Read Thado Chin Ezekiel 33 Bible Online

Ezekiel 33 - Thado Chin bible

Ezekiel 33

¹Avelin Pakai thu chu kahenga ahung lhungin, hitin aseije,

²Mihem chapa, namite chate henga seijin, Keiman gamkhat chunga chemjam kahin lansah-a, agam sunga mipite chun amaho gamkol sunga mikhat alhendoh uva, chule ama chu amaho ngahtupma atundoh tenguleh, ama chu seipeh in;

³Aman gam chunga chemjam ahunglan amu-a ahile, sumkon chu amutna, chule mipi ho chu akiginsah ding;

⁴Chutengle koi hileh sumkon gin chu jana-a, gihsalna donlou chu; chemjam chu ahung lhunna, ama chu alahmang tah-a ahile, ama thisan chu ama luchunga bou chuding ahi.

⁵Aman sumkon gin chu jahenlang, ahinla kigin ding anadon tahihle; ama thisan chu ama chunga bou chuding ahi. Ahinla gihsalna anakisanpa chun ahinna akihoidoh ding ahi.

⁶Ahinla ngahtuppa chun chemjam hunglang ding chu amua, ahia sumkon amutlouva, chule mipite chu gihsal louva auma: chemjam chu ahunglhun tah-a, amaho lah-a khatpen pen chu alahtah-a ahile, ama chu ama khangitlouna-a kilamanga ahitai; ahinla ama thisan chu keiman ngahtuppa khutna kangeh ding ahi.

⁷Chuobang chun nangma, vo mihem chapa, keiman nangma Israel insung dinga ngahtup pa-a katundoh nahitan; hijeh-a chu nangman kakama thu chu najah ding, chule amaho chu keija kona nagihsal ding ahi.

⁸Keiman migiloupa henga, Vo migilou, nangma nathi teiding ahi, tia kasei teng; nangman migilou chu alampia kona akihei mangna dinga nagihsal louva ahile, ama chu akhangit louna-a chu thitei ding ahi; ahinla ama thisan chu nangma khutna kangeh ding ahi.

⁹Ahivanga nangman migilou chu alampia kona akihei mangna dinga nagihsala; ahivanga ama chu alampia kona akihei mang loule, ama chu akhangit louna-a chu thitei ding ahi; ahinla nangman nahinna nakihuh doh ahitai.

¹⁰Hijeh chun, vo mihem chapa, nangman Israel insung henga seijin; nanghon, Keiho suhkhel naho le chonset naho chu kachung uva achuh-a, hicheho-a chu kichaipai ding kahiule, iti kahinjou dingu ham? tin naseijuve.

¹¹Amaho henga chun seijin, Keima kahin bang ngeijin, tin Pakai Pathen'in aseije; Keiman migilou thina-a hin lunglhaina kaneipon; migilou chu alampia kona ahung kiheija hina anei dingjoh chu kalungdei ahi. Vo Israel insung, nangho kiheijun, nangho nagitlounahou lampia kon chun kihei mangun, ajehchu ipi dinga nathi diuham?

¹²Hijeh chun nang mihem chapa, namite chate henga chun seijin, michonpha chonphatna chun suhkhel nikho-a ama alhatdoh lou ding ahi. Migilou gitlouna chu ahile, agitlouna-a kona ama akiheimang nikho-a chu chuche jala chu ama lhulou ding; michonpha chu ahung chonset nikhole achonphat vanga chu hing louding ahi.

¹³Keiman michonpha henga ama hingtei ding ahi, tia kasei tengle; aman ama chonphatna akisonpi-a, khangit louna abola ahile, achonphatna jouse chu kigeldoh lou ding; ahinla khansetna abol jeh-a chu, ama thitei ding ahi.

¹⁴Chule keiman migilou henga, Nangma nathitei ding ahi, tia kaseipeh tengle; ama achonsetna-a kona akiheimanga, chule danin aphal le adih chu abola;

¹⁵Migilou chun thil kitung chu alepehkitna, achomdoh chu alepeh kitna, hinkho dan kisem ho-a chu achea, khangitlouna abolda le; ama tahbeh-a hingtei ding, thilou ding ahi.

¹⁶Chonset naho anabolho khatcha jong ahenga kiseipeh louding ahitai. Aman danin aphal le adih chu abol ahitan, ama tahbeh-a hingtei ding ahi.

¹⁷Hijongle namite chaten, Pakai lampi chu akibangpoi atiuve, ahinla amaho-a dinga chu amaho lampi joh chu kibanglou ahi.

¹⁸Michonpha chu achonphatna-a kona akiheimanga, khansetna chu ahinbol le, hia chu ama thitei ding ahi.

¹⁹Ahinla migilou chu agitlouna-a kona akiheimanga, chule danin aphal le adih chu abola ahile, ama hichea chu hingtei ding ahi.

²⁰Ahijengvangin nanghon, Pakai lampi chu akibangpoi nati uve. Vo nangho Israel insung mite, keiman nangho nabon chaova khatcheh-a nachonnao dungjuija nathu-u katan ding ahi.

²¹ Chuin kasoh channao kum somleni lhinna, lhasomna, chuche lha ani nga nin, Jerusalem'a kona hoidoh mi khat kahenga ahungin, Khopi chu achimtai, ati.

²²Tun nilhah lamin ahung sohchapa hung masangin Pakai khut chu kachunga ahung kingamin, chule kakam akihon sahtai; chutichun jingkah-a sohchapa kahenga ahung chun, kakam akihongin, paomon kaum tapoi.

²³Chujouvin Pakai thu chu kahenga ahung lhungin, hitin aseije,

²⁴Mihem chapa, Israel gam agohkeosa loho chun aseijun, Abraham chu khat ahin, aman agam chu gouva analo ahin; ahinla keiho tampi kahiuvin, gamsung hi keihon gouva kalodiuva eikipeuva ahi, atiuve.

²⁵Hijeh chun amaho henga seipeh-in, Pakai Pathen'in hitin aseije; Nanghon thisantoh naneh thaovin, chule namilim semthu-u henglam namitnun nagah veuvin, thisan nasouvin; achutile gam chu nalo dingu hinam?

²⁶Nangho nachemjam chunguva nakisong un, thet umtah natong doh-un, chule amitakipmin a-inhengpa inneipi nasuboh-un; achutile gam chu nalo dingu hinam?

²⁷Amaho henga nangman hitihin seijin, Pakai Pathen'in hitin aseije; Keima kahinjing bangin, tahbeh-in akisuse gamsungho-a umho chu chemjam'a lhutei dingu, chule koihile gam onga uma chu keiman gamsaho vallhum dinga kapeh ding, chule kulpihole song kohom sunga umho chu hise-a thitei ding ahiuve.

²⁸Ajehchu keiman agam chu hatah-a kasuh kamhel ding, chule amanu hoithona chu kasuhtang ding; chule Israel molsang ho chu kamhel ding, koiman apalpa louding ahiuve.

²⁹Chutengle keiman amahon atohdoh-u thet umtahho jouse jeh-a, agam chu kamhela kalha teng; amahon keima Pakai kahi chu ahinhet dingu ahi.

³⁰Chujongle, nangma mihem chapa, namite chate chun bang panghole in kot ho sunga nangma dounan akihoulimun, chule khatnin khat henga, amitakipmin asopipa henga, Hungin, nahenga katao ahi, Pakaiya kona hungsoh doh thu chu ipi ahi hung jatemin, akitiuvin ahi.

³¹Chule amaho nahenga mipi ho hung bangin ahungun, chule amaho kamite bangin namasanga atouvun, chule nathuseidoh ho angaijun, ahinla amahon hicheho chu abol loudiu ahi. Ajehchu amahon akam sungun hatah-in ngailutna avetsah-un, ahinla alungsunghou chu apapsetnao lama achegam tan ahi.

³²Chule vetan, nangma amaho-a dingin aw ngeitah neija, la ngeitah sa-a, chule tumging phatah-a tumthei tobangbou nahije; ajehchu amahon nathuseiho angaijun, ahinla hicheho chu abol pouve.

³³Chule hichehi ahunglhun tengle, (ven hichehi hunglhung tei ding ahi,) chuteng amahon amaho lah-a themgao khat anaume ti ahet dingu ahi.