Read Thado Chin Ezekiel 25 Bible Online

Ezekiel 25 - Thado Chin bible

Ezekiel 25

¹ Pakai thu chu kahenga ahung kitnin, hitin aseije,

²Mihem chapa, Ammon mite dounan namai ngatnin lang, amaho dounan gaothu seijin.

³Chule Ammon mite henga seijin, Pakai Pathen thuhi ngaijun; akisuhboh laija nangman kamun theng douna-a, chule akamhel laija Israel gamsung douna, chule gal hinga akikai mang laijuva Judah insung douna-a Aha, tia nasei jeh-in, Pakai Pathen'in hitin aseije,

⁴Ven, hijeh chun keiman solam mite alo diuva nangma kapehdoh teiding, chule amahon nangma insunga aleng inpihou atundoh dingu; nangma insunga achendetna inhou akisah dingu, amahon naga chu aneh uva chule nanoitwi adontei dingu ahi.

⁵Chule keiman Rabbah chu sangongsang ho gena buh, chule Ammon mite ganchaho kolna munkhat kahinso ding ahin; chutengle nanghon keima Pakai chu kahi nahet dingu ahi.

⁶Ajehchu Pakai Pathen'in hitin aseije; Nangman Israel gam douna-a nakhut teni nabeh-a, nakeng teni-a nalho-a, chule nalungthima i-sah louna jousetoh nakipa jeh-in,

⁷Vetan, hijeh-a chu keiman nangma chunga kakhut kajah-a, chule Pathen helouho henga galthil chom dinga kapehdoh ding; chule keiman mipi lah-a kona kasatlhah-a, gamjousea kona kamanthah sah ding; nangma kasuhmang ding; chutengle keima Pakai kahi nahin hetding ahi.

⁸ Pakai Pathen'in hitin aseije; Veuvin, Moab le Seir jengin jong, Judah insung chu Pathen heloute jouse tobang ahi tia, asei jeh uvin,

⁹Hijeh chun, veuvin, keiman Moab khopi jet le vei jouse, khopi sunga gam nomcheh Beth-jeshimoth, Baal-meon chule Kiriathaim-a jong kamhela kalha ding ahi.

¹⁰Ammon mite chu namtin lah-a geldoh-a aumkit louna dinguva, solam mite chu Ammon mite toh alo dinguva kapehdoh ding ahi.

¹¹Chule keiman Moab chunga thu katan ding; chuteng amahon keima Pakai kahi akihet dingu ahi.

¹² Pakai Pathen'in hitihin aseije; Edom'in phulah na-a Judah insung douna abola, hatah-a asuhmoa, ama tah-in achunguva phu alah jeh-in,

¹³Hijeh chun Pakai Pathen chun hitin aseije; Kenjong Edom chunga kakhut kalapma, ama-a kona mi le sa katha gama, Teman kho-a patna kakamhelsah-a, Dedan'a miho chu chemjam'a louding ahiuve.

¹⁴Chule Edom chunga kaphulahna chu kami Israel khutna kangap ding ahin, chule amahon Edom chunga kalunghana le kalungsatna dungjuija aboldingu; chule kaphulahna chu amahon ahet dingu ahi, tin Pakai Pathen'in aseije.

¹⁵ Pakai Pathen'in hitihin aseije, Philistine ten phulahna anaboluva, chule taitomna lunggel totho-a malai kihotna jeh-a susehel khop dinga anakiphulah jeh-un,

¹⁶Hijeh chun Pakai Pathen'in hitin aseije; Veuvin, keiman Philistine te chunga kakhut kajahdoh-a, Cherethim ho chu kasuhtana, twipi panga um amohho chu kasuhmang ding ahi.

¹⁷Chule keiman lungsa tah-a phosalnaho toh tho-a amaho chunga nasatah-a phu kalah ding, keiman amaho chunga phulahna kachuhsah teng, amahon keima Pakai kahi chu ahet dingu ahi.