aseije, nalampiule nanatoh hou kisem phatnun, chule keiman hiche munahin chensah unge.

⁴Pakai houin, Pakai houin, Tonsot Pakai houin tia jouthu seiho chu tahsan hih-un;

⁵ajehchu nanghon nalampiu chule nathil bolhou chu apuma nakisem phatnuva, mikhatle aheng akom kah-a thudih nasodoh uva,

⁶kholjin mi, pabeiho leh meithaiho sugenthei louva, hiche munahi monabeiho thisan nasodauva, chule nasuse dingu pathen dangho jong najoulhepmuva ahile,

⁷chutengle keiman napateu kanapeh nagam hiche munahi atonsot atonsotna kachensah ding nahiuve.

⁸Veuvin, phatchomna bei thujouho chu natahsanun ahi.

⁹Nanghon guchat, toltha, jouva kihahsel, Baal houna-a gimnamtui hala, nahetlouvu pathen dangho najuijuva,

¹⁰chule naheng uva kamina kivo hiche in'a kamasanga nadin uva, chule thet umhohi bol dinga eikipedoh uva ahitai, nati dingu ham?

¹¹ kamina kivo hiche inhi nangho mitmu-a michomho kokhuh hitam? Veuvin, hiti chun kamubepme, tin Pakai chun aseije.

¹² Ahinla tun nangho kamina kaphudoh masahna Shiloh-a [2] kaumna mun'a chun cheovin, chule kami Israelte gitlou jeh-a chua ipi kanabolem gaveovin.

¹³Chule Pakaiyin aseije, nanghon hitobang jousehi naboltah jeh-un, chule matah-a katho-a kanaseipeh vanguva nangaitahlou jeh-un, chule kakou vang uva neina donbut tahlou jeh-un,

¹⁴hijeh achu nanghole napu napateu kanapehna mun, nanghon nana tahsanu, kamina kivo hiche in'a hi Shiloh a kabol tobang chu kabol ding ahi.

¹⁵Keiman nasopiteu Ephraim chilhah apumpia kana paidoh banga nangho jong kamitmu-a kona kapaidoh ding nahiuve.

¹⁶Hijeh chun, hiche mite dingin taohih-in, amaho dingin kho samhih-in, taojong taohih-in, kahenga jong thumpeh hih-in, ajehchu kajahpeh louding nahi.

¹⁷Amahon Judah khopiho sungle Jerusalem lamlen ho-a ipi abolu chu mulou nahiuvem?

¹⁸ Chaten thing achomun, paten mei atih-un, numei hon changbong ameh-un van lengnu din changlhah asem gouve, chule keima phin lunghan theinadin pathen dangho din donthei thilto alheilha jiuve.

¹⁹Amahon keima eiphin lunghanu ham? Amaho maiso kisuhmona ding bepma amahole amaho kiphin lunghangu hilouham? tin Pakai chun aseije.

²⁰Hijeh chun tonsot Pakai Pathen'in hitin aseije, veuvin, kalunghana hiche mun chunga, mi chunga, sa chunga, thingphung ho leiset gaho chunga kabuh lhah ding, hichun akah-a kasuhmit tahlou ding ahi.

²¹Israelte Pathen janel Pakaiyin hitin aseije, naganlhai naova govam thiltoho chu kikoijun lang apheho chu neuvin.

²²Ajehchu napateu Egypt'a kona kipuidoh nichun govam thilto le ganlhai thudol amaho jah-a kanaseipon, thupeh jong kananeipon ahi.

²³Ahinla hichehi amaho thu kanapen, ka aw ngaijun chutile keima na Pathen'u hing ting, nangho kamite nahi dingu ahi. Nangho thu kapeh jouse-a chun chonun, chutile nangho dinga phathei ding ahi, katin ahi.

²⁴Ahinla angai hih-un, anau asungpouve, alung gilou ngaitonaole alunggelun achon jouvin, machon louvin anungchon jotaove.

²⁵Napateu Egypt gama kona ahung potdoh uva pat tuni geihin kasoh themgao jouse naheng uva, kahinsolin, jingkah matah-in athouvun kasolen,

²⁶Hinla amahon kathu angai hih-un, anau jong asungpouve, angei apukonun, alouchal uvin, apateu sangin asejouvin ahi.

²⁷Hijeh chun, nangin ajah uva thu jousehi seijin natin, na ngaipeh loudiu, Nangin amaho kouvin natin, amahon nadonbut louding ahi.

²⁸Ahinla nangin ajah uva hiti ahi nasei ding ahi, hiche nam mitehi Pakai a-Pathen aw ngailou, hilna jong sangdeh lou nam ahiuve, thutah chu amanghelin, akamuva konin pailhah helin aumtai.

²⁹Vo Jerusalem, nasam kitanin lang, munsang ho-a kapmin, ajehchu Pakaiyin alunghana khang mitehi adeitapon, adalhatai.

³⁰Ajehchu Judah chaten kamitmun thilphalou aboluve, tin Pakaiyin aseije. Kamin kivona insung suhbohna dingin, athet umtah hou chu apolut taove.

³¹ Chule keiman kanathupeh louhel, kalung sunga jong umlouhel, achapateule achanuteu meija gona dingin Hinnom chapa phaicham, Topheth munsang ho asadoh taove.

³²Hijeh chun Tonsot Pakaiyin, veuvin hiche munchu Tophet kiti talou ding, Hinnom chapa phaicham jong kitikitlouva, tolthana phaicham kiti johna ding nikho ahung lhunge, Ajehchu mun abeihel kahse-a Topheth'a kivuigam ding ahiuve, ati.

³³Hiche mite thilongho chu chungleng vachaho, tolla gamsaho an hiding ahi. Chule koimachan amaho anomang lou ding ahi.

³⁴ Chutahle Judah khopiho-a chule Jerusalem lamlen ho-a thanopna aw chule kipana aw, moulang le Mounu aw beisoh ding ahi. Ajehchu gamsung chu kamhel ding ahitai.