Read Thado Chin Ezekiel 3 Bible Online

Ezekiel 3 - Thado Chin bible

Ezekiel 3

¹ Chukal valin aman kahenga, Mihem chapa, namu chu nejengin; hiche lekhajol hi nen, chule chenlang Israel insung henga thu gaseijin, ati.

²Hitichun keiman kakam kakan, chule aman chuche lekhajol chu einehsah tai.

³Chuin aman kahenga, Mihem chapa na oisunga lutsah-in, chule keiman kapeh hiche lekhajol hin nasung dimsah in, tin aseije. Hichun keiman kanen ahile, kakam sunga khoiju lhumin alhumin ahi.

⁴Chuin aman kahenga aseije, Mihem chapa, chen, Israel insung henga gachen, chule keima thuho hi amaho henga gaseijin.

⁵Ajehchu gamdang paole pao hahsa mite henga kisol nahipon, ahinla Israel insung heng joh-a nangma kisola nahibouve.

⁶Ajehchu hetkhahlou paole ham tho nam mite leh pao hahsa nam mite henga kisola nahipoi. Tahbeh-in, amaho henga chun keiman nangma anasol leng, amaho chun nangma thu anangai diu ahi.

⁷Ahinla Israel insungin vang nangma thu angailou dingu ahi; ajehchu amahon keima thusei jong angailou dingu ahi. Ijeh-inem itile Israel insung pumpihi jachat helou ahiuve.

⁸Ven, keiman amaho maitoh kitatto dinga namai kasuhtah-a, chule amaho chalpang toh kitatto dinga nachalpang kasuhtah ahitai.

⁹Keiman meituh song sanga tahjo thiltah bangin nachalpang kasempehtai. Amaho ginghih beh-in, amaho thungailou insung khat hijeng jongleu, amelput aumdanhou jeh-in nangma lunglhalou jenin, ati.

¹⁰Chukal valin, aman kahenga hitin asei kitnin, Mihem chapa, keiman nahenga kahinsei ding kathuho abonchan nalung sunga kisan lutnin lang, nanakhangin ngaijin.

¹¹Chule chen, sohchanga um namite le achateu henga nangma galutnin lang, amahon ngaijuhen lang ngaihih jongleu, Pakai Pathen'in hitin aseije, tin amaho henga gaseijin lang gahilin, tin aseije.

¹²Chuin lhagaovin eilatouvin, kanung lama chun aw sangtah-a kisei thu khat kajan, hiche aw chun, Amun thenga Pakai loupi chu vahchoijin umhen, ati.

¹³Chujongle keiman ganhing ho lhavingho khatle khat akitoh khahto ginle, amaho koma um kangtalai kang ho kitol nasatah gin kajan ahi.

¹⁴Hiti chun lhagaovin keima eilatoutan, chule eipui mangtan, chuin lung nommo tahle ka lhagao lunggim tah-in kachetai; ahivangin kachunga Pakai khut chu ahatnin ahi.

¹⁵Chujouvin keiman Chebar vadunglen panga cheng, Tel-abib'a sohchanga umho heng kalhungtan, chule keima amaho touna-a katouvin, kidang satah in amaho lah-a ni sagi kaumin ahi.

¹⁶Chuin ni sagi kichainin ahitin ahi, hitichun Pakai thu chu kahenga ahung lhungin,

¹⁷Mihem chapa, keiman nangma Israel insung dinga avesui diuva kasem nahitai. Hijeh chun keima kamsunga kon thupot ngaijin, chule keima-a konin amaho gihsalin, ati.

¹⁸Keiman mi khang gilou henga, nangma thonlouva nathi teiding ahi kati-a; nangman ama chu gihna pelouva, ahiloule agilou chu agitlouna lampiho-a kona ahinkho akihuhdohna dinga thu imacha ama gihna-a naseipeh loule; chutobang agiloupa chu akhansetna-a chu thitei ding ahin; amavang ama thisan chu keiman nangma khutna kahin ngeh ding ahi.

¹⁹Nangman agiloupa chu nanagih nah-a, ama agitlouna-a konle agitlouna lampia kona akiheidoh loule, akhansetna-a chu thitei ding ahin; amavang nangman nahinna nakihuh doh ahi.

²⁰Chukitle, michonpha chu, achonphatna-a kona kihei manga, gitlouna abolteng, keiman amasanga kipal lhuhna kakoija, ama thitei ding ahi; ajehchu nangman gihsalna nanapeh loujeh-a achonsetna-a thiding, chule achonphatna thilbolho chu kigeldoh lou ding ahitai; amavang ama thisan chu keiman nangma khutna kangeh ding ahi.

²¹Hijeng jongle, nangman michonpha chu gihna napeh-a, chonphan chonset abolji poi nati-a, chonset bol louva aumle, thonlouva hingtei ding ahi; ajehchu ama chun kigihna asangin; nangman jong nahinna nakihuh doh ahi.

²²Chukoma chun Pakai khut chu kachunga akingamin, chule aman kahenga, thoudoh inlang phaichama khun gachen, chule chukoma chu keiman nangma kakihoupi ding nahi, ati.

²³Chuin kakipatdoh-in, phaichama chun kachetai. Chuin veuvin, Chebar vadunglen panga kanamu loupina, Pakai loupina chu anadingin ahi. Hichun keiman tolla kamai kasulut tai.

²⁴Hichun lhagao chu kasunga ahung lutnin, kakengin eidin sah-in, chule keima eikihoupin, kajah-a, Chen, na insunga gaum chahbeh-in, ati.

²⁵Hijongle Vo nangma mihem chapan, vetan, amahon nachunga khaohol ho ahinkoi diu, hicheho-a chu nakandiu ahin, chule amaho lah-a nagache dohle louding ahi.

²⁶Chule keiman napaomona dingle amaho dinga aphohsalpao nahilouna dinga, nalei chu nadanga kabesah ding ahi. Ajehchu amaho thungailou insung ahiuve.

²⁷Ahinla nahenga thu kasei tengle, keiman nakam kahona, chule nangman amaho henga, Pakai Pathen'in hitin aseije, tia nagasei ding; angainom pan angaiding, chule angainomlou pan angaida ding ahi. Ajehchu amahohi thungailou insung ahiuve.