Read Thado Chin Ezekiel 20 Bible Online

Ezekiel 20 - Thado Chin bible

Ezekiel 20

¹Chuin kumsagi lhinna alha ngana nisom lhinnin ahung hitin ahi, Israel upaho lah-a konin loikhat Pakai henga thudoh nei dingin ahunguvin, ka-anga atouvun ahi.

²Chujouvin Pakai thu chu kahenga ahungin, hitin aseije,

³Mihem chapa Israel upaho henga seipeh-in, chule amaho henga seijin, hitihin Pakai Pathen'in aseije; Nangho keima dongdinga nahungu ham? Keima kahinjing bangin, tin Pakai Pathen'in aseije, nangho thudoh le-a kaumlou ding ahi.

⁴Nangman amaho thu natan dingham, mihem chapa, nangman amaho thu natan dingham? Apu apateho thet umtah thilbolho chu amaho hetdohsah-in lang;

⁵ Chule amaho henga seijin, Pakai Pathen'in hitin aseije; Keiman Israel kalhena, Jacob insung chilhah henga kakhut kadopsanga, Egypt gama Keima amaho henga kakihetsah-a, ahenguva kakhut kadopsanga, keihi Pakai na Pathen'u kahi tia kasei nikho,

⁶Chuche Egypt gama kona hinpuidoh-a amaho dinga kavetpehna gam, khoiju le bongnoi lona gama, gamjouse loupina-a chu amaho puilut dingin ahenguva kakhut kadop sang nikho;

⁷Hiche nikho chun keiman ahenguva, Mitinin namitmu uva thet umho paimang uvin, chule Egypt gam milim ho-ah kisuboh hih-un, keima Pakai na Pathen'u kahi, tin kanaseije.

⁸Ahinla amahon eina douvun, chule kathu angaipouve. Amaho mitinin amitmuva thet umho anapaimang pouvin, Egypt gam milimho jong adalhadeh pouve. Hichun keiman Egypt gam lailung tah-a, achunguva kalunghana kamolso nadingin achunguva kalungsatna bung lhange, tin kaseijin ahi.

⁹Ahinla aumpihou Pathen heloute, Egypt gama kon kahinpuidoh uva kona ahenguva kakihetsahna miho anga kamin suhboh-a aumlouna dinga, kamin jala kanabol ahi.

¹⁰Hijeh-a chu keiman amaho Egypt gama kona kapotdoh sah-a, gamthip sung kahinlhut ahi.

¹¹ Chule keiman kadan kisunho amaho kanapen, chule kathutanho kanavetsah-in, hichu min abola ahile ama chu hingding ahi.

¹² Chukalvalin, keiman amaho suthengpa Pakai kahi ahet theina dingun, keima le amaho kah-a melchihna khat hidingin kacholngah nikhoho kanapen ahi.

¹³Ahinla Israel insung chun gamthipma keima einadouvun; mihemin hichu abola ahile, chuche-a chu ama hing ding ahi tia kanasei, kadan kisunho ajui pouvin, kathutanho angaisah pouvin; chule kacholngah nikhoho chu hatah-in asuboh-un ahi. Chuin keiman gamthipma amaho sugam dingin kalungsatna achunguva bung lhange kanatin ahi.

¹⁴Alah uva kon kahin puidohna Pathen hephalou mite mitmu-a kamin suhboh-a aumlouna dinga, kamin jala na katoh ahi.

¹⁵ Achuti vangin, keiman amaho kanapeh gam jouse lah-a gam loupi, khoijule bongnoi lonna gam chu kalhut louna din gamthipma kakhut kanadom sangin ahi.

¹⁶Ajehchu amahon kathutanho anahsah pouvin, chule kadanthu kisunho ajuipouvin, amavang kacholngah nikhoho asubohtauve. Ajehchu alungsungun amilimhou nung ajuitai.

¹⁷Hijeng jongle, kamitnin suhmangna dinga konin amaho anahoidoh-in, gamthip jenga jong chun kana subei pouve.

¹⁸Amavang gamthipma chun achateu henga hitin kanaseije, Nanghon napu napateu dan kisunho chu juihih beh-un, athutanhou jong nit hih-un, asemthu milimhouva jong kisuboh hihbeh-un

¹⁹Keima Pakai na Pathen'u kahin, kadan kisunho-a chonun, kathutanho nitnun lang bolun,

²⁰Chule kacholngah nikhoho jabolun, hiho chu keima le nangho kah-a melchihna khat hiding, chutia chu nanghon keima Pakai le na Pathen'u kahi nahet dingu ahi, kanati.

²¹Ahijeng vangin achateu keima dounan agolkeh-un; mihemin hichu abola ahile, chuche-a chu ama hing ding ahi tia kanasei kadan kisunho-a ajui pouvin, kathutanho angaisah pouvin; kacholngah nikhoho asuboh-un ahi. Hichun keima gamthipma achunguva kalunghana molsona din, amaho chunga kalungsatna bung lhange tin kana seijin ahi.

²²Ahijeng vangin alah uva kon kahin puidohna Pathen hephalou mite mitmu-a kamin suhboh-a aumlouna dinga, kakhut kanatima, na kanatoh ahi.

²³ Keiman amaho Pathen heloute lah-a kasuhcheh nadingle, gamtina kathecheh-na dingin gamthipma jong chun kakhut kanalam in ahi.

²⁴Ajehchu amahon kathutanho anatongdoh pouvin, kadan kisunho anahsah pouvin, kacholngah nikhoho asuboh-un, chule amit houchun apu apateu milimho ajuijun ahi.

²⁵Hijeh chun keiman amaho apha loutah chondan kanapen, chule hinna-a aneilou diu thutan naho kanapen;

²⁶Chule keiman amaho kakamhel sah-a, akhonnale keima Pakai kahi ahetdoh theina dinguvin, naobu phukeh jouse meikou apal galkai sahnao, athilpeh uva chun amaho kasuboh-in ahi.

²⁷Hijeh chun mihem chapa, Israel insung henga seijin, chule ahenguva, Pakai Pathen'in hitin aseije; Napu napa teovin hiche-a hin eina taitomun, khuche-a chun keima dounan suhkhel ananeijun ahi.

²⁸Ajehchu, keiman amaho pehdinga kakhut kadop sangna gamsunga kapuilut phatnun, amahon lhangsang jousele thingphung lentah ho jouse amuvin, chua chun athiltohou chu apeuvin, athilto houva chun eilunghan sah-un ahi. Chua chun amahon agimnamtui hou jong ahalun, chule hia chun donding thilpehho alhei lha uvin ahi.

²⁹Chuin keiman amaho henga, Nagachenao munsang chu ipiham? tin kaseijin, hiche munchu tuni geijin Bamah akiti nalaije.

³⁰Hijeh chun Israel insung jah-a seipeh-in, Pakai Pathen'in hitin aseije; Napu napateu chonna dungsuna nakisuh boh-u hitam? chule thet umtah athilbol hou banga jonthanhoi nabolu hitam?

³¹Ajehchu nathilpeh-u natouva, nachateo meikou napal galkaisah tengule, tuni changeija namilimho uva kisuboh nahiuve. Chuti ahile keima nangho gahdoh ding kahim, Vo Israel insung? Keima kahinjing bangin, tin Pakaiyin aseije, keima nangho dohding kahi louhel ding ahi.

³²Chule nalungsunguva hunglut, Keiho Pathen heloute bang kahi dingu, gamsung miho insung tobang kahi dingu, thingle song kajendiu ahi, natiu chu guilhung louhel ding ahi.

³³Keima kahinjing bangin, tin Pakai Pathen'in aseije; tahbeh-in khut thahat tahle, ban jahdoh-a, chule lungsatna sunlhah to tho-a, nachung uva vai kahomding ahi.

³⁴Chule keiman khut thahat tahle, ban jahdoh-a, chule lungsatna sunlhah totho-a, mipi ho-a kon le, nakithe chehnau gamho-a kona kahinkhop khom ding nahiuve.

³⁵Chule mipi gamthip sunga nangho kahin puilutna, chukoma chu nangho kimaito-a kakihoupi ding ahi.

³⁶Egypt gamthip sunga napu napateu to kanakihou banga, keiman nangho kakihoupi ding nahiuve, tin Pakai Pathen'in aseije.

³⁷Chule keiman nangho mol lhon noi kapalsah uva, chule nangho kikankhomna kitepna sunga kahinpuilut ding nahiuve.

³⁸Chule keiman nalah uva kona doumah bolho le keima douna-a suhkhel ho chu kasuhtheng ding, amaho chu agapemnau gamsunga kona kahin puidoh-a, Israel gam sunga lutlouhel ding ahiuve. Chutengle nanghon keima Pakai kahi chu nahet dingu ahi.

³⁹Nangho vang, vo Israel insung, Pakai Pathen'in hitihin aseije; Cheovin, tunung jongle kasei nangaisah lou dinguva ahile, mitinin namilim cheh gakijenun; tukallin nathilpeh hou le namilim houva chun kamin theng suboh tahih-un.

⁴⁰Ajehchu kamolsang thengtah, Israel sanna molsanga chu, Israel insungho jouse, agamsunga um jousen chuachu eijen dingu ahi. Hia chu keiman amaho kasan ding, nathilpeh hou le nakipehdoh nau gamasapenho, chule nathil thenghou jouse kangeh ding ahi, tin Pakai Pathen'in aseije.

⁴¹Keiman nangho mipi ho-a kona kahin puidoh-a, nakithe chehnau gamho-a kona kakhop khom teng, keiman nagim namtuiju puma kasan ding; chule Pathen heloute angsunga nangho-a suhthenga kaum ding ahi.

⁴²Chule keiman nangho Israel gamsung, napu napateu penge tia kakhut kanadop sangna gam chu kahinlut tengule, nanghon keima Pakai kahi neihin hetdoh dingu ahi.

⁴³Chule hia chu nana kisuhbohnao nalampi hou le nathilbol jouseu nahin geldoh dingu; chule thilgilou nanabol hou jouseu jeh-a nangho mitmu ngeija jong nanghole nangho jong nakikidah dingu ahi.

⁴⁴Chule keiman nakhangitlou nau dungjuija hilouva, nathilbol thenlou jeh-u jong hideh louva, kamin khohsahna jala nachung uva na katoh tengle, vo nangho Israel insung, keima Pakai kahi chu nahinhet dingu ahi, tin Pakai Pathen'in aseije.

⁴⁵Chukalvalin Pakai thu chu kahenga ahungin, hitin aseije.

⁴⁶Mihem chapa, lhanglam maingatnin lang, nathu chu lhanglam sanga phongdoh-in, chule lhanglam gammang dounan gaothu seijin,

⁴⁷Chule lhanglam gammang henga chun seijin, Pakai thusei hi ngaijin, Pakai Pathen'in hitin aseije; Ven, keiman nasunga mei kachokonga, hichun nangma-a thingphung hing tinleh thingphung go tin chu ahalvam ding: meikou deojeju chu kiphelmit louding, lhanglama pat sahlam geija maichang jouse hichun akahvam sohding ahi.

⁴⁸Chule tahsa-a hing jousen Pakai keiman hichu kachokou ahi ti amucheh dingu; hichu kiphelmit louhel ding ahi, ati.

⁴⁹Chuin keiman, Vo Pakai Pathen, amahon keima thudol aseijun, Amapa khun thulem asei hilou ham? atiuve, kati.