Read Thado Chin Ezekiel 23 Bible Online

Ezekiel 23 - Thado Chin bible

Ezekiel 23

¹Pakai thu chu kahenga ahung kitnin, hitin aseije,

²Mihem chapa, numei ni aumin, minu khat chanu ahilhone.

³Amanin Egypt'a jonthanhoi anabol lhonin, akhangdonlai lhonin jonthanhoi anabol lhone; hia chun anoi lhon ameh peh-un, nungah theng ahilhona anoimuh hon chu ameh peh-un ahi.

⁴Chule amani min chu alenjonu Aholah ahin, chule asopinu chu Aholibah ahi; amani chu keija ahilhonin, amanin chapate le chanuteho anahing lhone. Amin lhon chu hitihi ahi; Samaria chu Aholah ahin, chule Jerusalem chu Aholibah ahi.

⁵Chule Aholah hi keija ahi laijin noti'n anapangin, chule amanun aheng akom Assyria miho akingaipin;

⁶Amaho ponduma kivon gal lamkaiho le vaihomho, deichat umtah gal hang sakol chunga tou, sakol touthemho sakol chunga tou ngen ahiuve.

⁷Hitichun amanu chu amaho, Assyria lhendoh tum miho, chule akhohsahho jouse chutoh jonthanhoi anabolin; Alim semthuhou jouse-a chun amanu ana kisuboh tai.

⁸Amanun Egypt'a ahin kondohpi ajonthanhoina chu apailhadeh poi: ijeh-inem itile amanu chu akhangdon laija amahon ana luppiuva, anungah theng hina anoi teni amehpeh uva, chule ajonthanhoinao chu amanu chunga ana buhlhah-u ahi.

⁹Hijeh-a chu keiman amanu chu akingaipiho khutna kapehdoh ahitan, akhohsah Assyria mite khutna kapehdoh ahitai.

¹⁰Hiteho hin amanu sagohkeo chu ahoh lha uvin; achapate le achanu teho chu akilah-un, amanu chu chemjamin athat taove. Chutichun amanu numei lah-a ahung minthang tai; ajehchu amanu chunga thutanlhahna aneiju ahitai.

¹¹Chule asopinu Aholibah chun hichu amu nungin, amingaina chu asopinu-a sangin akhoh cheh-in, chule asopinu jonthanhoina sangin amanu jonthanhoina chu akhohcheh-in ahi.

¹²Amanun aheng akomho Assyria mite, vethoi tah-a kivon lamkaiho le vaihomho, sakol chunga tou sakol touthemho, deidei um gollhangho jouse chu angaichan ahi.

¹³Chujouvin amanu suhboh-a auma, anilhona lampi khat ajuihon kanamui.

¹⁴Chuin amanun pasal ho lim banga kitah, Chaldea miho lim bangchunga sanpeh-a kijih-a amu phatnin, ajonthanhoi naho apunsahbe cheh-in,

¹⁵Amahon ataija konggah akigah cheh-un, alu-a delkop hoitah akikop cheh-un, apennau Chaldea gam Babylon miho umdan dungjuija amaho gahvet dinga pipuiho mel pucheh ahiuve.

¹⁶Amanun amaho amit teni-a agahmu mu chun, achunguva ngaichatna aneipai jengin, chule Chaldea gamsunga amaho henga thupo ho asoltan ahi.

¹⁷Chule Babylon miho chu amanu henga ahungun kingailutna jalkhuna alut uvin, amahon amanu chu ajonthanhoinao vin asuboh uvin; chuin amanu chu amahoto suhboh-in aumin, chule amanu lunggel chu amaho-a konin khendoh ahitan ahi.

¹⁸Hitichun amanun ajonthanhoina le sagohkeo ahina ahohdoh tan; hichun kalunggel asopinu-a kona khendoh-a anaum bang bangin, amanu-a konin khendoh-in aumtan ahi.

¹⁹Achutijeng vanginla, amanun akhangdonlai nikhoho, Egypt gama noti'a anakicheplai chu agahgeldoh kitnin, ajonthanhoina ho apunsah cheh-in ahi.

²⁰Ajehchu amanun adongmaho, atahsao jong sangan tahsa tobang, chule abotwi ujong sakol botwi tobang ho chu angaicha lheh jengin ahi.

²¹Hitichun nangman nakhangdon laija najon thanhoina le, nakhangdon laija nanoi teni Egypt miten ameh chu nageldoh-in ahi.

²²Hijeh chun, Vo Aholibah, Pakai Pathen'in hitin aseije; Ven, keiman nakingaipiho, nalunggel khendoh-a anaum naho chu nangma dou dinga katundoh ding, chule nangma dou dinga gamkai jouse-a kona kahinpui ding,

²³Babylon miho le Chaldea miho jouse, Pekod, Shoa, Koa, chule Assyria mite jouse toh; abonchauva son umtah gollhangho, gal lamkaiho chule vaihomho, milenho le mi minthangho, abonchauva sakol chunga tou ahiuve.

²⁴Chule amaho nangma doudinga sakol kangtalai ho, thilpo kangtalai ho, kangtalai kangho toh, mihonpi kiloikhom toh hungkon uva, amaho chun lum le pho, chule thih lukhuh atho uva naum kimvel dingu; chule keiman amaho masanga thutanna kapeh ding, chule amahon amaho thutanlhah dungjuija nachung thu atan dingu ahi.

²⁵Chule keiman nangma chunga kathangthipna kachuh sah-a, amahon nangma lunghang tah-a nabol dingu; amahon nanah lhongle nabil teni aloilhah dingu, chule nangma-a ahingdoh umnalai chu chemjam'a louding ahi. Amahon nachapa te le nachanute akilahdiu; chule nangma-a ahingdoh amoh umchengse chu meikouvin avallhum dingu ahi.

²⁶Amahon naponho nahodohpeh uva, chule nasongmantam hoiho nalahpeh dingu ahi.

²⁷Chutia chu nangma amaho heng lama nakhodah louna dingle, Egypt mite jong nageldoh kit tahlou dinga; keiman najon thanhoina chule Egypt gama kona nahinpoh najon thanhoina chu nanga kona kasuhtang ding ahi.

²⁸Ijeh inem itile Pakai Pathen'in hitihin aseije; ven, keiman nangman namuda ho khutna, amaho jeh-a nangma lungsung khendoh-a aumnaho khutna kapehlut ding nahi.

²⁹Chule amaho chun nangma thet umtah-a nahinbol dingu, chule nalodoh jouse nalahpeh dingu, sagohkeo le keohela nahinlha uva: chule najon thanhoina le nahuhna chu agoma sagohkeova kihohdoh ding ahi.

³⁰Keiman hicheho hi nachunga kabol ding ahi, ajehchu nangma Pathen helouho bangin jonthanhoi nabolin, amaho semthu limho-a chun naki suhboh tai.

³¹Nangma nasopinu lampia nachetan, hijeh-a chu amanu khon chu nangma khutna kapeh ding ahi.

³²Pakai Pathen'in hitihin aseije, Nangman nasopinu khon thuhtah le lentah chu nadonjou hel ding, nangma i-sah louva nuisatna chule nahsahmo-a naum ding ahi, hichun tamtah adol ahi.

³³Nangma nasopinu Samaria khon, kidangsahna le thomhaona khona kon, lunggimna le lunghemna nadon ding ahi.

³⁴Nangman hichu nadonna nachep kanghel ding, chule akhon chu teldeh-a nalha ding, chule na noi teni ngeijong chu naloidoh ding ahi. Ajehchu keiman kasei ahi, tin Pakai Pathen'in aseije.

³⁵Hijeh chun Pakai Pathen'in hitihin aseije, Nangman neisuhmila, nanung lama neipaitah jeh-in, nahuhna le najon thanhoi naho nangman kipohtan.

³⁶Pakaiyin kahenga aseibe kitnin, Mihem chapa, nangman Aholah chule Aholibah chunga thu natan ding ham? Henge, thet aumnalhon ho chu phondoh pehtan.

³⁷Amanin jon abol lhonin, akhut lhona thisan aumin, amilim hon hotoh ajonglhonin, chule amanin keima eihinpeh lhon achapatehou jong kahvam sahdin meikong apalsah lhone.

³⁸Chukalvalin amanin hiche jonghi kahenga abolhone: chule hiche nikho mama chun kamun theng asuboh lhonin, kacholngah nikhoho asuboh lhontai.

³⁹Ajehchu amanin achateu alim semthu henga athajou lhon chun, hiche nikho mama chun ahunglhonin ka-intheng asuboh lhonin ahi; chule veuvin, amanin ka-insung laitah-a hitichun abolhonin ahi.

⁴⁰Chubanin jong, gamlatah-a kona pasal ho ahungna dingun, ahenguva thupole khat nasolhonin; chule veuvin, amaho ahunguvin ahi. Chuin amaho dingin nangma nakisil theng selin, namit teni najemin, chule jephoina-a nakijemin ahi.

⁴¹Chule jalkhun guntah khat chunga natouvin, hiche masanga chun dokhang khat nagongin, chule achunga chun nangman keima gimnamtui ho le thao chu natung doh-in ahi.

⁴²Chule khohsahna bei mipi honkhat awgin amanu koma aumuvin; chule akhutnuva chao kibuho chule aluchung uva lallukhuh hoitahtah-a kikhuh gamthipma kona Sebia mite chu milham pasal ho toh ahin puijuvin ahi.

⁴³Chujouvin keiman ajonthanhoi bolna-a tehtasa amanu chungchanga chun, Tun amahon amanu chutoh, amanun amaho chuto jonthanhoi aboldiu vem? kati.

⁴⁴Ahijeng vangin amaho chu noti numei khat henga lut bangin amanu henga alut taove. Hitichun amaho numei huh teni, Aholah le Aholibah henga alut taove.

⁴⁵Chule pasal chonphatah hon amanu chunga numei jongho chondan dungjui le, numei thisanso ho dungjuija athu-u atan dingu ahi; ajehchu amani numei jong ahilhonin, chule akhutlhona thisan abeh-in ahi.

⁴⁶Ajehchu Pakai Pathen'in hitin aseije; keiman mi honkhat amani chunga kahinpui ding, chule amani chu toldoh dingle chomgam dinga kapehdoh ding ahi.

⁴⁷Chule hiche mihonpi chun amani songa ase dingu, chule chemjam'a atha dingu; amahon achapateu le achanuteu athagam dingu, chule a-inhou chu meija ahalvam dingu ahi.

⁴⁸Hitia chu gamsunga jonthanhoina kasuh tanga, najon thanhoina lhon chu ajuilouna dinguva numei ho jouse kihilchah ding ahiuve.

⁴⁹Chule amahon najon thanhoina lhon chu nachung lhona alethuh uva, nalim semthu lhonin chonset naho chu nakipoh lhon ding ahi; chutengle keima Pakai Pathen kahi nahet lhon ding ahi.