Read Thado Chin Ezekiel 30 Bible Online

Ezekiel 30 - Thado Chin bible

Ezekiel 30

¹Pakai thu chu kahenga ahung kitnin, hitin aseije,

²Mihem chapa, gaovinlang seijin, Pakai Pathen'in hitin aseije; Ohe hiche nikho chu adana-e!

³Nikho chu ahung naitai, Pakai nikho ngei chu ahung naitai, hichu meikai nikho hiding, Pathen helouho phat hiding ahi.

⁴Chule Egypt chunga chemjam hung lhung ding, chule akithat ho Egypt'a alhuhgem phat teng, Ethiopia sunga thohnatna nasatah hung umdoh ding, chule amahon amanu mitampi ho chu alahmang uva, akibulphu naochu kisuchim ding ahi.

⁵Ethiopia, Libya le Lydia, chule mipi choplopho jouse, Chub, chule gamsunga miho apangkhomho chu, amahotoh chemjam'a lhukhom dingu ahi.

⁶Pakaiyin hitihin aseije, Egypt tuhdet hojong chu lhutei ding; chule amanu kiletsahna athaneina chu lhasuh ding ahi: Syene insanga kona amaho hia chu chemjam'a loudiu ahi, tin Pakai Pathen'in aseije.

⁷Chule akamhel gamho lailunga amaho kamhel diu, chule akhopihou chu agohkeosa khopiho lailunga umding ahiuve.

⁸Chule keiman Egypt gamsunga mei kati-a, chule apanpiho jouse kahin suhmang tengle; amahon keiman Pakai kahi ahet dingu ahi.

⁹Hiche nikho chule mikituplou Ethiopia mite kichatsahna dinga, keija kona thupole ho kong inneija chedoh diu, chule Egypt nikho-a banga, thohnatna nasatah hunglhung ding ahi; ajehchu ven, hunglhung ding ahitai.

¹⁰Pakai Pathen'in hitin aseije, Keiman Egypt mihonpi jong chu, Babylon lengpa Nebuchadnezzar khutna katansah ding ahi.

¹¹Amale aumpi mite, namtin lah-a kichat umtahho chu gamsung sumang dinga kapuilut ding, amahon Egypt douna-a achemjamu aloidoh uva, gamsung chu mithi adip dingu ahi.

¹²Chule keiman vadungho kakansah-a, agam chu migilouho khutna kajohdoh ding ; chule agam chu asunga umho toh, gamdang miho khutna agoh-a kalha ding ahi; Pakai keiman hichu kaseidoh ahitai.

¹³Pakai Pathen'in hitin aseije; Keiman lim semthuho jong kasuhset ding, chule Noph gama amilimhou kasuhbei ding; chule Egypt gam pipui kiti chu umkit talou ding ahi. Chule Egypt gamsunga tijatna kachuhsah ding ahi.

¹⁴Pathros chu agoh-a kakoija, Zoan gamsung meija kahal ding, chule No khopi-a thu katan ding ahi.

¹⁵Chule keiman kalungsatna chu Egypt thahatna Sin chunga kasunlhah-a; No mite tampiho chu kasuhbei ding ahi.

¹⁶Chule keiman Egypt meija kahal ding; Sin'in nat genthei athoh ding, No chu kehso-a umding, Noph'in nitina gimgenthei naho anei ding ahi.

¹⁷Aven le Pibeseth'a gollhangho chu chemjam'a lou dingu, hiche khopiho hi sohchanga cheding ahiuve.

¹⁸Egypt namkoljon ho kavohboh teng, Tehaphnehes'a jong nisa thim ding; chule alungtahna thahat chu kisubei ding; amanu vang chu meibolin tomintin, achanute sohchanga chediu ahi.

¹⁹Hitia chu Egypt sunga thutanna kabol ding, chuteng amahon keima Pakai kahi ahet dingu ahi.

²⁰Chule kum somle kum khat lhinna, alha masapen nisagi nin Pakai thu chu kahenga ahungin, hitin aseije,

²¹Mihem chapa, Egypt lengpa Pharaoh khut chu kahehbong tai; chule ven, hichu adamdoh dinga kitom kitlou ding, akanjang nadinga molbong kimang louding, akhutchu chemjam tuhkit thei dinga kihatsah louding ahitai.

²²Hijeh chun Pakai Pathen'in hitihin aseije; Ven, keiman Egypt lengpa Pharaoh kadouvin, chule aban janga aban thahat kasuhboh kit ding; chule akhutna kona chemjam kalhah mangsah ding ahi.

²³Chule keiman Egypt miho chu namtin lah-a kathecheh-a, gam jouse-a kathe thang ding ahi.

²⁴Chule keiman Babylon lengpa ban teni kahatsah-a, kachemjam akhutna kakoi ding; amavang keiman Pharaoh ban teni kasuhboh-a, ama thina khopma mahapuho banga ama anga peng ding ahi.

²⁵Ahinla keiman Babylon lengpa khut teni kahatsah-a, Pharaoh ban teni lhasuh ding; chule keiman kachemjam Babylon lengpa khutna kakoi teng, amahon keima Pakai kahi ahet dingu, chule aman hichu Egypt gam chunga ajah teng, Keima Pakai kahi ahetdingu ahi.

²⁶Chule Egypt miho chu namtin lah-a kathecheh-a, gam jouse-a kathe thang ding, chule amahon keima Pakai kahi ahet dingu ahi.