Read Thado Chin Kala 3 Bible Online

Kala 3 - Thado Chin bible

Kala 3

¹Alungsatna tenggola hesohna ana mu-a chu keima kahi.

²Aman vah hilouvin, muthima keima eipuilutnin ahi.

³Tahbeh-in aman keima eikidoupin, nilhum keijin kachunga akhut alamin ahi.

⁴Aman kaphele kavun avoilhah sah-in, kaguho jong asubongtan ahi.

⁵Aman kei dounan kul agenin, thoh hahsa nasatahle gimna-in eiumkhum tan ahi.

⁶Aman khanglui laipeh-a anathisaho bangin, munthim lah-a eiumsah-in ahi.

⁷Aman keima tho eikai khumin, kapot thei tapoi. Aman kakihenna thihkhao agihsah-e.

⁸Keima kapma kepen teng jongle aman kataona akhahchah jitai.

⁹Aman song kikheng ho-a ka lampiho akhah-in, kalampiho akonsah gam ahitai.

¹⁰Ama chu keidin vompile keipi bahkai muthim laija um abange.

¹¹Aman kalampiho ahei mangin, chule eimaltel jengin; aman kamhellin eisotai.

¹²Aman athal akamsalin, thalchang chuhna ding lama keima eikoitai.

¹³Aman alivatheija thalchang ho chu kalung changa chudin akaplutsoh tai.

¹⁴Keima kamite jouse henga totnopna bep kahitan, chule nilhum keija alasah-u kahitai.

¹⁵Aman keima thil akhatna kha-in eidipmin, chule gamsai twijin eivahkham tai.

¹⁶Aman songbong hemho mangcha-in kahaho eisuhboh peh-in, vutvaijin eivuhkhum tai.

¹⁷Chule chamna-a konin kahina gamla tah-in nachon mangin, phattheina jong kasumiltai.

¹⁸Keiman Pakaiya konin kathahat nale kakinep naho amang heltai, kati.

¹⁹Kahesoh nale gentheina chule kathohgimna, gamsaile gil kha chu kagel doh-in ahi.

²⁰Kahin nahin hicheho chu ageldoh-in, chule keima suhnemin kaumin ahi.

²¹Hichehi kalungin kagah gelin, keiman hichea chun kinepna kaneitai.

²²Pakai khoto them naho jala bou suhgama umlou ihiuve, ajehchu amihepina chu alhasam ngaipoi.

²³Hicheho chu jingkah seh-in athah jingin, nakitahna chu alenin ahi.

²⁴Kachan ding chu Pakai ahi, hijeh-a chu ama-a kakinep ding ahi, tin kahinna hin aseije.

²⁵Pakai chu ama ngahjing tele, ama holjing mite dingin aphan ahi.

²⁶Mihem khat dinga Pakai mi huhhingna chu kinema thipbeh-a nga chu thilpha ahi.

²⁷Mihem dingin akhandon laija namkoljon poh hi aphan ahi.

²⁸Ama achang seh-in thipbeh-in atouve, ajehchu aman hichu achunga apoh ahi.

²⁹Kinepna-a aumtheina dingin, aman leivui lah-a akam asulutnin ahi.

³⁰Aman adengpa chu abengphe adopeh-in; housetna-a jong adimin ahi.

³¹Ajehchu Pakaiyin a-imatih-a apaidoh louhel ding ahi.

³²Amavang aman sugim jengjongle, amihepi themna tamtah jala chu hepina anei ding ahi.

³³Ajehchu aman, mihem chate chu aphat sah jeh-a asuhgentheija, ahiloule asuhgimji ahipoi.

³⁴Leisetna sohchangho chu akengtoa chil goija umding ahiuvin,

³⁵Chungnung pen masang tah-a mihem khat thaneina lahdohna dinga,

³⁶Mihem khat ama hina noisehi, Pakaiyin pha asapon ahi.

³⁷Pakai jin thu apeh louleh, athusei lhunsah theija chu koiham?

³⁸Asele apha hungdoh nahi chungnung pen kama kon hilou ham?

³⁹Mihem khatnin achonset jeh-a talen amat chu, mihing khatnin ipi dinga aphunpi ham?

⁴⁰Eihon ilampihou kiholu hitin, chule kipatepmu hitin Pakai lama kihei kitnu hite.

⁴¹Eihon ilungsung houle ikhut houvin van ho-a um Pathen lam sangu hite.

⁴²Keihon kana sukhelun, chule kanadoutaove, nangman neingaidam tapouve.

⁴³Nangma lunghan na-in nakikhu-in, chule neisugimun ahi. Nangman nathatnin, khotona naneipoi.

⁴⁴Nangman kataona hou ahunglutpai thei louna din nangle nang meilom'in nakitomin ahi.

⁴⁵Nangman miho lah-a keiho deiloule bohnen bangin neisem taove,

⁴⁶Kamel mate jouseu keiho dounan akam kataovin ahi.

⁴⁷Tijat nale thangkol chule suhgamna le kachunguva kamhelna chu ahung lhungtai.

⁴⁸Kamipite chanu kisuh gamna jeh-in kamitlhi luijin along jenge.

⁴⁹Kamitlhi apulin, tanglou helin alongdoh doh jenge,

⁵⁰Pakaiyin van'a kona ahin suhvetna ahinmu kahsen,

⁵¹Kakhopi sunga chanute jouse jeh-in kamitnin kalung atong khatan ahi.

⁵²Kamelma ten ajeh beijin vacha bangin nasatah-in eidel lele jeng taove.

⁵³Amahon leinoi kotong sunga kahinkho asumangun, chule kachung song khatnin adelphaove.

⁵⁴Twiho kalu chunga alongin, hichun keiman amangthah-a kahitai, kati.

⁵⁵Vo Pakai leinoi kotong thuhtah-a konin keiman namin kahinsamin ahi.

⁵⁶Nangman ka awgin najai, kakana le kahai ginna konin nanakhang heimang hih-in.

⁵⁷Keiman nangma kahinhou nikhon nahung naijin: kicha hih-in, neitin ahi.

⁵⁸Vo Pakai, kalung sunga thil umho neisei hun, nangman kahinkho neilhatdoh pehtai.

⁵⁹Vo Pakai, nangin kathemmona namutai, kathu neitan peh-in.

⁶⁰Nangman kei douna-a alunggel houle aphulahnao jouse namutan ahi.

⁶¹Vo Pakai, amahon eihouset naole eidehnaova alunggelu nangman najatai.

⁶²Keima douna-a hung kipandoh ho muhle, nilhum keija keima dehna-a agonu abonchan nangman najasoh tai.

⁶³Amaho toulhahle kipatdoh khu vetan, alasah-u jong keima jontai nabep ahitai.

⁶⁴Vo Pakai, akhutnuva athilbolu dungjuijin amaho lethuhna pen.

⁶⁵Nangin amaho nasapsetna le lungthim natna chu pen.

⁶⁶Pakai vanho noija konin lunghanna in amaho bolgimin lang sumangin.