Read Thado Chin Ezekiel 12 Bible Online

Ezekiel 12 - Thado Chin bible

Ezekiel 12

¹Pakai thu jong kahenga ahungin, hitin aseije,

² Mihem chapa, nangma kiphinjing insung lahtah-a chenga nahi; amahon mun'a ding mit aneijun, amuthei pouvin; jahna ding kol aneijun, ajathei pouve; ajehchu amaho kiphinjing insung ahiuve.

³Hijeh chun mihem chapa, nakichon doh nadingin nathilkeo kigon tupmin, chule amaho mitmun sunlai tah-in kichondoh-in; chule nangma naumna mun'a kona munchom dang khatna amaho mitmu-a nakichon doh ding ahi. Amaho thungailou insung hijongleu, angaito maithei dingu ahi.

⁴Chujouteng nangman sunlai tah-a nathilkeuho chu amaho mitmu tah-a kichondohna thilkeu banga nahinpoh ding; chule nangma amaho mitmu tah-a nilhah tahle gal hinga kikailut ho che banga nachedoh ding ahi.

⁵Nangman amaho mitmu tah-a bang chu natuh vang paiding, chule chutia chu napohdoh ding ahi.

⁶Amaho mitmu tah-a nangman hichu nalengkou teni chunga napoh-a, chule hichu khomu chipchet tahle napohdoh ding, tol namuthei louna dinga nangman namai nakikhu ding ahi; ajehchu keiman Israel insung dinga melchihna khatna katun nahitai, ati.

⁷Chuin keiman eikithupeh bangin kaboltai, keiman sunlaitah in kathilkeoho chu gal hinga kikaiho thilkeo bangin kahin podoh tan, chule nilhah lamin kakhut tah-in bang chu katuvang paijin, keiman hichu khomut chipchep nin kapodoh-in, amaho mitmu tah-in kalengkou chunga kapun ahi.

⁸Chuin jingkah in Pakai thu kahenga ahung lhungin, hitin ati,

⁹Mihem chapa, Israel insung thungailou insung chun nahenga, Ipi nabol ham tia asei hilouham?

¹⁰Amaho henga nangman hitin seijin, Hitihin Pakai Pathen'in aseije; hiche pohgih hi Jerusalem vaipopa le, amaho lah-a um Israel insung pumpi vetsahna ahi.

¹¹Seijin, keima nangho dinga melchihna kahin; keiman kabol banga amaho henga jong kabolding ahi. Amaho chondoh-in umuntin, chule sohchang dinga cheding ahiuve.

¹²Chule alah uva leng chapa chun khomut chipchep tengle athilkeoho alengkouva aputna chedoh ding; amahon hicheho chu pohdohna dinga bang chu atuhvangpai dingu; ama chun amitna tol amu theilouna dinga amai akikhu ding ahi.

¹³ Keiman kalen jong achunga kajal ding, chule ama chu kathangkola ohding; chule keiman ama chu Chaldea mite gam Babylon kalhut ding; chukoma chu ama thi ding, hijongle hichu amulou ding ahi.

¹⁴Chule keiman ama panpi dinga ama kimvela umho jousele, ama galsat mihon ho chu hui nunna channa kathecheh ding; chule keiman amaho chemjam'a kanungdel ding ahi.

¹⁵Chule keiman amaho namtin lah-a kathecheh-a, chule gamsungho-a kasuhcheh tengle, amahon keima Pakai kahi chu akihet dingu ahi.

¹⁶Ahijeng vanga amahon agalhun nahou Pathen helouho lah-a thet umtah ahinahou akiphondoh theina dinguva, keiman amaho lah-a themkhat chemjam'a kona, kella kona, chule hise-a kona kakhendoh ding; chule amahon keima Pakai kahi ahin het dingu ahi.

¹⁷Chukalvalin Pakai thu chu kahenga ahungin, aseije,

¹⁸Mihem chapa na-anneh chu kihot pumpumin nenlang, natwi chu kithing thingpumin, chingthei tah-in donin;

¹⁹Chule gamsung mipi ho henga seijin, Jerusalem le Israel gamsunga chengho Pakai Pathen'in hitin aseije; agam sunguva chengho jouse hunam thilbol jeh-a, asunga chengjouse-a kona kamhela aumtheina dinguva; a-anneh-u chingthei tah-a aneh dingu, chule atuiju kidangsa tah-a adon dingu ahi.

²⁰Chule mihem chenna khopiho chu manlou sohding, chule gamsung chu kamhel ding; chule nanghon keima Pakai kahi chu nahet dingu ahi.

²¹Chuin Pakai thu chu kahenga ahungin, hitin aseije,

²²Mihem chapa, nanghon Israel gamsunga naneiju thuchih, Nikhoho chu akisaosah-in, chule thilmu jouse athontai, tia kiseija chu ipi kiseina ham?

²³Hijeh chun amaho chu seipeh-in, Pakai Pathen'in hitihin aseije; Keiman hiche thuchih hi kasuhbei ding, chule amahon hichehi Israel sunga thuchih-a amankit tah loudiu ahitai; amavang, Nikhoho ahung naijin, gaothilmu jouse ahung guilhungtai, tin amaho seipeh-in.

²⁴Ajehchu pannabei gaothilmu le joule nala Pathen thu kisei kiti himhim chu Israel insunga umkit talou ding ahi.

²⁵Ajehchu keima Pakai kahin; keiman kaseiding, chule keiman kaseidoh ding thuho chu hung guilhungtei ding; hichu geisang louding ahitai. Ajehchu vo kiphinhat insung, nangho nikho sunga hi keiman athu chu kaseiding, chule hichu katohdoh ding ahi, tin Pakaiyin aseije.

²⁶Pakai thu chu avelin kahenga ahungin, hitin ati,

²⁷Mihem chapa, ven, Israel insung miten hitin aseijuve, Amapan gaova thil amuho ahunglhun nading nikho tampi avat nalaije, chule khonung peh-a hung guilhung ding thua gaothu aseimasah ahibouve, atiuve.

²⁸Hijeh chun amaho henga seipeh-in, Pakai Pathen'in hitin aseije, kathuho khatchabeh jong kisuhsaobe louding, amavang keiman kaseidoh thu chu tohdoh-a umding ahitai, tin Pakai Pathen'in aseije.