Read Thado Chin Ezekiel 34 Bible Online

Ezekiel 34 - Thado Chin bible

Ezekiel 34

¹Chuin Pakai thu chu kahenga ahung lhungin, hitin aseije,

²Mihem chapa, Israel kelngoi chingho dounan gaothu seijin, gaovin lang amaho henga hitin seijin, Pakai Pathen'in kelngoi chingho henga hitihin aseije; Israel kelngoi chingho amahole amaho kivahho chu Ohe adau ahi! kelngoiching ho chun kelngoiho chu avah dingu hilouham?

³Nanghon athaothao nane uvin, chule amuluva chun nangho le nangho nakivon un, alah uva athao thao nathat uvin; hinlah kelngoi hon chu navah pouve.

⁴Veise-a nathahatsah pouvin, adamlouva nasudam pouvin, akisukhaho jong natompouvin, akinomangho jong nahin lepui kit pouvin, amanga jong nagahol pouvin; ahinla hunam le engsetnin vai nahomjiuve.

⁵ Chule amaho kelngoi ching umlou jeh-in achehchau uvin; achehchau phatnun, gama gamsaho jouse anneh ahunghi taove.

⁶Kakelngoite molsang ho jouse le lhangsang tin chunga avahle taove: henge, ka kelgnoi hon chu leichung jouse-a akithe thangun, amaho chu gahol le-a gamudoh-a koimacha aumpoi.

⁷Hijeh chun, nangho kelngoiching ho, Pakai thusei ngaijun;

⁸Pakai Pathen'in hitihin aseije, Keima kahinjing bangin, Veuvin, kelngoi ching umlou jehle, kelngoi chinghon ka kelngoi ho ahol loujeh-u, chule kakelngoi honho vah tahsanga, amahole amaho akivahjoh jeh-un; kakelngoi honho gamsa tincheng anneh le anchah ahung hitaove;

⁹Hijeh chun, vo nangho kelngoi chingho, Pakai thu ngaijun;

¹⁰Pakai Pathen'in hitihin aseije, Keima kahinjing bangin; Veuvin, keiman kelngoi chingho chu kadou ahi; Keiman amaho khutna kakelngoi honho kangeh-a, kakelngoi hon avah naojong kasuhtang ding; kelngoi chingho chu amahole amaho kivahkit louding ahi; ajehchu, ka kelngoi ho chu amaho anneh ahilouna dinguva, kelngoihon chu akamuva kona kahuhdoh ding ahi.

¹¹Ajehchu Pakai Pathen'in hitihin aseije; Veuvin, keima, keimatah-in, ka kelngoi ho chu kahol le-a, kamudoh ding ahi.

¹²Kelngoi chingpan akelngoiho chehchau nikho-a akelngoi honho aholdoh banga; keiman jong ka kelngoi ho kaholdoh-a, meijinle thimjin nikho-a jong acheh chaunau mun jouse-a kona kahuhdoh ding ahi.

¹³Chule keiman amaho milah-a kona kahinpuidoh-a, gamkaiho-a kona kahin chopkhom ding; amaho gamsung ngeija kahin puilutna, amaho chu Israel molsang ho chung vadungho panga le, mi chenna gamsung mun jouse-a kavah ding ahi.

¹⁴Keiman amaho chu hamhing phalah-a kavah-a, Israel molsang ho chung chu amaho hongsung hiding ahi. Chuachu amaho hong phatah-a kol uva, Israel molsang ho chung hamhing phatna-a kivahding ahiuve.

¹⁵Keiman kakelngoi honho vah ingting, chule amaho chu kakolsah ding ahi, tin Pakai Pathen'in aseije.

¹⁶Keiman amangsa chu kahola, anakinomangsa chu kahin lepui kit ding, akeng anabongho chu katom kitna, chule ana-a chu kathahatsah ding ahi. Ahinla keiman athaoho le ahat ho chu kasuhmanga, amaho chu thutan na-a kavah ding ahi.

¹⁷Chule, Vo ka kelngoi ho, nangho chungthua Pakai Pathen'in hitihin aseije; Veuvin, keiman ganchaho le ganchaho kikah, chule kelngoi chalho le keltah chalho kah-a thu katane.

¹⁸Hamhing phatah gah nehchai jenga, hamhing pha nanehmoh chengse nakengtouva nachil dingu chu thil neocha-a nangaitouva, chule twi thuhtah ho-a kona nadon uva, amoh chu nakengtouva nasuhneh dingu chu thil neocha-a nangaitou ham?

¹⁹Keima kelngoihon vang, nakengtouva nachilu hamhing chu aneh-u ahin, nanghon nakengtouva nasuhneh-u twi chu adonu ahi.

²⁰Hijeh chun Pakai Pathen'in amaho henga hitihin aseije; Veuvin, keima, keima tah-in, gancha athaoho le agongho kah-a thu katan ding ahi.

²¹Nanghon napang hou le nalengkou uva nano uva, chule adamlou jouse gamtina achehchau kah seuva naki houva nata jeh-un;

²²Hijeh chun keiman kakelngoi honho kahuh doh-a, anchah-a pangkit talou dingu; chule keiman gancha le ganchakah-a thu katan ding ahi.

²³ Chule keiman amaho chunga kelngoiching khat katundoh ding, aman amaho chu avah-a, kasoh David ngei jong avah ding; chule aman amaho chu avah ding, chule ama amaho chingpa hiding ahi.

²⁴ Chule Pakai keima hi amaho Pathen kahia, chule kasohpa David chu amaho lah-a pipui hiding ahi; Pakai keiman hichehi kaseidoh ahitai.

²⁵Chule keiman amahotoh chamna thulhun khat kasem ding, chule agamsunga kona sahem gilouho kasuhthip ding; chule amaho gammang sunga ihmuva, gamthip sunga bitkeija cheng dingu ahi.

²⁶Chule keiman amahole kalhangho kimvela munho chu phattheina khatna kasem ding; chule keiman gohong chu aphatcha kajuh lhah sah-a, phattheina gohong hungju ding ahi.

²⁷Chule gama thingphungin aga ahinsosah ding, chule leisetnin aga ahinsosah-a, agam sunguva bitkei diu; keiman anamkoljon khaovu kasuhtana, soh-a bolho khutna kona kahuhdoh tengle, keima Pakai kahi chu ahet dingu ahi.

²⁸Chule amaho Pathen heloute anchah hikit taloudiu, ahiloule gamsung sahon jong amaho abahgam kit tahlou dingu; amavang bitkeija chenguva, koimachan amaho asuh tijat lou dingu ahitai.

²⁹Chule keiman amaho dinga thingnou minthang tah khat katundoh ding, chule amaho chu gamsunga kelin athagam lou dingu; chule Pathen hephaloute khutna kon jum le ja athohkit lou dingu ahitai.

³⁰Chutia chu amahon keima Pakai amaho Pathen kahin, amaho kaumpi ji-e ti ahet dingu, chule amaho, Israel insung ngei jonghi keima mite ahiuve, ti akihetdoh dingu ahi, tin Pakai Pathen'in aseije.

³¹Chule ka kelngoihon, ka hamhing lah-a kelngoihon chu mihem ahiuvin, chule keima nangho Pathen kahi tin Pakai Pathen'in aseije.