Read Thado Chin Ezekiel 28 Bible Online

Ezekiel 28 - Thado Chin bible

Ezekiel 28

¹Pakai thu chu kahenga ahung lhung kitnin, hitin aseije,

²Mihem chapa, Tyre pipuipa henga hitihin seipeh in, Pakai Pathen'in hitin aseije; Ajehchu nalungthim akichoi sangin, keima Pathen kahi, Pathen touna twipiho lailunga katouve tin naseije, ahin nalungthim Pathen Lungthim tobang hisah jongle chun, nangma mihem nahibouvin, Pathen nahipoi;

³Ven, nangma Daniel sangin nachingjon, amahon nangma-a kona aseljouvu thilguh khatcha aumpoi.

⁴Nachihna le nahet themna-in nangman haonaho nakimutan, chule sanale dangka nagouho lah-a nakoitai.

⁵Nachihna sangtah jal le nakiveina jal-in nahaonaho apungin, nahaonaho jeh-in nalungthim akichoisang tai.

⁶Hijeh chun Pakai Pathen'in hitin aseije; Nangman nalungthim Pathen lungthim tobang nahisah jeh-in;

⁷Ven, hijeh-a chu keiman nachunga gamchom mi namtin lah-a tijat umpenho kahin puilut ding: amahon nachihna melhoi kidoupi dinga achemjam asadoh uva, navah emsel chu asuhboh diu ahi.

⁸Amahon nangma kokhuh sunga nasotlut diu, nangma twiho lailunga kithat ho thi banga nathitei ding ahi.

⁹Nathatpa anga chun, Pathen kahi tin seijin natem? ahinla nathatpa anga chu Pathen hilouva mihem bou nahi ding ahi.

¹⁰Gamdang miho khutna cheptan louho thia nathitei ding ahi: ajehchu keiman kaseidoh ahitai, tin Pakai Pathen'in aseije.

¹¹Chubanin jong Pakai thu chu kahenga ahungin, hitin aseije,

¹²Mihem chapa, Tyre lengpa chunga kala bolinlang, ahenga hitin seijin, Pakai Pathen'in hitin aseije; Nangma chamkimna mahor, chihna dimset, hoina chamkim chu nahi.

¹³Nangma Pathen hon Eden'a nana umtan; song mantam jat jouse, songsan, song-eng, song mantam, song engdum, songgel, chule song sanpol, song dum, song engdang, song santhip chule sana in nakitomin; chule nakhongcha le natheile ho akisemdan chu nangma nakisem nikho-a nangma-a kigonga ahitai.

¹⁴Nangma akhukhuma pang thao kinu chu nahin; chutia chu katundoh nahi; nangma Pathen molsang theng chunga nana umin, meisong lah-a nachesuh nachetou vin ahi.

¹⁵Nangma nakisemdoh nikho-a pat, nangma-a themona akimudoh kahsen, nalampi ho-a chamkim nanahin ahi.

¹⁶Nasumkol veina thilho tamjeh-in hicheho chun nasunggil chu hunamin adipmuvin, nangma nachonse tai. Hijeh-a chu, Vo akhukhuma pang Cherub, nangma thilboh banga Pathen molsanga kona kapai doh-a; keiman nangma meisongho lah-a kona kasuhmang ding nahi.

¹⁷Nahoi jeh-in, nalungthim akichoisang tan, navah emsel jeh-in nachihna nasuboh tai; keiman tolla kalelhah ding, lenghon navet theina dinguva, a-angsung uva kajam ding nahi.

¹⁸Nakiman chahna-a nakhangitlouna tamtah hole, nakiveina khang gilouho-in, namun thengho chu nasuboh tan; hijeh-a chu nalah-a kona mei kahin kondohsah-a, hichun nakahvam ding, chule naveho jouse mitmu-a, vutvai kahin sosah ding ahi.

¹⁹Mipi lah-a nangma nanahesa jousen nadatmo dingu; nangma tijat umtah nahiding, a-itih-a naum kit louding ahitai.

²⁰ Avelin Pakai thu chu kahenga ahung lhungin, hitin aseije,

²¹Mihem chapa, Sidon lam chu maingatnin lang, adounan gaothu seijin,

²²Chule hitin seipeh-in, Pakai Pathen'in hitin aseije; Vetan, Vo Sidon, keiman kadou nahi, keima nalailung tah-a kaloupi ding ahi; chule keiman amanu chungthu katanna, amanu-a suhthenga kaum tengle, amahon keima Pakai kahi ahetdohdiu ahi.

²³Ajehchu keiman amanu sunga hise, chule akhopi lamlen ho-a thisan kalhalut ding; chule maha puho chu amanu lailung tah-a chemjam'a lamjouse-a athu-u kitan ding; chutengle amahon keima Pakai kahi chu ahet dingu ahi.

²⁴Chule Israel insung dinga misunthei lingboh, ahiloule akimvela um amaho isahlou jouse-a kona asunna theiju ling kiti khatcha umtalou ding ahi. Chule amahon keima Pakai Pathen kahi ahinhet dingu ahi.

²⁵Pakai Pathen'in hitihin aseije, Keiman Israel insung chu ana kithecheh nau mipi ho-a kona kahin khopkhom tengle, Pathen hepha louho mitmu-a alah uva suhthenga kaumding; chutengle keiman kasoh Jacob kapeh amaho gamsunga chu chengding ahiuve.

²⁶Chule amaho hiche sunga chu bitkeija chengdio, inho akisahdoh uva, chule lengpi honho akibol dingu; henge, keiman akimveluva um amaho i-sah louva bolho jouse chunga thutannaho katohdoh tengle, amaho lung noma chengtei ding ahiuve, chule amahon keima Pakai amaho Pathen kahi ahin het dingu ahi.