Read Thado Chin Ezekiel 1 Bible Online

Ezekiel 1 - Thado Chin bible

Ezekiel 1

¹ Tun ahung hitin ahi, kum somthum lhinkum, lhali channa ani nga channin, sohchangho lah-a Chebar vadunglen panga kaumpet tah-in, vanho anakihongin chule keiman Pathen'a kon thilmuho kanamun ahi.

² Chuche lhasung ninga channi, leng Jehoiachin sohchan kal akum nga channa-in,

³Pakai thu chu kilangtah-in, Buzi chapa Ezekiel thempu henga, Chaldea miho gamsung Chebar vadunglen panga ahung lhungin, Pakai khut chu ama chunga ahung kingame.

⁴Chuin keiman kagahvetle, veuvin chimpei khat sahlama konin ahungdoh-in, meilom lentah khat achama vahjeng, akimvel vah pempum, chuche lailunga meilah-a kon chun a-eng dum banga vahjeng aumin ahi.

⁵ Hicheho lailung tah-a kon chun ganhing toh kiloutah li ahungdoh-in, chule hichehi amaho melputdan chu ahi; amaho chun mihem melput tobang apuvin ahi.

⁶Chule khatcheh-in mai li aneijuvin, chule khatcheh-in lhaving li aneijuve.

⁷Chule amaho keng khophang chu ajangpetnin, akeng khophang hou chu bongnou keng khophang tobang ahin; chule hicheho chu sum-eng kinotval bangin avalsetnin ahi.

⁸Chule amahon apang li uva alhaving hou noija chun mihem khut tobang aneicheh uvin; chule amaho li chun mai le lhaving aneicheh uve.

⁹Alhaving hou chu khatle khat akisumat cheh-in, amaho chu ache tengule kiheile louvin, abonchauvin jang petnin angat nalang uva ache jiuve.

¹⁰ Amaho li maiso melput dan chu, mihem maiso apucheh uvin, chule ajetlam panguva keipi bahkai maiso apu uvin; aveilam panguva bongchal maiso apu uvin; chule ali uvin mulaopi maiso jong apucheh uve.

¹¹Amaho maiso chu hitobang hi ahin, alhavinghou chu chunglam ngan akijal touvin, lhaving ni chu khatle khat akisumatnin, chule ni chun amaho tahsapum akhu khume.

¹²Chule amaho abonchauvin jangpetnin malama acheuvin, lhagao chena ding lam lama chun amaho acheuve; chule amaho ache tengule akiheile pouve.

¹³Ganhingho chu hitobang ahiuve, alimso dan chu song meihol kou lenglung abangin, chule thaomei vah jong abange. Hiche thaomei vah chu ganhingho lah-a achesuh achetouvin; chule meikou chu avahsetnin, meikouva kon chun kolphe asohdoh-in ahi.

¹⁴Chule ganhingho chu kolphe vah bangin alhaijun, chule ahung kileuve.

¹⁵ Tun keiman ganhingho kavet petchun, veuvin leiset chunga um mai li nei ganhingho kom cheh-a chun, kangtalai kang khat cheh ahung ume.

¹⁶Hiche kangtalai kangho lim umdan le akisemdan chu khisong engdum abangin; chule amaho li hin kibahna khat aneijuve. Amaho limdan le amaho kisemdan chu, kangtalai kang lailung tah-a kangtalai kang um abange.

¹⁷Amaho ache tengule, apangli uvah acheuvin; amaho ache tengule akiheile pouve.

¹⁸ Kangtalai kang kikol ho chu ahile, amaho chu asang behseh un tijatjat aum jengin; chule amaho li kimvela hiche kangtalai kang kol ho-a chun mit adimset jengin ahi.

¹⁹Chule ganhingho chu ache tengule Kangtalai kang ho chun ajuijin, chule ganhingho chu leisetna kona dopsanga aumtengle, kangtalai kang hojong dopsangin aum jiuve.

²⁰Hoilam hile lhagao chenom nalam lama amaho acheuve; ajehchu chulam chu amaho lhagao chena ding chu ahin; chule amaho chutoh kangtalai kang chu dopsangin aume. Ijeh inem itile ganhingho lhagao chu kangtalai kang ho-a chu uma ahi.

²¹Chucheho acheteng, hicheho acheuvin; chule chucheho adinteng, hicheho adinguvin; chule leisetna kona dopsanga aumteng, kangtalai kang ho chu amahotoh dopsangin aumuvin ahi. Ijeh inem itile ganhingho lhagao chu kangtalai kang ho-a chu uma ahi.

²² Chule ganhingho luchunga vanthamjol banga umchu songval abangin, hichu alu chunguva akikhang jengin ahi.

²³Chule hiche vanthamjol noija chun alhavinghou jangpetnin khatle khat akingat to uvin, atahsao pang khatlam chu lhaving nin akhu khumin, atahsao langkhat lampang chu lhaving ni ma-in akhu khumin ahi.

²⁴ Chule amaho ache tengule, alhavinghou hugin chu twipiho gin tobang, Hatchung nungpen awgin tobang, thukisei awgin tobangle, janel ho husa gin tobangin kajan ahi. Amaho adin tengule alhavinghou chu amahon akoilha jiuvin ahin.

²⁵Chule amaho adinuva, alhavinghou atimlhah tengule, alu vumuva um vantham jola kon chun awgin khat ahung gingdoh jin ahi.

²⁶ Chule alu vumuva vanthamjol um chunga chun laltouna tobang khat aumin, khisong dumjet to abangin; chule hiche laltouna tobang chunga chun mihem tobang khat aume.

²⁷ Chule keiman akong chunglamse chu a-engdum tobang, asung akimvelse chu meikou bang jengin kamun; chule akonga pat anoilamse chu meikou tobang, akimvelse vah lenglung bangin kamun ahi.

²⁸Gojuh nikho-a meilhang lah-a lhagui lim kimu bang khun, akimvel chu avahpempum jengin ahi. Hiche chu Pakai loupi limso kilang chu ahi. Chuin hichu kamu phatnin, tolla kamai kasulut jengin, chule thu kisei awgin khat kajatan ahi.