Read Thado Chin Ezekiel 13 Bible Online

Ezekiel 13 - Thado Chin bible

Ezekiel 13

¹Chuin Pakai thu chu kahenga ahung lhungin, hitin ati,

²Mihem chapa, Gaothu seija Israel themgaoho, amaho lungdei deija gaothu seidoh ho dounan gaothu hitihin seijin, Nanghon Pakai thu chu ngaijun;

³Pakai Pathen'in hitihin aseije, Ohe, ama lhagao lunggela chonna chule ima muneilou themgao ngol hochu ada nahiuve!

⁴Vo Israel, nathemgao ho vang neldi gama sial ho bangbep ahiuve.

⁵Nangho a-onglaiho-a nachetou pouvin, chujongle Pakai nikho tengle galkisatna-a Israel insunga din theinadin tho nakai pouve.

⁶Amahon pannabei amuvin, jouva aisan ahiuvin, Pakaiyin aseije, atiuve: ahinla Pakaiyin amaho asolpoi. Chule amahon athusei houchu kisudet ding ahi tin midangho akinepsah uve.

⁷Nanghon pannabei gaothil namu-u hilou ham? Chule nanghon jouva aisan nathu nanaseileu hilouham? Nanghon hichu Pakaiyin aseije nati uvin; ahinla keiman kanaseipoi.

⁸Hijeh chun Pakai Pathen'in hitin aseije, nanghon pannabei nana seijuvin, chule jouthu jeng namu uve; veuvin, hijeh-a chu keima nang hotoh kidouva kahitai, tin Pakai Pathen'in aseije.

⁹Chule kakhut hi pannabei jeng mu-a themgaoho chungle jouva aisanho chunga kachuhsah ding ahi. Amaho chu kamite kiloikhomna-a lhalou dingu, Israel insung kisutna-a jong amahohi kisun loudingu, chule Israel gamsunga jong lutlou dingu ahi; chutengle nanghon keima Pakai Pathen kahi nahetdoh dingu ahi.

¹⁰ Ajehchu amahon kamite chu chamna aume tin ajoulhep mun, ahin chamna aumpon; chule khatnin bang khat atungdoh-in, chule ven, adanghon hichu chilminlou leingan nin aloijol uve.

¹¹Chilminlou leingana loijol ho henga seipeh-in, Hichu lhutei ding ahi; gohong longlet hela hung juding; chule, O gelchanglen ho, nangho nahung lhah dingu; chule hichu huipi leh gopin asuhtel ding ahi.

¹²Ven, bang chu ahunglhuh tengle, chilminlou leingana naloi bang chu hoilamba hitam? tia kiseilou dingham?

¹³Hijeh chun Pakai Pathen'in hitin aseije; Keiman kalungsatna-a hichu gopi leh huipi-a kasuhchim ding ahin; hiche suhmangna dinga chu kalunghana gohong juh-a longlet hela juding; chule kalungsatna gelchang lentah ho-a juding ahi.

¹⁴Hitia chu nanghon chilminlou leingana naloijolu bang chu kasuhchim ding akitunna chu holdoh-a aumna dinga hichu toltoh kasuhmat ding, chule hichu lhutei ding, chule hicheho lah-a chu nangho suhmanga naum dingu ahi. Chutengle nanghon keima Pakai kahi nahet dingu ahi.

¹⁵Chutia chu chuche bang chungle, chilminlou leingana loijol ho chunga chu kalunghana kasuhbulhit ding, chule nangho jah-a, Bang chu aumtapoi, chule chuche loijol ho jong chu aumtapoi, tia kasei ding ahi.

¹⁶Hicheho chu Jerusalem chung chang gaothu seija themgaoho le, chamna umlou petna amanu dinga chamna gaothil mupehho themgaoho ahiuve, tin Pakai Pathen'in aseije.

¹⁷Chutobangma chun nangma mihem chapa, namite chanute lam nganlang amaho lungdei lama gaothu seiho dounan amaho chunga gaothu seijin,

¹⁸Chule Pakai Pathen'in hitihin aseije tin seipeh-in, Sangkhol tinchenga mitpheldoi khao kikhuibeh ho, mihem hinna sumang dinga kisalel milen tahtah ho delkop khuipeh numei ho, ada nahiuve! Nangho kamite lhagao chu nadel lele uva, naheng uva hunga lhagaoho chu nahinghoi diuham?

¹⁹Chule nanghon kamite lah-a sakolchang khutdim khat, chule changlhah pheng halkhatna athilouding hinnaho thana dingle, ahing louding hinnaho huhdohna dinga, kamiteho najouseiju jaho henga, najou thu-u seija suhboh ding neigot-u ham?

²⁰Chuti ahi jehchun Pakai Pathen'in hitin aseije; Veuvin, nanghon hinnaho lenmang sah nadinga namanu mitpheldoi ho chu kaki doupin, chule amaho chu keiman nakhut uva kona kamaltela, hinnaho kalhadoh ding, chule lensah dinga nadelu hinnaho jeng jong chu kalhadoh ding ahi.

²¹Na ultheh pon hou jong keiman kabotela kamite nakhut uva kona kahuhdoh ding, chule amaho chu nangho khutna dellea umkit talou ding ahiuve; chule nanghon keima Pakai kahi nahet dingu ahi.

²²Keiman kasuh gimlouho michonpha ho lungthim jong nanghon jouvin nasulung gimun, chule agitlounau lampia kona akilekit louna diuvin hinna anei dingun thutep nape-un, migilouho khut natha hatsah-un ahi.

²³Nanghon pannabei mu nanei tahlou diu, doile ai nasan kitlou dingu ahitai. Ajehchu keiman kamite chu nakhut uva kona kahuhdoh ding; chule nanghon keima Pakai kahi chu nahet dingu ahi.