Read Thado Chin Ezekiel 36 Bible Online

Ezekiel 36 - Thado Chin bible

Ezekiel 36

¹Chujongle nangma mihem chapa, nangman Israel molsang ho henga chun gaothu seijin lang, chule hitin seijin, Nangho molsang hon Pakai thu chu ngaijun:

²Pakai Pathen'in hitin aseije; Namelma ten nangma douna-a, Aha, khanglui laija mun sangho jeng jong eiho loding ahitai tin aseijun ahi.

³Hijeh chun, gaovinlang seijin, Pakai Pathen'in hitin aseije; Ajehchu Pathen heloute neile gouva pangdingle, thusei ho kam nopna le japi seithanga naum theina dinguva, amahon nangho kamhela nalhauva, chule muntin-ah naval lhum jeh-un;

⁴Hijeh chun Israel molsang ho nanghon Pakai Pathen thuseihi ngaijun; Pakai Pathen'in molsang ho henga, lhangho henga, vadungho henga, phaicham ho henga, ahomkeova moh-umho henga, akidalhasa khopiho henga, akimvela Pathen helouho anchah le nuisat bep hiho henga hitihin aseije.

⁵Hijeh chun Pakai Pathen'in hitin aseije; tahbeh-a lungthim kipahtah le hatah-a noisena lungthim puma kagam agoulo dinguva amahole amaho chanvou akihoma Pathen helou chidang namdangho le Edom mite jouse douna-a kathangthipna meikonga kasei ahi.

⁶Hijeh chun Israel gamsung chungchanga gaovinlang, molsang ho henga, lhangho henga, vadungho henga, chule phaicham ho henga seipeh-in, Pakai Pathen'in hitihin aseije; vetan, nanghon Pathen heloute jum na chu napoh jeh uva, keiman kathangthipna le kalungsatna-a kasei ahi:

⁷Hijeh chun Pakai Pathen'in hitin aseije; Keiman kakhut kadomsangtan, tahbeh-a nakimvel uva um Pathen helouten ajumnau akipoh dingu ahi.

⁸Ahivangin nangho, vo Israel molsang ho, nanghon nabah hou chu nahin jam dohsah uva, nagao chu kami Israelte henga nasosah dingu ahi; ajehchu amaho ahung ding koncha ahitaove.

⁹Ijeh inem itile, veuvin, keima nangho ding kahin, chule naheng lamuva hungkile heijing ting, chule nangho kaibot le tu-a umding nahitaove:

¹⁰Chule Israel insung pumpile nabonchao chunga mihem kapunsah ding; chule khopiho chenna hikitna, achimsaho chu kisadoh kit ding ahi.

¹¹Chule keiman nachunga mihem le sahem kapunsah-a, amaho punguva ga ahinsosah dingu; chule keiman nachenna mun lui dungjuija kachensah-a, chule nahung kipat tila sanga phajoa kabol ding: chutengle keima Pakai kahi chu nahet ding ahi.

¹²Henge, keiman mihemte nachunga kachele sah ding, kami Israelte ngei chu nachung uva kachelesah ding; amahon nangma nahin lo dingu, nangma amaho goulo nahi ding, tua patna achate nasuhmang louding ahitai.

¹³Pakai Pathen'in hitin aseije; amahon nangma henga, Gamsung nangman mihem naval lhumin, nanam mihemho chate jouse nasumang tai, tia asei jeh-un;

¹⁴Hijeh chun nangman mihemho naval lhum kit louding, chule nanam mite chate jong nasuhmang kit louding ahitai, tin Pakai Pathen'in aseije.

¹⁵Keiman Pathen heloute jum na chu nangma-a um mite kajahdohsah louding, mipi ho seiset jong napoh kit louding, chule nanam mite lhuhna nasodohsah kit louding ahitai, tin Pakai Pathen'in aseije.

¹⁶Chukal valin Pakai thu chu kahenga ahung lhungin, hitin aseije,

¹⁷Mihem chapa, Israel insung chu amaho gamsunga anachen laiju chun, amaho le amaho deija achonnau le athilbolun hichu anasuboh-un: achonnau chu kamasanga numei athinei laija thenglou bangin anaumuve.

¹⁸Hijeh-a chu gamsunga thisan aso jeh-ule, semthu milim jeh-a gamsung asuhboh jeh uva, achunguva kalungsatna kasunlhah ahin;

¹⁹Chule keiman amaho Pathen heloute lah-a kathecheh-in, chuin gamdangho-a anakithe thangun ahi. Achonnau dungjuile anatoh-u dungjuija athu-u katan ding ahi.

²⁰Chule amaho achenna lamu, Pathen helouho gamsunga alut phatnun, chumuna miho chun amaho henga, Amahohi Pakai mite ahiuvin, ahivangin ama gamsunga kona potdoh ahitaove, ati tengule kamin theng asuboh-un ahi.

²¹Ahinla achena lam jouseuva, Pathen heloute lah-a asuhboh-u kamintheng chu khotona kaneijin ahi.

²²Hijeh chun Israel insung henga seijin, Pakai Pathen'in hitin aseije; Hichehi nangho jala kabol ahipoi, ahinla vo Israel insung, nangho Pathen helouho lah-a nache nalam channuva nasuh boh-u kamintheng jala kabol ahi.

²³Chule Pathen helou lah-a kisuboh, nanghon amaho lah-a nasuhboh-u, kamin loupitah chu kasuhtheng ding; chule Pathen helouho mitmu-a keima nangho-a suhtheng kahi tengle, Pathen hephalouhon Pakai Pathen kahi ahet dingu ahi, tin Pakai Pathen'in aseije.

²⁴Ajehchu, keiman nangho Pathen helouho lah-a kona kapuidoh-a, gamjouse-a kona kakhop khom ding, chule nagam uva kapuilut ding nahiuve.

²⁵Chutengle keiman nachung uva twitheng kachap khuma, nangho nangim dingu ahi. Nathen lounao jouse-a konle namilim semthu-u jouse-a kona keiman nangho kasuhngim ding nahiuve.

²⁶ Lungthim thah kapeh uva, lhagao thah nasunguva kakhum peh ding; chule keiman natahsaova kona song banga tah lungthim chu kalah doh-a, tahsaphe lungthim kapeh ding nahiuve.

²⁷Chule keiman kalhagao nasunguva kakhuma, kadan kisunho-a kachonsah dingu, chule nanghon kathutanho nanit uva, hichu nabol dingu ahi.

²⁸Chule napu napateu kanapeh gamsunga nachen dingu; nangho kamite nahiuva, chule keima na Pathen'u kahi ding ahi.

²⁹Keiman nangho nathenlounao jouse-a kona jong kahuhdoh dingu: chule changle mim kakouva kapunsah ding, chule nachung uva kel kachuhsah louding ahitai.

³⁰Chule Pathen heloute lah-a kellhah jeh-a jum na nato kitlouna dinguva, keiman thingphung ga le lousoh ga kapunsah ding ahi.

³¹Chutengle nanghon nagitlou nao lampiho, chule nanatoh-u phalouho chu nahin kigeldoh uva, chule nakhan gitlounao hole thet umtah nahinahou jouse jeh-a nangho le nangho mitmu jenga jong nakikidah dingu ahi.

³²Nangho jala hichehi kabol ahipoi, nanghon kihet un, tin Pakai Pathen'in aseije, Vo Israel insung, nachonnahou jeh-in jahchaovin chule kisudongun.

³³Pakai Pathen'in hitin aseije; Keiman nangho nachonkhelna hou jouse-a kona kasuhtheng nikho tengle, keiman nangho khopi sungho-a jong kachensah uva, chule achimsaho jong kisadoh kit ding ahi.

³⁴Chule apal leho jouse mitmu-a kamhel, akamhela um gam chu kilhou kit ding ahi.

³⁵Chule amahon, Hiche akamhel anahisa gam chu Eden hon abang jeng tan; chule agoh-a um le anakamhel chule anakisusesa khopiho chu kul kikai khum le chenna ahung hitai, tia asei dingu ahi.

³⁶Chutengle nakimvela um akidalha Pathen hephaloute chun, Pakai keiman akisuse munho chu kasemphatna, akamhelsa chu kaphudoh ahi ti ahet dingu ahi. Keima Pakaiyin kaseidoh ahin, chule hichu kaboltei ding ahi.

³⁷Pakai Pathen'in hitin aseije; keima hiche dingle, hiche hi amaho dinga tohdohpeh ahina dinga Israel insungin eidoh nahlai dingu ahi; keiman amaho chu kelngoihon banga mihem'a kapunsah ding ahiuve.

³⁸Kelngoihon theng tobanga, kut thupi laija Jerusalem'a kelngoihon tobanga; chutia chu agoh-a umsa khopiho chu mihem ahon honna kisudim ding; chutengle amahon keima Pakai kahi chu ahet dingu ahi.