Read Thado Chin Ezekiel 21 Bible Online

Ezekiel 21 - Thado Chin bible

Ezekiel 21

¹Chuin Pakai thu chu kahenga ahungin, hitin ati,

²Mihem chapa, Jerusalem lam maingatnin lang, nathu chu muntheng ho lama phongdoh-in lang, Israel leiset dounan gaothu seijin,

³Chule Israel gamsung jah-a seijin, Pakaiyin hitihin aseije; Vetan, nangma kadou nahi, chule kachemjam apaija kona kasadoh ding, nangma-a kona michonpha le migilou kibanga kasatlhah ahi.

⁴Keiman nanga kona michonpha le migilou kasuhbei ding ahitan, hijeh-a chu kachemjam chu apaija kona lhanglama pat sahlam geija tahsa-a hing jouse dou dinga kondoh ding ahi.

⁵Chutia chu tahsa-a hing jousen keima Pakaiyin kachemjam apaija konin kasatdohtai ti ahet dingu; hichu kilekit louhel ding ahi.

⁶Hijeh chun mihem chapa, nangma nakong bong pumin khoisan lang; amitmu uva lhasetah-in khoisan.

⁷Chule hung hiteiding ahi, amahon nahenga ibola nakhoisat ham? ati tengule, nangman, thu jeh ahi, ajehchu hichu hunglhung kon ahitai: lungthim jouse junlha ding, khut jouse joilha ding, lhagao jouse lhasam ding, khup jouse twi banga lhasam ding ahi: ven, hichu ahunge, kimolso tei ding ahi, tin Pakai Pathen'in aseije, tia nadonbut ding ahi.

⁸Pakai thu chu avelin kahenga ahungin, hitin aseije.

⁹Mihem chapa, gaovinlang seijin, Pakaiyin hitin aseije; chemjam khat, chemjam khat akinol hemin, akinotval ahitai.

¹⁰Hichu nasatah-a thagamna dinga kinol hem ahin; aduljetna dinga kinotval ahi. Achutile eihon eltol ibol jing diuham? hichun kachapa tenggol chu thingphung ho bangin ima asahpoi.

¹¹Chule aman hichu choithei ahina dingin, notval dinga apen: hiche chemjam hi mithatpa khutna pehdinga, kinol hema, kinotval ahitai.

¹²Mihem chapa, kapmin lang peng lhuh lhuh-in, ajehchu hichu kamite chunga chuding ahin, Israel pipuiho jouse chunga chuding ahi. Chemjam le tijatnaho kamite chunga chuding ahin; hijeh chun naphei chung bengin.

¹³Ajehchu hichehi patepna ahin, chemjam chun tenggol jengjong chu i-asah loule iti tantem? chemjam chu umlou ding ahitai, tin Pakai Pathen'in aseije.

¹⁴Hijeh chun mihem chapa, gaovin, nakhut teni chu bengton, chule athumvei nan chemjam ajatni hisah-in, mithana chemjam chu: hichu akithat milenho chemjam ahin, achangvalu indan sunglama lut chu ahi.

¹⁵Keiman alungu lhahsamna dingle, amanthah nau punsahna dingin, chuche chemjam muhhemho chu akotpihou dou dingin kaphutne: O! hichu duljetna kisema, mithana dinga kichuntup ahitai.

¹⁶Nangma lampi khat ahiloule adang khatna, jet lam hihen vei hijongle, namaijin angatna lamlama chetan.

¹⁷Keijong kakhut votongting, kalungsatna kingahsah tange; Pakai keiman kasei ahitai.

¹⁸Pakai thu chu kahenga ahung kitnin, hitin aseije,

¹⁹Mihem chapa, nangman Babylon lengpa chemjam ahunglhun theina dingin, lampi ni semdoh-in; hichu gamkhatna kona hungdoh hiding ahi; chule nangman lampi komuna khat semin, khopi sungjotna lambul tah-a chun semin.

²⁰Ammon mite kho Rabbath, chule aki umkul Judah gam Jerusalem'a chemjam chu ahunglhun theinadin, lampi khat gongin.

²¹Ajehchu Babylon lengpa chu lampi kikhen nalaitah, lampi ni bomtah-a, aisan din anadinge. Aman athalchang ho anotvalin, milimho adongin, sathin chu avetan ahi.

²²Akhut jetlama chun gal lamkaiho pansahna ding, mithana-a kam katna ding, thong jeju-a ao na ding, kotpiho nolhuhnaho koina ding, kulbang setsangna ding, chule galkul khat sahdoh nadinga Jerusalem dinga aisan na aumin,

²³Chule akihahsel ho dinga, amitmuva aisan lhem banga kilang ding; ahia amaho chu kaimanga aum theina dinguva, aman akhan gitlounao ageldoh ding ahi.

²⁴Hijeh chun Pakai Pathen'in hitihin aseije; nanghon nathemmonao geldoh-a naumsah kit jeh uva, hiche-a chu nasuhkhel nahou kihedoh-a, nabol jouseuva nachonset nao kilanga ahitai: Nangho geldoh-a nahung umtah jeh-un, khutna kaija umding nahitaove, tia kasei ahi.

²⁵Chule nang miboh khanggilou Israelte pipuipa, khansetnan kingahna aneiphatna, nanikho hung lhunga ahitai.

²⁶Pakai Pathen'in hitihin aseije, nalal delkop chu ladoh-in lang, nalal lukhuh hohdoh-in; hichehi angai banga umjing louding ahi: anema chu choisangin lang, asanga chu sunemin.

²⁷Keiman hichu kalekhup ding, kalekhup ding, kelekhu ding; achang dingdol hungkahsea umkit talou ding ahi, chule keiman hichu ama kapehdoh ding ahi, ati.

²⁸ Chule mihem chapa, nangma gaovinlang seijin, Pakai Pathen'in Ammon chilhah mite thudolle, amaho seisetna thudola hitihin aseije: Nangmatah in seijin, Chemjam, chemjam chu akisatdoh tai, suhmangna dinga kisuval ahin, hichu mithana dinga kinot duljet ahi.

²⁹Amahon pannabei namupeh uva, doi aithemhon jouva nalhep uva, agilou kithat ho ngonga chuhsah ding nagot laijun, akhansetna houvin kingahna phat ahinnei tan, anikhou chu hunglhunga ahitai.

³⁰Keiman hichu apaija kakile sahkit dingham? Keiman nakisem dohna mun, napen nagama nathu katan ding ahi.

³¹Chule keiman nachunga kalunghimona kasunlhah-a, kalungsatna meikou chu nangma lama kamutkhum ding, chule nangma mi engseho le misumang themho khutna kapehdoh ding nahi.

³²Nangma meikouna dinga kito thinga napan ding; gamsung lailung tah-a nathisan longding: nangma geldoh-a naum kit louding ahi: ajehchu keima Pakaiyin kaseidoh ahitai.