Read Thado Chin Ezekiel 31 Bible Online

Ezekiel 31 - Thado Chin bible

Ezekiel 31

¹Chule kum somle kum khat lhinna, lha thum channa, alhasunga nikho masapen nin Pakai thu chu kahenga ahungin, aseije.

²Mihem chapa, Egypt lengpa Pharaoh le amihonpi henga seipeh-in, Nalet na-a hi koito nakibah em?

³Ven, Assyria chu Lebanon'a um cedar thing ahin, abahho ahoija hoi, gam manglah limsah jou, chule sangtah ahin; ajihhui chu abahho jouse sangin asangjon ahi.

⁴Twiho chun lentah ahisah ahin; leinoi'a twihon sangtah ahisah-a aphung kimvela chu avadung lenho longkimvela, chule gamlah thingphung jouse-a dinga avadung neoho alon sah ahi.

⁵Hijeh chun asan chu gama thingphung ho jouse chungvuma akitung sangin, chule abohho jong apungin, twi atam jeh-in abahho ahung kikapdoh phatnule asaotheijun ahi.

⁶Chunga leng vacha jouse aboh lah-a abusan; chule abahho noija chun gamsa jousen nou aneijun, chule alim noija chun namlenho jouse achenguve.

⁷Abahho saona chun aloupina chu aletna-a amel lomsah-e: ajehchu ajung chu twilenho panga kikho ahi.

⁸ Pathen hon sunga cedar thingphung hon ama aseljoupoi: chahthingho chu ama bahho tobang ahipon, belkanho jong ama bahho tobang ahipon; Pathen hon sunga thingphung khatcha jong ama tobanga hoi aumpoi.

⁹Eden'a thingphung jouse, Pathen hona kehho chun ama athang thipna dingun, keiman abah tamtah-a chun thingphung chu kasem hoijin ahi.

¹⁰Hijeh chun Pakai Pathen'in hitin aseije; Nangma sangtah-a nakidop sanga, abah bit lah-a alehhui akikhodoh-a, asanna-a chu alungsung akichoi sang jeh-a;

¹¹Hijeh-a chu keiman Pathen helou thaneitah khat khutna ama kapehdoh ahin; ama chun tahbeh-a ama abolset ding ahi. Keiman ama chu agitlouna jeh-a kadeldoh ahitai.

¹²Chule gamdang miho, namtin lah-a tijat umchun ama asuhmanga, adalhah ahitai: molsang ho chungle phaicham jouse-a abahho jouse alhatan, chule abahkai hochu gamsung vadungho jousen asubongtan, chule leiset mite jouse alima konin apotdoh-un, adalha taove.

¹³Ama manthah na chunga chu chungleng vacha jouse umden ding, chule gamsa jouse chu abahho chunga chu umding ahi.

¹⁴Khonung le twiho panga thingphung ho jouse atunu asan vanga akichoisang louna diu, alehhui ju abahhou chunga adodoh louna ding, twi dona thingphung jouse hichan geija chu asanlouna dinga chutia chu uma ahi. Amaho leiset noilama kumsuh-a mihem chate lah-a kokhuh-a kumlha ho toh abonuva thina-a thakhatna kipelutna ahitaove.

¹⁵Pakai Pathen'in hitin aseije; Ama thikholkhul sunga akumlhah ni chun kalunghemin ahi. Amaho dingin twi thuhlai kanakhu khumin, twi sohlai kanatuh tangin, twilen tahtah ho akitingden tai. Chule keiman ama dingin Lebanon kalunghem sah-in, gama thingphung jouse ama dingin angoilha-un ahi.

¹⁶Keiman ama kokhuh sung lut ho toh thikholkhula kalelut tha phat chun, ama lhuh ginin nampiho kakithinsah-in; Eden'a thingphung jouse, Labanon'a thingphung pha jouse, chule twi don jouse chu, leiset noilam gambehho-a lhep lungmonga umding ahiuve.

¹⁷Amaho jong chu amatoh thakhatnin chemjam'a kithatsaho henga thikhol khul'a akumsuh-un; chule amaho chu ama khutna pangho, Pathen helou lah-a ama le-lima chengho ahiuve.

¹⁸Eden'a thingphung hoitah ho lah-a hoichepen tochu nangma loupi le letna toh kibang am? hijeng jongle nangma Eden'a thingphung ho toh leiset noilama pohlhah-a naum ding; nangma cheptan louho lailung tah-a chemjam'a kithat ho toh nalup ding ahi. Hichehi Pharaoh le amihonpi jouse chu ahi, tin Pakai Pathen'in aseije.