Read Thado Chin Ezekiel 32 Bible Online

Ezekiel 32 - Thado Chin bible

Ezekiel 32

¹Chuin kum somle kumni, lha somle lhani channa, alhasunga nikho masapen nin ahitin ahi, Pakai thu chu kahenga ahungin, aseije.

²Mihem chapa, Egypt lengpa Pharaoh dingin kala bolin lang, ahenga seipeh-in, Nangma nampiho keipi bahkai chal donglai tobang nahin, twipi noija ngapi tobang nahi: nangma na vadunglen hotoh nahung doh-in, nakengin twiho chu nachoh lingin, chule avadunglen hou nasuneh-in ahi.

³Pakai Pathen'in hitin aseije; Hijeh-a chu keiman nangma chunga mihonpi toh kalen kahinkhu ding, amahon nangma kalen sunga nahin kaidoh dingu ahi.

⁴Chuteng keiman nangma tolla kadalha-a, gam onga kapaidoh ding, chule keiman chungleng vacha jouse nachunga kachuh sah-a, leiset pumpi-a gamsa jouse vahna-a kanei ding nahi.

⁵Chule keiman molsang chungho-a natahsa kalupsah ding, chule phaicham ho chu nalongin adip ding ahi.

⁶Keiman natwi japna gamsung chu molsang ho geija nathisana kachap ding; chule vadungho chu nangma-a dim ding ahi.

⁷Chule keiman nangma kapuidoh tengle, van chu kakhu khuma, ahsi ho chu kathimsah ding; nisa meiloma kakhu-a, lhathah-in jong avah asodohsah louding ahi.

⁸Van'a vahho jousen nachunga thim ajinsah ding, nagamsunga thimjing ding ahi, tin Pakai Pathen'in aseije.

⁹Keiman namtinho lah-a, nangman nanahet khahlou gamsungho-a nangma suhmangna kahin lhunsah teng, mihem tamtah kalungjin sah ding ahi.

¹⁰Henge, keiman mihem tamtah chu nangma kadatmosah-a, chule alenghou jong a-anguva kachemjam kapei tengle, nangma jeh-a hatah-a tija dingu; chule nalhuh nikhoteng chule amitakip ama amacheh hinkho dinga aphat tina kithing thing dingu ahi.

¹¹Ajehchu Pakai Pathen'in hitin aseije, Babylon lengpa chemjam chu nachunga hung chuding ahi.

¹²Galhat ho chemjam'a namihonpi chu abonchauva, namtinin akichat penhou chu kalhuhsah gamdiu; amahon Egypt mite hoithona asuhbeijuva, chua mihonpi chu asuhmanghel diu ahi.

¹³Keiman atuilen pangho-a sahem jouse kasuhmang ding; mihem kengton jong achotneh tahlou ding, sahem kengphangin jong achotneh tahlou ding ahi.

¹⁴Chuteng keiman atuiho kathuhsah-a, avadunghou chu thao banga kalonsah ding ahi, tin Pakai Pathen'in aseije.

¹⁵Keiman Egypt gam chu agoh-a kahinlha-a, agam sunga dimsetna um thiljouse kalahdohpeh-a kasuh lamvaija, keiman chuche sunga chengho jouse kathagam tengle, amahon keima Pakai kahi ahet dingu ahi.

¹⁶Hichehi alunghempi dingu lunghemna chu ahi: namtin chanuten amanu alunghempi dingu: amaho amanu dinga lunghemdiu, Egypt dinga jong chule amanu mihonpi jouse dinga jong lunghemdiu ahi, tin Pakai Pathen'in aseijin ahi.

¹⁷Hitijong hin kum somle kumni lhinna, alhasunga nisom le ninga ni chun ahung hitin, Pakai thu chu kahenga ahung lhungin, hitin aseije,

¹⁸Mihem chapa, Egypt mihonpi ho dingin pengin, chule amaho ahin, amanu tahngei jong, chule nampi minthangho chanute chutoh, kokhuh-a chelut ho toh, leinoi gamleiset lama seplut khomtan.

¹⁹Melhoina-a nangman koi nakhokhel em? kumsuh-in lang, cheptan louho toh lumkhom tan.

²⁰Amaho chu chemjam'a kithatsaho lah-a lhudiu, amanu chemjam'a kipedoh ahitai; amanu le amilhonpi jouse loilutnin.

²¹Mihat ho lah-a mihatpa chun thikholkhul lailunga kona, ama anakithopiho chutoh ama thu aseidiu: amaho akumsuh-un, chemjam'a kithat cheptan louho toh alumtaove, atidiu ahi.

²²Asshur le amanu loiho hia chun aumun; amapa lhankhuh ho chu akimvela aumin; abonchauva akithatsa, chemjam'a lou ahiuve.

²³Alhankhuhho kokhuh pangho-a aumin, chule amanu loiho chu amanu lhankhuh kimvela aumuve; abonchauva akithatsa, chemjam'a lou ahiuvin, mihing gama tijatna sosah ahiuve.

²⁴Chuachun Elam aumin chule amihonpi chu alhankhuh kimvela aumun, abonchauva akithatsa, chemjam'a lou, leinoi gama cheptan louva kumsuh ho, mihing gama tijat sosah ho ahiuve: ahijengvangin amahon ajumnau chu kokhuh-a kumsuh ho toh apokhomun ahi.

²⁵Amahon akithatsaho lailunga chun amihonpi toh amanu chu jalkhun adopeh-un ahi. Amanu lhankhuh ho chu akimvela aumin, amaho abonchauva cheptanlou, chemjam'a lou ahiuve: mihingho gama chu mi atijatsah jeng vangun, amahon ajumnau chu kokhuh sunga lhalutho chutoh apokhomun, amapa chu akithatsaho lailunga chun akoijun ahi.

²⁶Chuachun Meshech, Tubal chule amanu mihonpi chu aumin; amanu lhankhuh ho chu akimvela aumin, amahon atijatsahnau chu mihing gama asosah jeng vangun, amaho chu abonchauva cheptanlou, chemjam'a lou ahiuve.

²⁷Chule amaho chu agalmanchah hou toh thikholkhula kumsuh cheptanlou thaneitah ho toh lumkhom louding ahiuve. Amahon achemjamhou akikhap cheh-un, amaho mihingho gamsunga thahat tahho tijatsah hijeng jongleu, akhangit lounao chu aguhou chunga chuding ahi.

²⁸Henge, nangma cheptan louho lailunga suhgepma naum ding, chule chemjam'a kithatsaho toh nalupkhom ding ahi.

²⁹Chua chun Edom, amanu lengho le apipuiho jouse, athahat lheh vanguva chemjam'a kithatsaho alupsah naova chu lum ahiuve: amaho chu cheptan louho, chule kokhuh-a lhalut ho toh lumkhom dingu ahi.

³⁰Sahlama pipuiho abonchauvin, chule Sidon mite jouse, akithatsaho toh kumsuh ho chu chua chun aumuvin; athahat jeh uva tijatna aboldoh-u chun amaho ajumso taove; chule amaho cheptan louvin chemjam'a kithatho toh alumkhomun, chua chun ajumnau chu kokhuh-a kumsuh ho toh athoh khomun ahi.

³¹Pharaoh chun amaho amuding, chule amihonpi jouse chunga Pharaoh tahngei le agalsatmi achemjama kithat ho jouse chu lhep lung monga umdingu ahi, tin Pakai Pathen'in aseije.

³²Ajehchu keiman kasuh tijatna chu mihing gamsunga kalensahtan; chule ama Pharaoh tahngei jong chule amihonpi jouse chu cheptan louho lailunga, chemjam'a kithatsaho toh kilupkhomsah ding ahi, tin Pakai Pathen'in aseije.