Read Thado Chin Ezekiel 17 Bible Online

Ezekiel 17 - Thado Chin bible

Ezekiel 17

¹Chuin Pakai thu chu kahenga ahungin, hitin ati,

²Mihem chapa, hetmo thu phongdoh-in, chule Israel insung henga thulem khat seipeh-in.

³Chule Pakai Pathen'in hitin aseije tin seijin; Lhaving lentah nei muvanlai lentah, lhaving saotah, amul dimset, vouso tintang nei khat Lebanon'a ahungin, chule Cedar thing bah sangpena chun ahung toutai.

⁴Aman hiche thingbah leh adonglai chu achu tanin, chule hichu sumkol veina gamsung khatna apolutnin; sumkolvei ho khopi khat sunga aphuttan ahi.

⁵Aman agamsoh muchi khat jong alan, chule hichu ga tamtah so na loulai khatna atu-in; aman hichu twipiho panga akoijin, chule huisum thing khat bangin aphutnin ahi.

⁶Chuin hichu ahung khangin, abahho ama henglama kikho-a, chule ajungho ama noija jam lengpigui nemcha ahung hitan, hitichun lengpigui ahung hi-in, chule bahho ahin neijin, chule adonho ahin sodoh-in ahi.

⁷Lhaving lentah le mul tamtah nei muvanlai lentah dang khat jong aumin, chule ven, akiphuna gamsung twilamho-a kon atuichap theina dingin, hiche lengpigui hin amapa lam ngan abahho aloi onin ajamlutsah-in, chule abahho jong amapa lam ngan akikhosuh-e.

⁸Hichu abahho ahungjam doh theina dingle, aga ahung umdoh theina ding, chule lengpigui pha ahunghi theina dinga, twipiho panga loumun phalaija kiphutna ahi.

⁹Nangman gaseijin, Pakai Pathen'in hitihin aseije; hichehi khangtou ding hinam? Aman hichu agopna dinga ajungho chu abodoh-a, chule aga jong chu apul lhahsah lou ding ham? Hiche ama-a dondoh anaho jouse chu goplha ding, ajung geija bodohna dinga, thaneina lentah le mi tamtah ngailou ding ahi.

¹⁰Henge, vetan, kiphut jongle lolhing nantem? Solam huijin ahin semkhah teng gop lhahel jenglou ding ham? hichu akhandohna honsunga chu goplha ding ahi.

¹¹Chukal valin Pakai thu chu kahenga ahungin, hitin ati,

¹² Tun kiphinjing insung henga hitihin seijin; Hiti thil hohin ipi aseina ahi nanghon nahet uvem? Amaho seipeh in, veuvin, Babylon lengpa chu Jerusalem'a ahungin, chule chuche mun'a lengpa le pipuiho chu amanin, amato lhonin Babylon'a gal hingin akaitai.

¹³Chule lengpa chilhah chu akaijin, amato kitepna asemin, ama chu akihahselsah-in, chule aman gam sunga thahat ho jong akai mangin ahi.

¹⁴Chutia chu lenggam chu kisunema, achama kiphong dingthei talou ding, aman kitepna anit jala bou dingthei ding ahi.

¹⁵Ahinla aman, amahon sakol ho le mi tamtah apeh theina dingun apalaiho Egypt'a asol lutnin, ama chu adoutan ahi. Ama chu akhangtou nadem? chutobang thilho bola amachu hoidoh nantem? ahiloule huhdoh-a aumna dingin kitepna chu asukeh dem?

¹⁶Pakai Pathen'in aseije, Keima kahinjing bangin, tahbeh-in akihahselna nahsah louva akoija, akitepna asuhkehpa, ama lenga anasem lengpa chenna mun'a chu, amatah chutoh Babylon lailung tah-a chu thitei ding ahi.

¹⁷Amahon mitha nadinga molsang banga kulbang asetnuva, pal akai tengule, Pharaoh'in agalsat sepai mihat hole mihonpi tamtah toh gal kisatna-a chu ima abolthei lou dingu ahi.

¹⁸Aman kihahselna i-sah louna-a kitepna asuhkeh-a, chule vetan, aman akhut alapma hitiho jouse abol jeh-a hi, ama hoidoh louhel ding ahi.

¹⁹Hijeh chun Pakai Pathen'in hitin aseije; Keima kahinjing bangin, tahbeh-in kaki hahsel na aman i-sah louva abola, kakitepna asuhkeh ahin, keiman amatah lujang kalethuh ding ahi.

²⁰Chule keiman achunga ka lenthang kajal-a, kathanga ohding, chule keiman ama Babylon kahinlhut ding; chuteng hia chu asuhkhelna, keima dehna-a asuhkhelna thua ama chu kakihoupi ding ahi.

²¹Chule amite jamleho jouse chu ama loiho chutoh chemjam'a loudingu, chule amaho aum nalaiho chengse chu hui nunna lam jouse-a kithecheh dingu; chutengle keima Pakaiyin kaseisa ahi ti nahet dingu ahi.

²²Pakai Pathen'in hitin aseije; Keiman Cedar thingphunga kon abah sangpen chu kalah-a, chule kaphu ding; ajih donho dongset khat kasilhah-a, hichu lhangsang akichoilai khatna kaphu ding ahi.

²³Israel molsang chunga hichu kaphu ding, hichun bahho hinsepdoh intin, ga ahin neija, Cedar hoitah hung hiding; chule anoija chu lhavingnei vacha namkim chenga, abahho lima chu cheng ding ahiuve.

²⁴Chule gama thingphung ho jouse chun, Pakai keiman thingphung sang chu kaloilhun, thingphung nem chu katung sangin, thingphung hing chu kagotlhahsah-in, chule thingphung go chu kahindohsah-e, ti ahin het dingu ahi. Pakai keiman kasei ahitan chule kabol ahitai.