Read Thado Chin Ezekiel 24 Bible Online

Ezekiel 24 - Thado Chin bible

Ezekiel 24

¹Avelin, kumko lhinna, alha somna sunga nisom lhinni chun Pakai thu kahenga ahungin, hitin aseije.

² Mihem chapa, nangman nikho min chu jihdoh-in, tuni nikho tah hin jih-in; hiche nikho-a hi Babylon lengpan Jerusalem adoupat ahi.

³Chule golkehjing insung henga thulem khat seipeh-in lang, ahenguva hitin seijin, Pakai Pathen'in hitihin aseije; Belkhat songin, hichu songdoh-in, chule asunga chun twi jong sunglutnin.

⁴Sa halho asunga chun henglutnin, ahal aphalai jouse, apheipi le adahbul ngei chu asunga chun henglutnin; hichu agu phaho-a chun bel chu dip dimin.

⁵Gancha hon lah-a konin deilhen ho chu lanlang, anoija chun aguho chu gouvin, chule hichu phatechan honin lang, hichun aguho chu honsouhen.

⁶Hijeh chun Pakai Pathen'in hitin aseije, thisanso khopi, beltonat asunga umnalai, chule beltonat asunga kona lheidoh loulai chu, ohe ada ahiuve! asunga konin khat khatnin ladoh-in, vang sanin lheng hih-in.

⁷Ijeh-inem itile amanu thisan chu amanu lailung tah-a aumin, hichu amanun songpi khat chunga atungdoh-in, leivuija khu dingin tollah alheilhapoi.

⁸Chutia chu hichun phula dinga lungsatna ahinsodoh sahna ding, chule amanu thisan chu khukhum ahilouna dinga, keiman songpi chunga kalonsah ahitai.

⁹Hijeh chun Pakai Pathen'in hitin aseije; thisanso khopi chu ohe adana-e! keiman nasatah-a meikou ahina dinga thing kasetvum ding ahi.

¹⁰Thing sevumun, mei choh kongun, aphe chu phatechan honun, chule phatechan namtui sah-un, chule aguho chu gouvamun.

¹¹Chutengle hiche sum-eng chu ahungsat doh-a akahtheina ding, chule asunga athenglou chu ajunlhah-a, atonat chu akahvam theina dingin, mei chunga chun belkeo chu songdoh-in.

¹²Amanu jouvin akisuchol tan, chule amanu-a konin atonat nasatah chu apotdohpoi; atonat chu meikouva umden hen.

¹³Nathenlouna-a chun huhna aumin ahi; ajehchu nangma kasuh thengin, hinla nangma nathengpoi, kalungsatna nachunga kangap kahse-a, nathenlouna-a kona nathen kit louding nahitai.

¹⁴Pakai keiman hichehi kasei ahitai. Hichu hung guilhung ding, chule keiman hichu kaboltei ding, kakinungtol louding, khenjong kakhen louding, kisihjong kisih louding, nalampi ho dungjuile na natohho dungjuija amahon nachung thu atantei dingu ahi, tin Pakai Pathen'in aseije.

¹⁵Chujongle Pakai thu chu kahenga ahungin, aseije,

¹⁶Mihem chapa, ven, keiman namit tenin avetnom chu khatvei jepmin nangma-a konin kaladoh tai; hijeng jongle nangma lungjong nalunghem louding, ka jong naka louding, namitlhi jong nalonlhah sah louding ahi.

¹⁷Kap hih-in, athiho dingin lunghem jong bolhih-in, nalukop nalu-a kikopmin, nakengto teni-a nakengchot kisen, nane jong huphih-in, chule mihem anneh jong nehih-in, ati.

¹⁸Hitichun jingkah-in mipi ho henga thu kaseijin, nilhang kaijin ka-inneipi athitan; chule jingkah-in thu eikipeh bangin kaboltai.

¹⁹Chuin mipi chun kahenga hitin aseijuve, hiche nathilbol hohi keiho dinga ipi ahiding neiseipehlou dingu ham? atiuve.

²⁰Chuin keiman amaho kadonbut nin, Pakai thu chu kehenga ahungin, hitin aseije,

²¹Israel insung henga seipeh-in, Pakai Pathen'in hitin aseije; Veuvin, keiman kamun theng, nangho nathahat naloupi nao, namitnun avetnomhou, chule nahinnaovin akhoto chu kasuhboh ding, chule nadalhah-u nachapateo le nachanuteu chu chemjam'a loudingu ahi.

²²Chule keiman kabol bang nabol dingu, nanghon namuh-u nahup loudingu, mihem anneh jong naneh loudingu ahi.

²³Chule nalu chunguva delkop nakikop uva, chule nakenguva kengchot nakise uva, nalunghem loudiu kajong nakalou dingu; ahia nagitlounaova nalhahsuh uva khatle khat nakilunghem to diu ahi.

²⁴Hitia chu Ezekiel hi nangho dinga melchihna ahi; aman abol hojouse dungjui cheh-a nanghon naboltei dingu ahin; chule hichehi ahunglhun teng, nanghon keima Pakai Pathen kahi nahet dingu ahi.

²⁵Chujongle nangma mihem chapa, keiman amaho-a kona athahatnao, aloupi naova akipanao, amit teniu deichat, chule amahon alunggelu kingapna-a aneihou, achapateu le chanuteu kalahmang nikho tengle,

²⁶Hiche nikho-a asohcha chapa chu hunga, nanakhanga nahung jahsah louding ham?

²⁷Hiche nikho chule ahung sohchapa henga nakam kihong ding, chule nangman thu naseidoh ding, chule paomo-a naum kit tahlou ding; chule nangma amaho dinga melchihna khat nahung hiding; amahon keima Pakai kahi ahinhet dingu ahi.