Read Thado Chin Ezekiel 14 Bible Online

Ezekiel 14 - Thado Chin bible

Ezekiel 14

¹Chujouvin Israel mite upaho lah-a loikhat keima henga ahunguvin, ka-anga ahung touvun ahi.

²Chuin Pakai thu chu kahenga ahungin, hitin ati,

³Mihem chapa, hiche miho hin asemthu-u milimho chu alungsung uva atundoh cheh uva, akhan gitlounao kipal lhuhna chu amasanguva akoiju ahitai. Keima amaho kholle ding kahim?

⁴Hijeh chun amaho henga hitihin thu seijin, Pakai Pathen'in hitin aseije; Israel insungmi amitakip alungsunga semthu milimho tungdoh-a, chule akhan gitlouna akipal lhuhna-a chu amaichanga koija, themgao henga hunga chu; Pakai keiman ahung penpen chu asemthu milimho tam dungjuija kadonbut ding ahi;

⁵Ajehchu Israel insung chu asemthu-u milimho jeh-a keija kona gamla ahitah jeh uva, keiman alunglam tah uva matding kati ahi.

⁶Hijeh chun Israel insung henga seipeh-in, Pakai Pathen'in hitihin aseije; nalung heijun, nasemthu-u thilho-a konin kihei mangun, chule nangho thet umtah nahinnaova konin namaiju heimangun.

⁷Ajehchu Israel insung mitele gamdang mi Israel lah-a pemlut tapou, ama chama keija kona chom um, chule asemthu-u milimho alungsunga tungdoh-a, akhan gitlouna kipal lhuhna chu amaichanga koija, chule themgao khat henga keima thudol dong dinga hunga chu, Pakai keimatah-in ama chu kadonbut ding ahi.

⁸Chule keiman amapa chu kakimaitopi ding, chule amachu melchihna khatle thuchih khatna kasemding, chule amachu keiman kamiteho lah-a kona kasatlhah-a, chule nanghon keima Pakai kahi nahet dingu ahi.

⁹Chule themgao chun thilkhat aseija lheplhah-a aumtahle, Pakai keiman themgao chu kalheplhah hiding; chule keiman ama chunga chu kakhut kajah-a, ama chu kami Israelte lah-a kona kasuhmang ding ahi.

¹⁰Chule amahon akhan gitlounao talen chu akipohdoh dingu ahin; themgao talen chu ama gaholpa talen chutoh kibang ding ahi.

¹¹Chutia chu Israel insung chu keija kona petmang kit talou ding, chule asuhkhelnau jouse-a kona jong suhboh-a umkit talou dingu; ahivanga amaho kamite hitheijuva chule keima amaho Pathen kahiding ahi, tin Pakai Pathen'in aseije.

¹²Pakai thu chu kahenga ahungkitnin, hitin ati,

¹³Mihem chapa, agam pumpi nasatah-a keima douna-a suhkhelna anei tengule, keiman achunguva kakhut kajah-a, changlhah hungkondohna chu kasuhtan ding, chule achunga kel kahin lhunsah-a, mihem le sahem agoma kasatlhah ding ahi.

¹⁴Chule hiche mi thumho, Noah, Daniel chule Job chu asunga umnama jongleu, amahohin achonphatnao jala amahon hinna akihuhdoh dingu ahi, tin Pakai Pathen'in aseije.

¹⁵Keiman gamsunghi gimneitah sahemho kapal sah-a, amahon asuhsetnuva, sahemho jeh-a chu gamsung chu koiman apalthei lou dinga akamhela ahile;

¹⁶Hiche mi thum hohi asunga umnama jongleu, keima kahinjing jeh-in, amahohin chapaho le chanuho ahuhdoh loudingu; amaho vang huhdoh-a umuva, gamsung chu kamhel ding ahi, tin Pakai Pathen'in aseije.

¹⁷Ahiloule keiman mihemle sahem hichea kona chu kasuhmang nadinga, agam chunga chemjam kahin lhunsah-a, chule chemjam jah-a, agamsunghi satnin tia kaseija ahile;

¹⁸Hiche mi thum hohi hiche sunga hin umnama jongleu, keima kahin jeh-in, amahohin chapaho hihen chanuho hijongle ahuhdoh loudingu, amavang amahole amaho bou kihuhdoh ding ahiuve, tin Pakai Pathen'in aseije.

¹⁹Ahiloule keiman hiche gamsunga natset kahin lansah-a, hichea kona mihemle sahem sugam dinga kalungsatna chu thisana achunga kahin sunlhah-a ahile;

²⁰Noah, Daniel chule Job, asunga anaum nama jongleu, keima kahinjing jeh-in, amaho chun chapaho le chanuho ahuhdoh loudingu, ahivangin amahon achonphatnao jala amaho hinna akihuhdoh dingu ahi, tin Pakai Pathen'in aseije.

²¹ Ajehchu Pakai Pathen'in hitin aseije; Mihemle sahem suhgamna dinga keiman Jerusalem chunga kathutana nasatah liho: chemjam, kel, hugingtah sahem chule natset kahinsol tengle, ichana nasading hitam?

²²Hijeng jongle, veuvin, hiche sunga kona puidoh-a umding chapaho le chanuho, ahingdoh amoh hung umdingu ahi. Veuvin, amaho nangho henga hungdoh dingu, chule nanghon amaho lamlhah le anatoh-u namu dingu ahi. Chule keiman Jerusalem chunga kilhut thil gilou chung chang le, amaho chunga kalhunsah jouse chungchanga hi lungmon sah-a naum dingu ahi.

²³Chule nanghon amaho lamlhah le natoh ho namu tengule, amahon nangho nalhamon dingu ahi. Chule keiman asunga kabolho jousehi ajehbeija kahinbol ahipoi, ti nanghon nahet dingu ahi, tin Pakai Pathen'in aseije.