Read Thado Chin Ezekiel 10 Bible Online

Ezekiel 10 - Thado Chin bible

Ezekiel 10

¹ Chujouvin keiman kagahven ahile, Cherub ho luchunga um vanthamjol lah-a chun, khisong dumjet laltouna lhehlheh khat aume.

² Chule amapa chun tupat pona kivon mipa jah-a chun thu aseijin, chule hitin ati, Cherub noitah-a kangtalai kangho kikah-a chun chelutnin, chule Cherub ho kah-a konin songmeihol nakhut dimsetnin hamdoh-in lang, hicheho chu khopi chunga gathe jah-in, ati. Chuin amapa chu kamuta-in achelut tai.

³Tun mipa achelut phatnin Cherub ho chu chuche in jetlam panga chun adingtauvin; chule inhong sungnung chu meilom'in adimtai.

⁴Chuin Pakai loupina chu Cherub'a kon chun akaltouvin, chule in lutna kotchunga chun adingtan; chule a-in chu meilom adimin, chule ahongsung chu Pakai loupina vah chun alosohtai.

⁵Chule Cherub ho lhaving gin chu Hat chungnung Pathen'in thu aseitenga a-awgin bangin, in ponung geijin akijan ahi.

⁶Chule Cherub hole kangtalai kang kikah-a kona mei-am galan tia tupat ponnema kivonpa henga thu apeh chun ahitin ahi; chujouvin ama alutnin kangtalai kangho koma chun agadingtai.

⁷Chuin Cherub khatnin, Cherub ho kahlah-a kon chun Cherub ho kahlah-a um meikou lama chun akhut ahinlhang doh-in, chuin hichu alan, chule tupat ponnema kivon mipa khutna akoijin ahile, amapan hichu alan achedohtai.

⁸Chuin hiche Cherub ho lhaving noija chun mihem khut tobang khat ahungdohtan ahi.

⁹ Chule keiman kagahvet phatnin, veuvin, Cherub ho panga chun kangtalai kang li, Cherub khat panga kangtalai kang khat, chule Cherub dang khat panga kangtalai kang dang khat aume. Chule hiche kangtalai kang ho limdan chu khisong engdumtoh abangin ahi.

¹⁰Chule kangtalai kangho limso dan chu, aliuvin kibahna khat aneijuve, hichu kangtalai kang khat lailung tah-a kangtalai kang khat kibut abangin ahi.

¹¹Amaho ache tengule amaho apang li in acheuvin; amaho achepumun akiheile pouve, amavang aluchangun avetna lama lamu amahon ajuijuvin; amaho achepumun akiheile pouve.

¹² Chule amaho tahsa pumpi, atungtunhou, akhuthou, alhavinghou, chule kangtalai kang, chule ali uva aneiju kangtalai kangho geijin akimveluchu mitjeng adimsetnin ahi.

¹³Kangtalai kangho chu ahile, keima jah in, Vo kangtalai kang tin akisame.

¹⁴ Chule khatcheh in mai li aneijuvin; mai masa chu Cherub mai, mai nina chu mihem mai, chule athumna chu keipi bahkai mai ahin, chule alina chu mulaopi mai ahi.

¹⁵Chuin Cherub ho chu dopsangin aumtaove. Hiche ganhing hi Chebar vadunglen panga kanamu chu ahi.

¹⁶Chule Cherub ho chu acheteng kangtalai kangho chun amaho ajuijuve; chule Cherub hon leisetna kon kaltouving tia alhavinghou adoptou tengule, hiche kangtalai kangho jonghi amaho panga konin akiheile pouve.

¹⁷Amaho adin tengule hicheho adinguvin, chule amaho dopsanga aum tengule, hicheho jonghi amahole amaho akidomsang jiuve. Ajehchu ganhing lhagao chu amaho sunga uma ahi.

¹⁸Chujouvin Pakai loupina chu chuche in kotphunga kon chun achemangin Cherub ho chunga agadingtai.

¹⁹Chuin kamitmu tah-in Cherub hon alhavinghou adomsangun, leisetna konin akaltou taove. Amaho achedoh phat chun kangtalai kangho jong apanguva abeh-in, chule khatcheh chu Pakai in solam kotpi phunga adingcheh uvin; chule Israel Pathen loupina chu amaho chunga aume.

²⁰Hichehi ganhing, Israel Pathen noija Chebar vadunglen panga keiman kanamu chu ahi. Chule amaho chu Cherubim ahi ti kahei.

²¹Khatcheh in mai li aneicheh uvin, chule khatcheh in lhaving li aneicheh-un, chule alhavinghou noija mihem khut tobang aumcheh-e.

²²Chule amaisou hung kilah chu Chebar vadunglen panga kamu tobang maiso mama chu ahin, chule amaho malama jangpetnin ache cheh uve.