Read Thado Chin Ezekiel 11 Bible Online

Ezekiel 11 - Thado Chin bible

Ezekiel 11

¹Chukalvalin lhagaovin keima eidom touvin, chule Pakai in solam kotpi, solam maingatna chun eilhuttai. Chule veuvin, kotpi kotphunga chun mi somni le nga aumin, amaho lah-a chun keiman mipi ho pipui Azur chapa Jaazaniah chule Benaiah chapa Pelatiah chu kamun ahi.

²Hichun aman kajah-a aseijin, Mihem chapa, amahohi thilphalou gong miho, chule hiche khopi sunga thil gilou thumop leho chu ahiuve.

³Amahohin, phat chu anai hihlaije, eihon inho satadiu hite, hiche khopihi khangbel len chu ahin, chule eiho asaphe chu hiuhite, atiuve.

⁴Hijeh chun amaho dounan gaovin, Vo mihem chapa, gaovin, ati.

⁵Chuin Pakai lhagao chu kachunga ahungchun, chule kajah-a aseijin, Seijin; Pakaiyin hitin aseije; Vo Israel insung, nanghon hitihin naseitaove; ajehchu keiman nalung sunguva hunglut thil chu abonin kahesoh keijin ahi.

⁶Nanghon khopi sunga mihem tampi nathat taovin, chule nanghon khosung lamlen jouse mithi nadip taove.

⁷Hijeh chun Pakai Pathen'in hitihin aseije; Nanghon namitha hou khopi lailung tah-a nalupsah hou chu sa chu ahiuvin, hiche khopi hi khangbel len chu ahi. Ahivangin keiman hiche lahtah-a kona nangho kapuidohtei ding nahiuve.

⁸Nanghon chemjam chu nakichaove; chule keiman nangho chunga chemjam khat kahin chuhsah ding ahi, tin Pakai Pathen'in aseije.

⁹Chule keiman hiche lailung tah-a kona nangho kapuidoh ding, chule nangho hetlou miho khutna kapeh doh-a, chule nalah uva thu katan ding ahi.

¹⁰Nangho chemjam'a nalou dingu; keiman Israel gamgi-a nathu katan ding, chule nanghon keima Pakai chu kahi ti nahet dingu ahi.

¹¹Hiche khopihi nangho khangbel chu hilouhel ding, alailungtah-a sa jong chu nangho nahilouhel dingu ahi; amavang Israel gamgi-a nachung thu katan ding ahi.

¹²Chule nanghon keima Pakai chu kahi ti nahet dingu ahi. Ajehchu nangho kadan kisun ho-a nache tapouvin, kathutanho jong natongdih pouvin, ahinla Pathen helou nakimvel uva umho umdan bangin nanghon naboljo taove, ati.

¹³Chuin ahung hitin ahi, keiman gaothu kasei petnin, Benaiah chapa Pelatiah chu athitai. Chuin kalhun kamai tolla kasulutnin, aw gingtah-in ka pengin, Ohe Pakai Pathen, nangman Israel ho lah-a ahingdoh amoh hohi nasuh manghel jeng ding hitam! tin kaseije.

¹⁴Pakai thu chu keima henga ahung kitnin, hitin ati,

¹⁵Mihem chapa, nasopi ho, nasopi ho mongmong, na-insung miho, chule Israel insung pumpi jouse chungchanga hi ahi Jerusalem'a cheng miten, Nangho Pakaiya konin gamlaovin: hiche gamhi keiho lodinga eikipeuva ahi, tia aseina chu ahi.

¹⁶Hijeh chun seijin, Pakai Pathen'in aseije; Keiman amaho gamlatah-a Pathen helou miho lah-a lehdoh jengjong leng, chule keiman amaho gamdang danga thecheh jengjong leng, alhunao gamho-a chu amaho dinga keima muntheng neokhat tobang kahiding ahi.

¹⁷Hijeh chun seijin, Pakai Pathen'in hitihin aseije; keiman nangho mipi ho lah-a kona kachopkhom dingu, nakithe chehnao gamsungho-a kon kapuikhom dingu, chule keiman Israel gam chu nangho kapeh dingu ahi.

¹⁸Chule amaho khulama hungdingu, chule amahon hichea kona chu, chua um ningset umtah thilho jousele thet umtahho chu alahdoh dingu ahi.

¹⁹ Chule keiman amaho chu lungthim khat kapeh ding, chule nasunguva lhagao thah khat kakoipeh dingu; chule keiman atahsaova kona song banga tah alungchangu chu kalah doh-a, chule amaho chu tahsa phe-a kasem lungchang kapeh ding ahi.

²⁰Chutia chu amahon kadan kisun ho ajuijuva, kachonna danho anitdiu, chule hicheho chu anatoh-a atohdoh dingu; chutengle amaho chu kamite hiuva, keima amaho Pathen kahi ding ahi.

²¹Ahinla ningset umtah le thet umtah thil ho lama alungu chesahho vang chu, keiman aluchung cheh uva achenau lampi chu kalethuh ding ahi, tin Pakai Pathen'in aseije.

²² Chujouvin Cherub ho chun alhavinghou ajah touvun, chule kangtalai kangho apanguva abeh-in; chule Israel Pathen loupina chu amaho chungvuma aume.

²³Chuin Pakai loupina chu khopi lailung tah-a kon chun achetouvin; chule khopi solama um molsang chunga chun adingtan ahi.

²⁴Hiche nunghin lhagao chun eilatouvin, chule gaothil muna-in Pathen lhagaovin Chaldea gama gal hinga kikaiho henga eipuitan ahi. Hitichun keiman thilmu kanamu chu keija konin achetoutai.

²⁵Chuin keiman Pakaiyin eimusah thilho jouse chu gal hinga kikaiho henga kaseisoh keijin ahi.