Read Thado Chin Ezekiel 26 Bible Online

Ezekiel 26 - Thado Chin bible

Ezekiel 26

¹ Chuin kum somle kum khatna, lhasunga ni masapen nin ahung hitin ahi, Pakai thu chu kahenga ahung lhungin, hitin aseije,

²Mihem chapa, Tyre'in Jerusalem douna-a, Aha, amanu mite kotpiho anahisa chu achimlhatai! amanun keilam ahin ngatai: tun amanu kitung thop ahitan, keima kapun theiding ahitai, ati.

³Hijeh chun Pakai Pathen'in hitin aseije; Vo Tyre, ven keiman nangma kodou nahi, twipin twi akinon tousah banga, nangma kidoupi dinga nam tamtah kahin toltou ding ahi.

⁴Chule amahon Tyre kulbang jouse asuhsetnuva, amanu insangho asuhchim diu, keiman amanu-a kona vutvai kaphet thenga, chule amanu chu songpi chungvum tobang kaso ding ahi.

⁵Hichu twipi lailunga lenho kijalna ding mun hung hiding ahi. Ajehchu keiman kaseidohsa ahitai, tin Pakai Pathen'in aseije, chule hichu namtin dinga kivahna hung hiding ahi.

⁶Chule amanu chanute loulaija umho chu chemjam'a kithat gamdiu, amahon keima Pakai kahi ahinhet dingu ahi.

⁷Ajehchu Pakai Pathen'in hitin aseije; veuvin, lengho leng, Babylon lengpa, Nabuchadnezzar chu sakol ho, kangtalai ho, chule sakolchung touho, chule loi tampile mipi tamtah toh lhona sahlam sanga kona Tyre chunga kahinchuhsah ding ahi.

⁸Ama chun loulaija nachanute chu chemjam'a atha ding; nangma douna-a kulpi asahdoh-a, nangma douna-a molsang khat ase sang ding, chule nangma douna-a apho adop sang ding ahi.

⁹Chule aman nakul bangho douna-a gal manchah ho atundoh-a, chule aheichaho-a na insangho aphuh lhuh ding ahi.

¹⁰Ama sakol ho atambehseh jeh-a amaho vutvai chun nangma nakhu khum ding; mihon kohom akisemuva khopi sung alut banguva, ama nakelkot ahunglut tengleh sakol chungtou mihole, kangtalai kangho, chule sakol kangtalai ho hugin-a nakul bangho chu kihot ling ding ahi.

¹¹Asakolho kengin nakhopi lamlenho achotpha ding; aman namiteho chemjam'a atha ding, chule nagalsat miho umna mun dettahho chu chimlha ding ahiuve.

¹²Chule amahon nahaonaho chu akichom diu, nakiveinaho anehmanguva, nakul bangho asuhchimdiu, na in nomtah ho chu asuhset dingu: amahon nasongho, nathingho, chule navutvai ho chu twi lailunga akoidiu ahi.

¹³ Chuteng keiman nalasah ginho kasuhthip ding, chule naselangdah gin chu kijakit louding ahi.

¹⁴Chule keiman nangman songpi chungvum banga kasemding; miho lenthang jalna mun nahiding, sahphatna naum lou ding ahitai; ajehchu Pakai keiman kaphohdoh ahitai, tin Pakai Pathen'in aseije.

¹⁵Pakai Pathen'in Tyre henga hitin aseije; mahapuho apena, nalai lunga mithiho aumtengle, nangma lhuh ginna chu twikolho kihotlou dingu ham?

¹⁶ Chuteng chule twikhanglen'a leng chapate jouse chu alaltounaova kona hung kumlha dingu, chule asangkhol hou akoidoh uva, akijephoinau avonhou chu asutlhah dingu ahi. Amaho chu kithing thinguva tol lhanga tou dingu, chule amaho tanglou hela kihot hot dingu, chule nangma nadatmo dingu ahi.

¹⁷Chule amahon nangma dinga kala aboluva, hitia asei dingu ahi; Itidana twipi chunga lamlhale miho chenna mun, khopi minthang tah, twipi chunga hattah, amale asunga chengho, akimaitopi jouse tijatsah jeng nangma iti kisuhmang nahi hitam!

¹⁸Tu-a nangma lhuhna nikho-a hi twikolho chu kihot hot dingu; chule twipi sunga um twikolho chu nadalhah jeh-a lunggim lheh dingu ahi.

¹⁹Ajehchu Pakai Pathen'in hitihin aseije; keiman nangma chennalou khopiho, akamhel khopi khatna kahinsem teng; keiman twithuh chu kahinlah touva nachunga kahinlhutna, twi lentah ho chun nahinchup teng;

²⁰Chule keiman nangma kokhuh sunga lhalut ho leh, malaija mipi ho toh kapuilhah khoma, kokhuh sunga chelut ho toh thakhatna nangma chenlouna mun nahina dinga, malaija patna anakamdel leiset mun nempena kakoiteng; mihing gama chu loupina kaumsah ding ahi.

²¹ Keiman nangma tijatna khatna kasemdoh ding, chule nangma naum kit tahlou ding ahi; nangma nahung kihol jeng jongle, kimukit louding nahitai, tin Pakai Pathen'in aseije.