Read Thado Chin Ezekiel 27 Bible Online

Ezekiel 27 - Thado Chin bible

Ezekiel 27

¹Pakai thu chu kahenga ahung kitnin, hitin aseije,

²Mihem chapa, Tyre dingin kala gabolin,

³Chule Tyre henga hitin gaseijin, O nangma twipi lutna laitah-a um, twikol tamtah-a chengho dinga kiveina, Vo Tyre, Pakai Pathen'in aseije; nangman, Keima melhoi chamkim kahi, tin naseije.

⁴Nangma gamgi chu twikhanglen lailunga aumin, nasadoh hon nangma melhoi asuchamkim taove.

⁵Amahon nakong lhongho jouse chu Senir gamsung chahthingho ngenin asemun; amahon nangma ding kong khom kitung sangpen ho semna dingin Lebanon'a konin cedar thingho alauve.

⁶Nakong kheho chu Bashan gangpiho-a konin asemun, Ashur mi kiloikhom hon Chittim twikolho-a kona kipodoh saiha mangchan tongkham saoho nasempeh taove.

⁷Egypt'a kona kijempah tupatpon neljet chu nangman nakong ponjal dinga namang chan, Elishah twikolho-a kon pondum le ponsandup chu nangma nakhu-a chu ahi.

⁸Nakong tol ho chu Zidon le Arvad'a cheng miho ahiuvin, vo Tyre nangma sunga um na michingho chu nakong tolho ahiuve.

⁹Gebal'a upalui hole amaho lah-a michingho chu nangma sunga kong thoibit ho ahiuvin; twipia um kong jousele atol ho jouse chu nasumkol veina thilho najohpeh dingin nanga aumuve.

¹⁰Persia le Lud chule Phut miho chu nasipai le nagalsat miho ahiuvin, amahon nangma lumle thih lukhuh navonpeh-un, amahon namel lomna atahlang uve.

¹¹Arvad miho chu nagalsat miho toh nakul bangho chung kimvela aumuvin, chule Gammadim miho chu na insangho-a aumui; amahon alumhou nakul bangho kimvel chunga akhaijun, nangma mel hoina achamkimsah-un ahi.

¹²Haona tincheng; dangka, thih, langva chule ngen atam jal-in Tarshish chu nangma sumkolveina ahin; nangma kailhang-ah akiveijun ahi.

¹³Javan, Tubal chule Meshech, amaho nasumkol vei miho ahiuvin; amahon nasumkol veina thilho toh mihem le sum-eng kongle bel ho alheh-un ahi.

¹⁴Togarmah insunga kon amaho chu nakailhang munho-a sakol ho le sakol chung touho chule sangan hon akiveijun ahi.

¹⁵Dedan miho chu nasumkol veiho ahiuvin; twikul tamtah chu nangma khutna sumkolvei ahiuve. Amahon nangma saiha, sakiho le thinggai thilpeh-in nahinpohpeh-un ahi.

¹⁶Syria chu nangma thilsemdoh tincheng jal-in nasumkol veipa anahin; amahon khisong eng, ponsandup, ponjem kikhuipah, tupat ponnem, song mantam jolsel le song san joh-in nakiveina munho alouve.

¹⁷Judah le Israel gam chu nangma sumkol veiho ahiuvin; amahon nangma kailhanga Minnith le Pannang suhlouchang, khoiju le thao, chule thingnailou namtuijin akiveijuve.

¹⁸Nangma thilsem tam jal, Helbon'a ju le samul kang nahaona jouseho jal-in Damascus chu nangma sumkol veina ahitai.

¹⁹Dan le Javan nakailhang munho lodingin achesuh achetou lhonin; thih valset, thingle aigeju nakailhanga akimue.

²⁰Dedan chu pon lutahho kangtalai ho-a dinga nasumkol vei ahi.

²¹Arabia le Kedar pipuiho jouse chun kelngoiho, kelngoi chalho, chule keltah hon nakailhang alouvin; hiche thilho-a hi amaho nangma sumkol veiho hia ahiuve.

²²Sheba le Raamah'a sumkol veiho chu nangma sumkol veiho ahiuvin; amahon nakailhang ho chu song mantam jousele sana in nakailhang ho alotauve.

²³Haran, Kanneh, Eden, chule Sheba sumkol veiho, Asshur chule Chilmad chu nasumkol veiho ahiuve.

²⁴Hichehohi thil namkim nasumkol veina thilho lah-a pang ahiuve, pondum ho-a, thil kijempah ho-a, cedar thinga kisem, khao hola kikhit, thingkhongho sunga um von lutahho ahi.

²⁵ Tarshish konghon nakailhangah nalachoijun; chule twipiho lailunga nangma nadimset tan, loupitah-a jabolin na-umtai.

²⁶Nakong tol hon twilen sung nahin lhuttan, solam huipin twipi lailunga nasukehtan ahi.

²⁷Nahaonaho, nakailhang ho, nakiveinaho, nakong tolho le nakong jap ho, nakong thoibit ho, chule nasumkolveina thil le loho, nasepai gal hat nangma-a umho, nasunga nakiloipiho jousehi, nakisuhmang nikhoteng twipiho lailunga lhalut soh hel dingu ahi.

²⁸Akimvela miho chu nakongtol ho pen hugin-a kithing thing ding ahiuve.

²⁹Chule kongkhe tuhho jouse, kong jap ho, chule twipi chunga kongtol ho jouse chu, akonghouva kona hung kumlha uva tolla ding ding ahiuve.

³⁰Chule amahon a-awginu nangma douna-a najahsah diu, lhasetah-a penguva, alu chungvum uva leivui athediu, chule leivui lah-a kilih lelediu ahi.

³¹Amaho nangma dinga kivou toluva, khaodip pon akigah diu, lungna tah le lhasetah-a nakapi diu ahi.

³²Amahon kap puma nangma-a dinga kala ahin semuva, nama dinga kala asah dingu, twipi lailunga kisumang Tyre khopi tobang umkha am? tia aseidiu ahi.

³³Nathil semdoh ho twipi ho-a kona akitoldoh teng, mi tamtah nadip dimjin; nahaonaho tamtah le nakiveina thilho chun leiset lengho nahaosahjin ahi.

³⁴Twipihon twi thuhtah ho sunga nahinsuhset tengule, nasumkolveina thilho le nangma lailunga nakiloipiho jouse lhutei dingu ahi.

³⁵Twikol gamho-a chengho jousen nadatmo dingu, alenghou kicha lheh jenguva, amaisouva jong lunggim maiso kilang ding ahi.

³⁶Mipi ho lah-a sumkol veihon nachehsat khum diu, nangma tijat umtah khat nahi-a, chule imatih-a umkit louhel ding nahitai.