Read Thado Chin Kala 4 Bible Online

Kala 4 - Thado Chin bible

Kala 4

¹I-atile sana mol lha-a hitam! I-atile sana thengtah kikhel jenga hitam! Munthenga songho chu lamlhah tin chenga akisunglha tai.

²Manlutah Zion chapate chu sana thengtah toh tethei ahin, i-atile amaho beldengpan leibel aden bangbepma umu hitam!

³Twi saiho jengin jong anoi adon, anoute avah-in ahi. Kamite chanuho hi gamthipma vacha lengho bangin alungselun ahi.

⁴Noi cheplai naosen lei chu dang chah-in adanga abehden tai. Chapang khangdong laihon an athumun ahinla koiman apepouve.

⁵Annem ne-a hung kivahho chu khopi lamlen ho-a amahthah gamtaovin; ponsanthip silla hung kivahdohho chun eh kisungvum adeijuve.

⁶ Ajehchu kamite chanute khangitlouna talen chu mitphet kah louva kisumang Sodom chonsetna talen sangin alenjoi, chule amanu chunga chun koimacha khut achupoi.

⁷Amanu Nazire mi hina chu buhbang sangin atheng jon, bongnoi sangin abang jon, avouso chu songmantam sangin ahoijon, ahoidan chu Saphir song tobang ahi.

⁸Amaho mel chu meihol sangin avom jotan, lamlen ho-ah amaho hetphah-in aumtapouve. Avunhou chu aguhouva abeh-in, molkangto abang jengtai.

⁹Chemjam'a kithat ho chu kela thiding hosangin aphajotai. Ajehchu hichehohi lou gasoh ngaichatnan anguijin amangthah jitauve.

¹⁰ Khotona nei numei ho khut chun achateu achul chulun, kamite kisuh mangna-a chun amaho chu a-an uvin apang taovin ahi.

¹¹Pakaiyin alungsatna chu amolso tan; aman alunghana nasatah chu ahin bunglhatai, chule Zion'a mei akongdoh tai, chule hichun thil bulho chu asumangtan ahi.

¹²Leisetna lenghole vannoi'a chengho jousen, akidoupi amelmau chu Jerusalem kotpiho sunga alut jou taove ti anaginchat louhel dingu ahi.

¹³Ajehchu amanu lailung tah-a chu themgaoho chonsetna le thempuho khangitlou jeh-a chondihho thisan kiso-a ahi.

¹⁴Amaho mitcho ho bangin khopi lamlen ho-a avah leuvin, mihon avonhou atohkhah nomlouna diuvin thisanin akisuboh-un ahi.

¹⁵Amahon ajah uva, nangho chemangun, potdoh-un, potdoh-un, hiche hi tongkha hih-un, athengpoi tin asamui, amaho ajam manguva avalele phatnun, amahon Pathen heloute lah-a, amaho chua chun chele tapouvinte tin aseijuve.

¹⁶Pakai lunghanna chun amaho asukhentan, aman amaho khohsah kit taponte, amahon thempuho ajabol tapouvin, chule upaho jong angaisah tapouvin ahi.

¹⁷Eiho dingin vang, kithopi pannabei ivetna lamun imitnu athontai, ivetvet naovahin eihuhdoh jou louvu nam khat ivedoh taove.

¹⁸Amahon ikalson nao ahindel peh-un, ikhopi lamlen hou ijot thei tapouve, ikichainao anaijin, inikhohou alhingin, ajehchu ikichainao chu ahung lhungtai.

¹⁹Eiho eisugenthei hou chu van'a mulaopi ho sangin agang jouvin, amahon lhangsang ho chunga eidelun, amahon gamthipma eiho eichang lhiuve.

²⁰In'ah homuva hu, Pakai thaonu, eihon ama lim noija Pathen heloute lah-a chenginge itiu chu, amahon akokhuh sunguva eikoi taove.

²¹Uz gama chenga, vo Edom chanu kipah-in lang thanomin; khon jong chun nangma nahinphah ding ahi. Nangma nakham ngoldel ding; ahi, chule nangle nang sagohkeo nakiso ding ahi.

²²Vo Zion chanu, nakhangitlouna talen namu chu akimolso tai. Aman nangma gal hingin nakai kit taponte, aman nakhangit louna jeh-a gotna napehding ahin, Vo Edom chanu, aman nachonset naho ahung mudoh ding ahi.