Read Thado Chin Jeremiah 9 Bible Online

Jeremiah 9 - Thado Chin bible

Jeremiah 9

¹Ohe, kamite chanu kithajeh hin sunle jana kaka theina din kalu twijeng hihen lang chule kamit tenihi mitlhi luipi sohjeng tavele kati!

²Ohe, kamite dalha-a, amaho-a kon kapotdoh theina dinga gamthipma chele vahle ho gebuh khat kanei hitavele! ajehchu abonchauva mijong ngen, misumang kisukhom bou ahiuve.

³Chule amahon jou seinan athalpiu bangin aleiju amangun, ahinla leiset chunga thutah dingin ahangsan pouve. Ajehchu amahon aphalouva konin aphalou asodohun, keima eiheta pouve, tin Pakaiyin aseije.

⁴Mitin aheng akoma chingtheihen, asopi tahsan hih hen, ajehchu sopi takipmin ahinson manghel ding, henglekom chu misumin se-a vahle ding ahiuve.

⁵Amaho mitinin ahenglekom cheh alheplhah diu, thutah aseilou dingu ahi; Aleiju jou seije ahilun, dihloutah bolna-in akisuchol uve.

⁶Nachenna chu lheplhahna lah ahin; lheplhahna jeh-in keima eihetnom pouve, tin Pakaiyin aseije.

⁷Hijeh chun janelho Pakaiyin hitin aseije, veuvin, keiman amaho junlhahsah ingting, kapatep ding ahi, ajehchu kamite chanu chu iba kalo ding ham?

⁸Aleiju thalchang kikapdoh abangin, hichun lheplhahna thu aseije. Khatnin aheng akom jah-a akamin chamna thu aseijin, hinla alungsungin achanglhi keovin ahi.

⁹Hitiho jeh ahi keiman amaho gotna pelouva kakoi dingham? Hitobang namho chungahi hitia hi kahinna-in phu alahlou ding ham? tin Pakai jin aseije.

¹⁰Molsangho dinga kaka-a kamao ding, gamthipma umho dinga kalunghem ding ahi. Ajehchu amaho akavamtan, koimachan ajotpai thei tapon, ganchaho hamgin jong akijatapoi. Chungleng vachate le gamsaho ajamun, achemang taove.

¹¹Keiman Jerusalem chu ingem jeng kasoa, dragon kokhuh-a kasem ding, chule Judah khopiho chu acheng beihela kakam helsah ding ahi.

¹²Hiche hekhenthem thei dinga miching koiham? Hiche gam chu amanthaija, gamthip banga akahvama, koimachan ajotpai thei louding ahi, tia phongdoh dinga Pakai kamin aseinapa chu koiham?

¹³Chule Pakaiyin aseije, ajehchu amahon amasanguva kakoipeh kadan thupeh chu adon tapouve, chule ka aw angaipouve, hia chun chonjong achonpouve.

¹⁴Amaho lungsuhto-a bou achonjo taove, apateuvin anahilu, Baal houna nung ajuijo taovin ahi.

¹⁵Hijeh chun janel Pakai, Israel Pathen'in hitin aseitai! Veovin keiman amaho, hiche miho tahhi thinglungin vah ingting, thinkha twi kadonsah ding ahi.

¹⁶Keiman amaho chu, apateule amahon anahetkhah louvu, Pathen helouho lah-a kathecheh ding, chule amaho kasuh manghel kahse-a anungu chemjam kajuisah ding ahi.

¹⁷Hitihin janel Pakai chun aseije, nanghon ngaitouvin, ahung theina dingun numei lunghemho chu kouvun lang, ahung theina dingun numei dohathuh ho gakou sah-un.

¹⁸Amaho chu kinouhen lang, chule eiho dingin himsao hen, chutiachu imitnuva kon mitlhi alonlhah-a, imit nel uva kona twiho akikhodoh jeng nadingin,

¹⁹ajehchu Zion'a konin maon'a aw chu akijan, suhmanga iti i-umu hitam? Igamu idalhah uva ichendetna houvin einotthap jeh-un, ikisumo lheh taove.

²⁰Ahinla, vo numei ho, Pakai aw chu ngaijun, nanakhang uva akam thucheng chu lutsah-un, chule nachanuteu chu maoje, chule amitakipmin aheng akomho lunghemje hilun.

²¹Ijeh-inem itile chate polama umhole khangdong lamlen ho-a umho sumang dingin, thina chu bangkot ho-ah ahungkal touvin chule ileng inpihouva ahung luttan ahi.

²²Seijin, Pakaiyin hitin aseije, Mihem thilongho chu gam onga eh tobanga pul lhadiu, chule chang atpa nunga khutdim khat chang kidalha banga koiman amaho aga chomkhom lou ding ahitai.

²³Pakaiyin hitin aseije, michingho chu achihnauva, mihat ho chu ahatnauva, chule mihaoho chu ahaonauva kithang-at daohen.

²⁴Ahinla akithang-at michu hichea hin kithang at-uhen, keimahi leiset chunga ngailut lungsetna, thutanlhahna, chule chonphatna a vaihom Pakai chu kahi ti hehen chule hethemhen, ajehchu hitiho ahin keima kakipahjie, tin Pakaiyin seije.

²⁵Veovin Pakaiyin hitin aseije, keiman cheptanho jouse chu cheptan louho toh kagimbol thading nikho ahung lhunge!

²⁶Egypt, Judah, Edom, Ammon chate, Moab chule gam ningchong penaho, gamthipma chengho jouse chunga, ajehchu hiche nam miho jousehi cheptanlou loi chu ahiuvin chule Israel insung jouse jong lungsunga cheptanlou ahiuve.