Read Thado Chin Ezekiel 35 Bible Online

Ezekiel 35 - Thado Chin bible

Ezekiel 35

¹ Chukalvalin Pakai thu chu kahenga ahungin, hitin ati,

²Mihem chapa, Seir molsang chu maingatnin lang, ama dounan gaothu seijin;

³Chule hitihin seijin, Pakai Pathen'in hitihin aseije; Ven, Vo Seir molsang, keiman nangma kadouvin, chule nangma douna kakhut jah-a, nangma kakamhelsah ding nahi.

⁴Keiman nakhopihou agohkeova kalha-a, nangma nakamhel ding, chule nangman keima Pakai kahi chu nahet ding ahi.

⁵Ajehchu nangman kumkho-a mudana naneijin, ahamset nikho laijun, chule akhangit lounao kichai phatnin jong nangman chemjam thahatnin Israel chate thisan nason ahi.

⁶Hijeh chun, keima kahinjing bangin tin Pakai Pathen'in aseije, nangma thisan sona lama kagontei ding nahin, thisanin nanungdel peh ding; nangman thisan jong nahot tahlou jeh-in, thisan ngeijin nanung delpeh ding ahi.

⁷Hitia chu keiman Seir molsang chu kasuhkamhela, ama-a kona potdohpa le ahung kilekitpa chu kasuhbei ding ahi.

⁸Chule keiman ama molsang ho chu ami kithat ho-a kadip ding; nalhangho le na phaicham ho, chule vadungho jouse sunga chemjam'a kithat ho chu lhudingu ahiuve.

⁹Keiman nangma kumkho-a kamhela kalha-a, chule nakhopiho chu hungkile kit louding; chutengle nangman keima Pakai kahi chu nahetdoh ding ahi.

¹⁰Ajehchu nangman, hiche nam teni le hiche gam tenihi keija hiding ahin, chule chua Pakai umnaho chu keihon kalo diu ahi, tin naseije.

¹¹Hijeh chun, keima kahing jinge, tin Pakai Pathen'in aseije, nangma amaho hotna-a namanchah nalunghan dungjuile nathangthipna dungjuija nachunga kaboltei ding ahin; chule keiman nathu katan tengle, alah uva keile kei kakihetsah ding ahi.

¹²Chule nangman keima Pakai kahi chu nahet ding ahi. Chule Israel molsang ho douna-a, amaho agoh-a um ahitai, amaho suhmang dinga eiho eipeh-u ahitai, tia taitomna thu nanasei jouse chu kanajah ahitai.

¹³Hiti chun nakam sungin keima dounan nahoithon, chule keima dounan nathusei napunsah-in, hicheho chu kajasohtai.

¹⁴Pakai Pathen'in hitihin aseije; Leiset pumpi ahung kipa tengle, keiman nangma kamhela kalha ding nahi.

¹⁵Israel insung goulo akamhel jeh-a nakipa banga, nangjong kamhela kalha ding nahi. Vo Seir molsang, chule Edom mite jouse, nabon uva kamhel ding nahiuve; chutengle amahon Pakai kahi chu ahetdoh dingu ahi.