Read Thado Chin Ezekiel 22 Bible Online

Ezekiel 22 - Thado Chin bible

Ezekiel 22

¹Chukalvalin Pakai thu chu kahenga ahungin, hitin aseije,

²Tun nangma mihem chapa, nangman thu natan ding hija, thisan lonna khopi thu natan ding ham? Henge, nangman amanu chu athet umnaho jouse namusah ding ahi.

³Chule hitin seijin, Pakai Pathen'in hitin aseije, Amanu phat ahunglhun nadingin khopi hin alailungtah-a thisan ason, amale ama kisuhbohna dingin amato kidouding semthu limho akisemtan ahi.

⁴Nangma nathisan nasona-a chu themmo chang nahitan, chule nasemthu limho-a chu kisuboh nahitai; chule nanikho ho jong nakisuh naijin, nakumho jengjong ahung lhungtai. Hijeh-a chu Pathen heloute henga seiset le gamsung jouse totnopna-a kasem nahitai.

⁵Nangma kom naija umho le gamla umhon, aminse-a le hesohna-a dim banga nanuisat dingu ahi.

⁶Vetan, Israel pipuho, thisan sona thahat neijouse chu nangma-a um ahiuve.

⁷ Nangma-a chun amahon nu le pate anoiseuvin, nalailung tah-a maljinho asugentheijun, nangma-a chun pabei le meithai chu asulung gimun ahi.

⁸ Nangman kathil thengho nanahsahpon, kacholngah nikhoho nasuboh-in ahi.

⁹Nangma-a chun thisan sona ding thupole ho aumun, nangma-a um molsang ho chunga chun aneuvin, nalailung tah-a chun jonthanhoi abolun ahi.

¹⁰ Nangma-a chun apateu sagohkeo hina ahohdoh-un; nangma-a chun numei boh kikoidoh hojong asuboh taove.

¹¹Chule khatnin a-inhengpa inneipito thet umtah abolun; adang khatnin jonthanhoi thet umtah-in amounu asuhboh tan; chule nangma-a chun adang khatnin asopinu, apa chanu asusen ahi.

¹² Nangma-a amahon thisan sonadin thilpeh alauvin; nangman sumthoi nahomin apung nakilah-in, chule nangman papse tah-in suhgenthei tothon na inhengpa-a nalah peh-in, keima neisumil tai, tin Pakai Pathen'in aseije.

¹³Vetan, hijeh-a chu keiman lamdih louva nanalambe hole, nalailung tah-a thisan kisoho chu kakhut kajel khumin ahi.

¹⁴Keiman nangma kabolchah nikho teng nalungsungin athoh jouva, nakhut teni chu hatjou ding hinam? Pakai keiman hichu kasei ahin, chule hichu katohdoh ding ahi.

¹⁵Chule keiman nangma Pathen heloute lah-a kathecheh-a, gamsungho-a kacheh chao sah ding, chule nanga kona nathenlounaho chu kasuh mangding ahi.

¹⁶Chule nangmatah in nagou chu Pathen heloute mitmu-a nakilah ding, chule nangman keima Pakai chu kahi nahin hetdoh ding ahi.

¹⁷Chuin Pakai thu chu kahenga ahungin, hitin aseije,

¹⁸Mihem chapa, Israel insung chu keima dingin thih eh ahung hitai. Amaho abonchauvin lhum lailung tah-a um sum eng, langva, thih chule ngen ahitaove. Amaho chu dangka eh ahiuve.

¹⁹Hijeh chun Pakai Pathen'in hitin aseije; nangho nabon chaova thih eh nahitah jeh-un, veuvin, hijeh-a chu keiman Jerusalem lailung tah-a nangho kachopkhom ding nahiuve.

²⁰Amahon dangka, sum eng, thih, ngen chule langva, lhumsunga achunga mei amutnuva hichu suhjun dinga achopkhom banguva; chutia chu keiman kalunghan nale kalungsatna-a chu nangho kachopkhom dingu, chule keiman chua chu nangho kadalhah den dingu, kajunlhah sah dingu ahi.

²¹Henge, keiman kachom khom dingu, nachung uva kalungsatna lhummei chu kamut am ding, chule hiche sunga chu nangho najunlhah dingu ahi.

²²Lhummei lailunga dangka ajunlhah banga, chuche lailunga chu nangho najunlhah dingu; chutengle nanghon Pakai keiman nachung uva kalungsatna kasunlhah ahi chu nahet dingu ahi.

²³Chuin Pakai thu chu kahenga ahungin, hitin ati,

²⁴Mihem chapa, amanu henga seijin, nangma lunghanna nikho-a achunga go jengjong julou, suhthenglou gam chu nahije.

²⁵Keipi bahkaijin anehding abotela akitum bangin, amanu lailunga themgaoho lah-a guhthim thilgon aumin; amahon hinna ho aval lhumun, haonaho le thil lutahho alauvin; chuin amahon amanu lailung tah-a meithai tamtah asemdoh uve.

²⁶ Amanu thempuhon keima dan asukeh uvin, kathil thengho asuboh-un; amahon atheng le athenglou akhen pouvin, angim le anen jong akhen pouvin, chule kacholngah nikho ho-a konin amitnu aselmangun, alah uva suhboh-in kaumtai.

²⁷Amanu lailunga pipuiho chu thisan sodingle, hinna ho sumang ding, chule alamlouva neibe nadingin, aneh dingu bottela ngeihon abangun ahi.

²⁸Chule amanu themgaoho chu chilminlou leinganin akijutnuvin, pannabei jeng amuvin, jouvin ai asanpeh uvin, Pakaiyin aseilou jongle, Pakai Pathen'in hitihin aseije, atiuve.

²⁹Gamsung mipi ho chun suhgentheina amang chaovin, guchat michom abolun, vaicha le lhasamho chu asugimun; henge, amahon dihlou tah-in gamchom miho asugenthei jiuvin ahi.

³⁰Chule gamsung chu kasuhmang louna dingin, amaho lah-a khattou apal gending le, kamasanga gam huhna-a aonglaija dingding kanaholin, hinlah koima kana mujoupoi.

³¹Hijeh chun kalung himona achunguva kasunglhan; kalunghana meikonga amaho kasumangin; achonnau dungjuija lethuh nachu achunguva kapeh ahitai, tin Pakai Pathen'in aseije.