Read Thado Chin Ezekiel 18 Bible Online

Ezekiel 18 - Thado Chin bible

Ezekiel 18

¹Pakai thu chu avelin kahenga ahungin, hitin aseije,

²Nanghon Israel gamsung chungchanga naman chah-u thuchih, Paten lengpithei thuh aneovin, chate aha ajai kitihi ipi natinao ham?

³Keima hinjing kahijeh-in, nanghon Israel sunga, hiche thuchih manchahna phat naneikit louhel dingu ahitai, tin Pakai Pathen'in aseije.

⁴Veuvin, hinkho jouse chu keija ahi, mipa hinkho keija ahibanga, chapa hinkho jong keija ahi; chonset bolla hinna chu thitei ding ahi.

⁵Ahinla mikhat chu achondih-a, chule thilpha le adih abola,

⁶Chule molsang ho chunga ima nelouva auma, Israel insung semthu limho jong amit teni-a khoda-a ve louva, a-inhengpa ji jong asuhboh louva, numei thichelai jong aganai louva,

⁷Koimacha sugenthei louva, amavang abatpa henga athiltun alepeh-a, hunama koima achom louva, gilkelte achanglhah apeh-a, chule sagohkeo chu pon akhu-a,

⁸Athoi dinga sumpa homlouva, apung jong lalouva, khangitlouna-a kona akhut atuhtanga, mihem le mihem kah-a thutan lhahna dihtah atohdoh-a,

⁹ Kadan kisun ho ajuija, chule kathutanho adihtah bolna dinga anitna ahile; ama chu midih ahin, hingtei ding ahi, tin Pakai Pathen'in aseije.

¹⁰Amapa chun chapa khat ahina, achapa chu gucha michom, thisanso hat ahi-a, chule hicheho lah-a hitobang khat penpen abola ahile,

¹¹Chule chutobang tohding dolho khat chabeh tonglouva auma, amavang molsang chung dunga ima aneh-a, chule a-inhengpa ji asuhboh-a,

¹²Vaicha le lhasamte asuhgentheija, hunama mi achoma, thil kitung lepehlouva, chule semthu limho chu amittah ngeija vea chun thet umtah chu abol ahin,

¹³Athoi dinga sumpa ahopma, apung akilah-a ahileh; ama chu ahing nadem? Hinglou helding ahi; aman hiche thet umtah ho jouse aboltan; ama thitei ding; ama thisan chu ama chunga chuding ahi.

¹⁴Tun, veuvin, aman chapa khat neihenlang, achapa chun apan abol chonsetna ho jouse muhen, hichu ngaitohen, chule chutobang chu bolda henlang,

¹⁵Molsang ho chung dunga ima nelou, amitna jong khodah-a Israel insung semthu limho velou, a-inhengpa jinu suboh lou,

¹⁶Koima jong sugentheilou, thil kitung jong itcha lou, hunama jong mi chomlou, achanglhah gilkel le lhasamte pejo-a, sagohkeote ponsil pe-a,

¹⁷Vaichate-a kon akhut tima, sumthoi homa chule apung jong lalouva, kathutan atohdoh-a, kadan kisunho ajopma ahile; ama chu apa khangitlou jeh-a thilou ding, ama chu tahbeh-a hing ding ahi.

¹⁸Apa thudol ahile, aman engsetah-a anasuh gentheija, asopipa hunama anachoma, chule amite lah-a aphalou anabol jeh-a chu veuvin, amatah chu akhangit louna-a thitei ding ahi.

¹⁹Ahijengvangin nanghon, i-atile chapan apa khangitlouna apohlou ham? tin naseijuve. Chapa chun dandunguija adih chu abola, kadan kisemho jouse achintupma hicheho chu abolteng, ama tahbeh-a hing ding ahi.

²⁰Chonset bola hinna chu thitei ding ahi. Chapan apa khangitlouna apoh louhel ding, panjong chapa khangitlouna chu apoh louhel ding ahi. Chonphat nachu chonphapa chunga umding, chule agiloupa gitlouna chu ama chunga umding ahi.

²¹Ahivangin agiloupa chu aman anabol achonsetnaho jouse-a kona ahung kileheija, kadan kisun ho jouse anitna, thilpha le adih chu abola ahile, ama hing teitei ding, thilou ding ahi.

²²Chule aman anabolsa suhkhelna ho chu, ama henga kiphapoh louding ahin; aman anabolsa chonphatna-a chu hing ding ahi.

²³Keiman migilou athi ding chu kakipapi dingham? amavang ahina dinga achena lampiho-a kona ahungkile kit ding johchu kakipana hilouham? tin Pakai Pathen'in aseije.

²⁴Amavang michonpha chu achonphatna-a kona akiheimanga, setna abola, agiloupa thilbol thet umtah ho jouse chu abola ahile, ama hingin tem? Aman anabolsa chonphatna ho jouse chu kiphapoh talou ding ahi. Suhkhelna-a anabol suhkhelna leh chonset na-a anabol chonsetna jeh-a, ama thitei ding ahi.

²⁵Achutijeng vangin nanghon, Pakai lampi chu akibangpoi, nati uve. Tun ngaijun, Vo Israel insung, Keima lampi kibanga hilou ham? nangho lampijoh hilouham akibang louva chu?

²⁶Chonpha khat chu achonphatna-a kona akihei manga, chule khangitlouna abola, chua chu athi dena ahile; khangitlouna anaboldoh jeh-a chu ama thia ahi.

²⁷Chujongle, migilou khatnin gitlou anabola kona ahung kihei manga, thildih le apha chu abola ahile, aman ahinna akihuhhing ding ahi.

²⁸Ajehchu ama kingaito-a, anabolsa sukhelna ho jouse-a kona akiheimanga ahin, ama tahbeh-a hingtei ding, thilouhel ding ahi.

²⁹Achuti vangin Israel insung chun, Pakai lampi chu akibangpoi atiuve. Vo Israel insung, Keima lampiho kibanga hilouham? Nangho lampijoh hilouham akibang louva chu?

³⁰Hijeh-a chu, Vo Israel insung, mitin achonna dungjui cheh-a athu-u katan ding ahi, tin Pakai Pathen'in aseije. Nalung heijun, nakhangitlou naova konin nangho le nangho kihei mangun, chutile chu setna chu namanthah nao hilouding ahi.

³¹Khan gitlouna nabolho jouseu nangho-a konin paimangun; chule lungthah le lhagao thah kengun, ajeh chu ipidinga nathi jeng diuham? Vo Israel insung.

³²Ajehchu athipa thina-a chunga chun kipana kaneipoi, tin Pakai Pathen'in aseije. Hijeh chun kiheijun lang hinnan neijun.