Read Thado Chin Ezekiel 16 Bible Online

Ezekiel 16 - Thado Chin bible

Ezekiel 16

¹Pakai thu chu avelin kahenga ahungin, hitin ati,

²Mihem chapa, Jerusalem thet umtah ahinaho kihetdoh sah-in,

³Chule Pakai Pathen'in Jerusalem henga hitihin aseije, tin seijin; Napenna le nagam mi hina chu Canaan gam ahin, napa chu Amor mi ahin chule nanu chu Hit mi ahi.

⁴Chule napen dan chu ahile, nahung pen nikho chun nalaigui anakitanpon, twija jong silngimin nana-umpon; chi-in jong jutnin nana-umpon, chule ponin jong nana kitompon ahi.

⁵Nachunga hitobang bolpehna dinga amitna khotona nei koima anaumpoi; ahin nahungpen nikho-a kidah umtah nahi jeh-in, nangma gam onga paidoh-in nana umtai.

⁶Chule keiman nakom kahin hopa chun, nangma nathisana nana kisuhboh kamun, nangman nathisan lah-a nana umpet chun keiman nahenga, Hingin, tin kanaseije. Henge, nangma nathisan lah-a nana umpet chun Hingin, kanatin ahi.

⁷Keiman nangma gama thil mumdoh khat bangin kapunsah-in; chuin, nangma nahung khangin, nahung pilhingin, chule melhoitah nahunghin ahi. Nanoi teni ahung kigongdoh-in, chule nasam ahung khangin, ahin nangma sagoh le ponbei nahi nalaije.

⁸Tun keiman nangma kahinho pa-a, kahinvet chun, ven, nangma dei naum phat tah chu ahi; hijeh chun keiman kaponlha-a kahin khun, nasagoh hina kakhu khumpeh tai keima nahenga kaki hahsel in, chule nangma toh kitepna khatna kalutnin, chule nangma keija nahung hitai tin, Pakai Pathen'in aseije.

⁹Chuin nangma twijin kasilin, henge, keiman nangma-a konin nathisan chu hoitah-in kasop thengin, chule thao kanun ahi.

¹⁰Keiman nangma ajemneija kikhui ponin kana vonin, chule satuilut vun kengchot kasepeh-in, tupat ponnemin natai kagah-in, lungpon kasilpeh-in ahi.

¹¹Keiman nangma kijepnaho-in jong kajemin, nakhut teni-a chaokol kabupeh-in, nagonga sumgui ka-o peh tai.

¹²Chule keiman nanahkuija sumkol kabapeh-in, nabil teni-a bilba kabapeh-in, chule naluchunga lallukhuh hoitah khat kakhuh peh-in ahi.

¹³Hitichun nangma sanale dangka-a nakijemin, chule navon chu tupat ponnem, lungpon, chule ajem neija kikhui pona kon ahin; na anneh chu changbong neljet, khoiju, chule thao ahi. Chule nangma nahoi lheh jengin, chule lenggam khat bangin nakhang toutan ahi.

¹⁴Chule namelhoi chun Pathen heloute lah geija naminthan sahtai; ajehchu keima hoina nachunga kavonpeh jala chamkima nahi, tin Pakai Pathen'in aseijin ahi.

¹⁵Ahinla nahoina chu nakisonpin, naminthan jeh-in noti'n napangin, chule najon thanhoina jouse chu nahinjotpa jouse chunga nabung lhatan, hichu ama-a ahijitai.

¹⁶Chule nangman von phabep nakilah-in, nangma-a dingin munsang ho najem polin, chule hicheho chunga chun noti'n napangin ahi. Hitobang chu hunglhung kittalou ding, chutobang chu hikit louhel ding ahitai.

¹⁷Keiman nangma kanapeh ka sanale dangka kijepna hoitahtah ho chu nakilah-in, chule nangma-a dingin semthu pasal ho lim nakisemin, hicheho tochun nangman jongthan hoi naboltan ahi.

¹⁸Chule ajem kikhui navonho chu nalan, hicheho chu nakhu khumin; chule kathao le kagim namtui chu amaho anga nakoipeh tai.

¹⁹Keima anneh nangma kapeh changbong neljet, thao, chule khoiju nangma vahna-a kanei jengjong chu, nangman amaho anga gimnamtuijin nakoipeh-in; hitichu anahitai, tin Pakai Pathen'in aseije.

²⁰Chukalvalin nangman nachapate le nachanute, keima dinga nahinho chu, nakipuijin chule amaho chu nangman ganlhaina-in napedoh tai. Hiche najon thanhoinahi thilneo ham?

²¹Nangman kachate nathat gamtan, chule amaho chu amaho dinga meikou palsah-a manchah dingin napedoh tai.

²²Chule thet umtah nahinaho, najonnaho jouse-a, nangman nakhang donlai nikhoho, sagoh keole pon beija na-umlai, chule nathisana nangle nang suhboh nahilai chu nageldoh tapoi.

²³Chule nakhan gitlouna jouse nungin ahung hitin ahi, (Ohe, ohe, ada nahi, tin Pakai Pathen'in aseije.)

²⁴Hitichun nangman nang dingin mun kilang khat nakisah doh-in, chule muntina munsang nakisemin ahi.

²⁵Nangman namun sangho chu lamthom tinna nakisah doh-in, chule namel hoina chu kidah umtah nason, koihile nahin hopa tapou henga nakeng teni nakah-in, chule najon thanhoinaho napunsah-in ahi.

²⁶Nangman na inheng Egypt miho tahsapum lentah ho toh nanajongtan, Keima phinsetna lunghansahna dingin, najon thanhoina nasuh tamben ahi.

²⁷Vetan, hijeh-a chu keiman kakhut nachunga kajah-a, naneh ngai anneh kasuhlhom peh-a, jonthanhoi jeh-a jahcha-ah, naho-a Philistine chanute lunggot lama nangma kapehdoh nahitai.

²⁸Nangman najon thanhoina nakhoplou jeh-in, Assyria miteto jong najong khomin, henge, amaho dingin noti'n nakisan, ahinla nalungna achim joupoi.

²⁹Nangma chukalvalin Canaan gamsunga Chaldea miteto najonben, ahijeng vangin chua jong chun nalunglhai dehpon ahi.

³⁰Nangman hitiho thil jouse, jachat helouva numei jongthang hoi kimanchah bangin nakimangchan; ichana nalungthim lhasama hitam, tin Pakai Pathen'in aseije.

³¹Nangman lamthom tina namun kichoiho, chule lamlhah tinna namun sangho nasadoh-in, ahin nangman aman iman nalah loujeh-in, nangma noti bangin na-umpon;

³²Amavang inneipi khat a-inneipu khela hetlou miho jonpia tobang nahi.

³³Amahon numei notiho thilpeh apeuvin; ahinla nangman nakingaipiho jouse nathanhoi na-a nahenga ahung theina diuvin thilpeh napen nathalah-in ahi.

³⁴Chule najon thanhoi na-a nangma numei danghotoh nakibahlouna aumin, amaho koimachan jonpi dingin nangman nahinjui pouve. Nangman tohman napehji-a, chule nangma peh-a na-umlouhi mitoh nakibahlouna ahi.

³⁵Hijeh chun, vo notinu, Pakai thu ngaijin,

³⁶Pakai Pathen'in hitin aseije; nangma bohna sunlhah-a ahung umjehle, nakingaipi ho le thet umtah namilim semthuho toh najon thanhoina jeh-a sagohkeo nahina hodoh-a ahung um jeh, chule amaho napeh nachateho thisan jeh-a;

³⁷Ventan, keiman nakingaipiho jouse, nanopsah khompiho jouse toh, nangailut ho jouse toh, nana thet ho jouse chu kakhop khom ding; keiman amaho chu nakimvela kakhop khom ding, chule amahon nangma sagohkeo nahinaho amudoh theina dinguva, ahenguva sagohkeo nahina chu kahodoh ding ahi.

³⁸Chule keiman nachung thu chu numei kichen sukeh ho le thisanso ho chungthu akitan banga katan ding, chule keiman lungsatna le thangthip na-a thisan kapeh ding nahi.

³⁹Chule keiman nangma amaho khutna jong kapehdoh ding, chule amahon namun kichoilaiho chu asuhlhuh uva, chule namun sang laiho chu asuhchim dingu ahi. Chule amahon nangma naponho jouse naholhahpeh dingu, chule nasongmantam hoitahho chu nalahpeh uva, sagohkeo le pon beija nadalhah dingu ahi.

⁴⁰Amahon nangma doudinga honkhat jong ahinpui dingu, chule amahon nangma songa naseuva, achemjamuva nasutpai dingu ahi.

⁴¹Chule na-inhou chu meija ahalvamuva, numei tampi mitmu-a nachung thu atandingu; chule keiman nangma noti'a napanna chu kasuhtana, nangman thalah nabol louding ahitai.

⁴²Hitia chu keiman nachunga kalungsatna chu ka kicholdo sah-a, chule kathangthipna chu nanga kona chemanga, kathipbeh ding; chule kalung hangkit talou ding ahi.

⁴³Nangman nakhangdon lai nikhoho geldoh louva, hiti thilho jouse-a neisuh lungjing jeh-a hi; vetan, hijeh-a chu keiman jong nachondan jouse naluchunga kalethuh ding ahi, tin Pakai Pathen'in aseije. Chutengle thet umtah nabolna jouse chungvuma jonthanhoi nabolkit louhel ding ahitai.

⁴⁴Ven, koihile thuchih mangcha jouse chun nachunga hiche thuchih, anu hinabang banga, achanu jong hia ahi, kitihi amanchah dingu ahi.

⁴⁵Nangma nanu chanu, a-inneipu le achateho theida-a chu nahi, chule nangma a-inneipu teho le achateho theida nasopinu teho sopinu nahi; nanu chu Hit mi ahin, chule napa chu Amor mi ahi.

⁴⁶Chule nasopi alenjonu nakhut veilama amale achanute chenga chu Samaria ahin, chule nasopi aneojonu nakhut jetlama chenga chu Sodom le achanu teho ahiuve.

⁴⁷Ahijeng vangin nangman amaho lampiho najuipon, amaho thet umtah ahinao jong nabolpoi. Ahivangin hichu thilneo khat bangin, nalam lhah ho jouse-a amaho sangin gamchengin suhboh-in na-ume.

⁴⁸Keima kahing jinge, tin Pakai Pathen'in aseije, nanaonu Sodom le achanuten jong nangle nachanuten nabol tobang lomin abolpouve.

⁴⁹Ven, hichehi nasopinu Sodom khangitlouna ahi, kiletsah, nehle chah ninglhing set, chule thasetna dimset chu amale achanuteu ho-a anaumin, chujongle vaichate le ngaichate khut chu anahatsah poi.

⁵⁰Chule amaho akibolthei sah-un, ka-anga thil thet umtah anaboluve. Hijeh chun pha kasah dungjuijin amaho chu kalamangtan ahi.

⁵¹Samaria jengin jong nangma chonset naho keh khat jong anabolpon; ahinla nangman thet umtah nahinaho chu amahoa sangin napunsahtan, chule natohdoh thet umtah nahinnaho jouse-a chun nangman nasopinute them nachan sah-in ahi.

⁵²Nasopinuteho chunga thutan nangma tah-in jong, amaho-a sanga tamjo thet umtah thil nanabol nachonset naho jeh-a jum na chu nakipoh ahi. Amaho nangma sangin adihjouve; henge, nangma kisudongin jong uminlang, chule nasopinute nathemchansah na-a chun jum na kipohtan.

⁵³Keiman amaho asohchan naova, Sodom le achanute sohchana, chule Samaria le achanute sohchan na-a kon kahin lepui kit teng, keiman nasohchanghou chu asohchan naova kona amaho lah-a kahin lepui kit ding ahi.

⁵⁴Chutia chu amaho dinga lhamona nahi tengle, nangman najachatna chu nakipoh ding, chule nanatoh ho jouse-a chu nakisuhdong ding ahi.

⁵⁵Nasopinuteho, Sodom le achanu teho, malaija anachen nao munna ahung kilekit tenguva, chule Samaria le achanu teho malaija anachen nao munna ahung kile kit tengule, chutengle bou nangle nachanuteho malaija nanachen nao munna nakile kit diu ahi.

⁵⁶Ajehchu nasopinu Sodom chu nakiletsah nikho laitah chun nakamin jong nana phapoh pon;

⁵⁷Hichu Syria chanute le akimvela um jouse, nakimvela nangma nahsahlouva nabol Philistine chanuteho-a kon housetna natolai banga, nakhangitlouna kiphondoh masang chu ahi.

⁵⁸Nangman na jonthanhoina le thet naum naho chu nanakipoh tai, tin Pakaiyin aseije.

⁵⁹Ajehchu Pakai Pathen'in hitin aseije; kihahselna nanahsah louva kitepna nasuhkeh jeh-a, nangin nabol bang banga ken jong kahinbol ding ahi.

⁶⁰Hijeng jongle keiman nakhangdon laija nangma toh kitepna kanei chu kahingeldoh ding, chule nangma-a dinga tonsot kitepna katundoh ding ahi.

⁶¹Chuteng nangman nachunga le nanoija nasopinuteho chu nakisan tengle, nachon danho chu nahin geldoh-a najachat ding ahi. Chule keiman amaho chu nachanute hidinga kapeh ding, nakitepna jeh-a vang hilou ding ahi.

⁶²Chule keiman nangma toh ka kitepna katundoh ding; chutengle nangman keima Pakai kahi nahinhet ding,

⁶³Chutia chu keima nanatoh ho jouse jala kalungdam teng, nangman nageldoh-a najah chading, chule najachat jeh-a nakam nakahkit louhel ding ahitai, tin Pakai Pathen'in aseije.