Read Thado Chin Kala 5 Bible Online

Kala 5 - Thado Chin bible

Kala 5

¹Hingel doh-in, vo Pakai, kachunguva ipi hung lhunga hitam, ngaiton, chule ven keiho kiphosalnahi.

²Kagouhou le kainhou hetlou mite hengle gamdang miho heng lama akiheitai.

³Keiho naochaga le paneilou kahitaove, kanuteu jong meithaiho abang taove.

⁴Katwihou man neijin kadonun; kathinghou keiho henga akijoh-in ahi.

⁵Kangonghou suhgentheina noija aumtan; katong gimun olna himhim kanei tapouve.

⁶Keihon neh le chah lonan kakhutnu Egypt mite leh Assyria mite henga kapetaove.

⁷Kapateu anachonseuvin, tun aum tapouve, chule keihon amaho khangitlouna kapouvin ahi.

⁸Soh hon kachunguva vai ahomun, amaho khutna kona eihuhdoh uva koimacha aumpoi.

⁹Gamthipma chemjam jeh-in thina geijin neh kakilouvin ahi.

¹⁰Kel hoisetah jeh-in kavunu jong lungthu bangin avom jeng tai.

¹¹Amahon Zion'a numei ho le Judah khopiho-a nungah ho asuseuvin ahi.

¹²Leng chapate akhutnun akikhaisangin; upaho mai jong jana akipepoi.

¹³Amahon gollhangho sumhei hehdin apuijun, chule chapangho thing noija alhugam taove.

¹⁴Kotpi phunga kon upaho, chule tumging theija konin gollhangho abangtauve.

¹⁵Kalung sunguva kipana abangtai, kalamnao jong lunghemna asohtai.

¹⁶Kalu uva konin lallukhuh alhatai; kanachonset jehu'n, Ohe ada kahiuve!

¹⁷Hichejeh hin kalungu alhamang tan; ajehchu hicheho jeh-a kamit hou thima ahitai.

¹⁸Zion molsang kamhela aumtah jeh-in, sial ho achunga avahleuvin ahi.

¹⁹Vo Pakai, nangma a-imatih chana umjing nahi, nalaltouna chu akhang akhanga umjinga ahi.

²⁰Chutia chu nangman keiho imatih chana dinga neisuhmilu hija, chule hitihchan pihi neidalhah-u hitam?

²¹Vo Pakai, naheng lama keiho neiheijun, chutile hung kihei taovinge, malaija bangin kanikho hou neisemthah peh-un.

²²Ahinla nangman keiho neipaimang hel taovin; keiho dounan kachunguva nalung ahanglhehtan ahi.