Read Thado Chin Ezekiel 19 Bible Online

Ezekiel 19 - Thado Chin bible

Ezekiel 19

¹Chujongle nangman Israel pipuiho dingin ka la bolin lang,

²Chule seijin, Nanu chu ipi ham? Keipi bahkai nu ahin; keipi bahkai ho lah-a akolin, keipi bahkai chalgol ho lah-a anoute avah-in ahi.

³Aman anoute lah-a khat avahdoh-in; keipi bahkai chalgol ahung hitan, samatje ahinhetan, mihem ahin thattan ahi.

⁴Namtinin ama thu aja taovin; ama chu akokhuh uva matnin aumin, chule amahon akihena thihkhao pumin Egypt gam alhut taove.

⁵Tun keipinu chun angah-in, akinepna abeitai ti amu phatnin, aman anouho lah-a achomkhat alakitnin, keipi bahkai chalgol-in asemtai.

⁶Chuin ama chu keipiho lah-a atouche asuhchen, ama keipi bahkai chalgol ahung hitan, samatje ahung themin, chule mihem ahin that tan ahi.

⁷Aman akamhel aleng inpihou chu ahen, aman akhopihou chu manlou asotan; chule gamsung le asunga cheng dimsetho chu akitum gina chun akamheltai.

⁸Chujouvin namtin chun lam tina konin ama ahindouvun, alenthangu chu ama chunga ahinjah taovin, ama chu akokhuh uva amantaove.

⁹Chule amahon thihkhaova akanun, ahentupmun, Babylon lengpa heng ahin lhutnun: a-awgin chu Israel molsang ho-a akijah kitlouna dingin, amahon ama chu kotong sunga ahentauve.

¹⁰Nanu chu twi panga kiphut, nathisana um lengpigui tobang ahin, twi tamjeh-in amanu aga aphan, abah jong tamtah ahi.

¹¹Chule amanun vaihomna leng tenggol dingin mol tahbet khat aneijin, chule amanu sanje chu thingbah tamtah lah-a dopsangin aumin, amanu sandan chu abah tamtah ho chuto ahung kilahdoh than ahi.

¹²Ahijeng vangin amanu chu lungsat na-a bodoh-in ahung umin, amanu chu tolla selhah-in ahung umtan, chule solam huipin aga chu agotlhah sahtai. Amanu mol tahbet chu akisu bongin, agoplhan meikouvin akavamtai.

¹³Tunvang amanu chu gamthipma, gamgole dangchah na gam leisetna akiphut tan ahi.

¹⁴Chule amanu bahho lah-a mol khatna konin meikou ahungdoh-in, hichun agaho akavamtan; chuti chun amanun vaihomna tenggol ding mol tahbet aneitapoi. Hichehi kala ahin, chule kala khat hung hiding ahitai.