Read Thado Chin Ezekiel 29 Bible Online

Ezekiel 29 - Thado Chin bible

Ezekiel 29

¹ Kum som channa, alhasomna, nisomle nini lhinnin Pakai thu chu kahenga ahung lhungin, hitin aseije.

²Mihem chapa, Egypt lengpa Pharaoh lam maingatnin lang, amale Egypt pumpi dounan gaothu seijin,

³Seiphongin, chule seijin, Pakai Pathen'in hitin seijin; Ven, ama vadungho lailunga lum dragon len, Egypt lengpa Pharaoh, keiman nangma kadou nahi, nangman, Kavadung chu keima-a ahin, keima dinga kakisem ahi, tin naseije.

⁴Ahin, keiman nakha teni-a ngakoi kabupeh-a, chule navadung ho-a nga jouse chu nalip ho-a kabedetsah ding, chule keiman nangma navadung ho lailunga kona kapuidoh-a, chule navadung ho-a nga jouse chu nalip sunga behden ding ahiuve.

⁵Chule keiman nangmale navadung ho-a nga jouse chu, gamthipma kaselutna kadalhah ding; nangma gam ongho lah-a naga chuh-a, nangma nakiloh khom talou ding, nakichom khom talou ding ahi. Keiman nangma gamlah-a sahole, chunga leng vachaho henga a-anneh dinguva kapehdoh nahitai.

⁶ Chule Egypt'a chengho jousen keima Pakai Pathen kahi chu ahetdoh dingu ahi, ajehchu amaho chu Israel insung dinga peng tenggol ana hiuva ahi.

⁷Amahon nangma nakhutna natuh uchun, nangman amaho dahbul jouse nasubongin, nabot telin; chule amaho nachunga akingaiju chun, nangman akongbuhhou jouse chu dingjang theilouvin nasubongin ahi.

⁸Hijeh chun Pakai Pathen'in hitihin aseije; Ven, keiman nachunga chemjam kahin chuhsah ding, chule nangma-a kona mihem le sahem kasuhmang ding ahi.

⁹Chule Egypt gam chu kamhela agohkeo hung hiding; chule amahon keima Pakai kahina chu ahin het dingu ahi. Ajehchu aman, Vadung chu keija ahin, chule keiman kanasem ahi, tin anaseijin ahi.

¹⁰Ven, hijeh chun keiman nangmale navadung ho kadouvin, chule keiman Egypt gam chu Syene insanga pat Ethiopia gam pumpi geija kamhela agohkeohel kahisah ding ahi.

¹¹Mihem koimachan akenga ajot tah louding, sahem kengin jong apaltahlou ding, kum somli sung koima cheng louding ahi.

¹²Chule keiman Egypt gam chu agoh-a um gamho lailunga kakamhelsah-a, chule akhopiho chu ahomkeo lah-a kum somli kamhela umding ahi. Chule Egypt miho chu namtin lah-a kithecheh ding, gamho chansoh-a kathe thang ding ahi.

¹³Ahijeng vangin Pakai Pathen'in hitihin aseije, Kum somli ahung beitengleh keiman Egypt miho chu thecheh-a aumnao miho lah-a kona kachopkhom ding ahi.

¹⁴Chule keiman Egypt sohchana chu kahin lepui kitna, chule amaho chu Pathros gamsung, amaho chenkhum gamsungtah ngeija kakile sahkit ding; chule amaho hichea chu lenggam nemcha hiding ahiuve.

¹⁵Hichu lenggam ho lah-a anempen hiding, ahiloule namho chunga jong ama kichoisang joukit talou ding ahi. Ajehchu keiman amaho chu kasuhnem ding, chutia chu amahon namtin chunga vai ahom kit tah lou dingu ahi.

¹⁶Chule amaho Israel insung dinga tahsanna umkit taloudiu, amavang amahon ajuigot tengule akhangit lounao geldohna bep hidingu ahitai. Chutengle amahon keima Pakai Pathen kahi ahet dingu ahi.

¹⁷Chuin ahitin ahi, kum somni le sagi lhinna lha masapen, alhasunga nimasa pen ni chun Pakai thu chu kahenga ahung lhungin, hitin aseije,

¹⁸Mihem chapa, Babylon lengpa Nebuchadnezzar'in Tyre dounan agalmiho natoh lentah anatohdoh sah-in; Luchang takip chu veltolin aumtan, chule lengkou takip akoh-in ahi. Ahijeng vangin ama ahin, agalsat miho ahiuvin, Tyre'a konin hiche douna-a anatohnauva hin tohman asangpouvin ahi.

¹⁹Hijeh chun Pakai Pathen'in hitihin aseije; Ven, keiman Egypt gam chu Babylon lengpa Nebuchadnezzar henga kapeh ding; aman ahaonaho jouse chu alahding, galthil achomding, chule achomgam helding; hicheho chu agalmiho dinga thaman hiding ahi.

²⁰Keiman atohman dinga Egypt gam chu ama kapeh ahitai, ajehchu keima dinga na eitoh peh-u ahi, tin Pakai Pathen'in aseije.

²¹Chuche nikho tengchule keiman Israel insung ki chu kadondoh sah ding, nangma amaho lailung tah-a paodoh jouna kapeh ding; chule amahon keima Pakai kahi ahet dingu ahi.