Read Thado Chin Ezekiel 37 Bible Online

Ezekiel 37 - Thado Chin bible

Ezekiel 37

¹Pakai khut chu kachunga ahung chun, chuin Pakai Lhagaovin eipuidoh-in, chule guho dimsetna aumna phaicham lailunga eikoijin,

²Chuin alah uva chun eiche kimvelsah len; chule veuvin, chuche phaichama chun gu atama tam aumin, chule veuvin, agoset jenguvin ahi.

³Chuin aman kahenga, mihem chapa, hiche guhohi ahingthei diuvem? ati. Chuin keiman, Vo Pakai Pathen nangman nahenai, tin kadonbutne.

⁴Avelin kahenga hitin aseije, hiche guho henga hin gaovinlang, ajah uva seijin, Vo nangho gu gosaho, Pakai thuhi ngaijuvin.

⁵Pakai Pathen'in hiche guho henga hitihin aseije; veuvin, keiman nasunguva haitheina hu kalutsah ding, chule nangho nahin dingu ahi.

⁶Chule keiman nachung uva thagui ho kalhuna, phe kahin besah ding, chule nangho vunna kahintoma, nasunguva haitheina hu kakhum ding; chule nangho nahung hin uva, keima Pakai Pathen kahi chu nahet dingu ahi.

⁷Hitichun keima eikithupeh dungjuijin gaothu kaseitan ahi. Chuin keiman gaothu kasei chun, husa khat ahung gingin, chule veuvin ahung gingpoh sotsotnin, chuin guho chu ama ama gucheh-a ahung kisuto uvin ahi.

⁸Chuin keiman kaven ahile, veuvin, thajung ho le phe chu achunguva ahung umin, chule vunin amaho chung chu ahin tomtan: ahinla amaho sunga chun haitheina hu aumpon ahi.

⁹Chujouvin aman kajah-a, mihem chapa, hui jah-a chun gaothu seijin, gaovin, hui jah-a chun seijin, Pakai Pathen'in hitin aseije; Kolning li-a konin hungin, vo haitheina hu, hiche thilongho hi ahin theina dingun hai khumin, ati.

¹⁰ Hitichun aman eithupeh bangin gaothu kaseitai, haitheina hu chu amaho sunga ahung lutnin, amaho ahung hingdoh taovin, ahung dingdoh uvin ahile, sepaihon tamtah ahiuvin ahi.

¹¹Chuin aman kahenga, Mihem chapa, hiche guhohi Israel insung pumpi chu ahiuve; Ven, amahon, kaguhou agolhan, chule kakinepnao amangtai, keiho ahal halla sattel kahitaove, tin aseijuve.

¹²Hijeh chun gaovinlang ahenguva hitin seijin, Pakai Pathen'in hitihin aseije; Veuvin, Vo kamite, keiman nalhankhuh hou chu kahona, chule nalhanhouva kona nangho kahung dohsah dingu, chule nangho Israel gamsunga kahin puilut dingu nahiuve.

¹³Chule keiman nalhankhuh hou kahin honna, Vo kamiteho, nalhankhuh houva kona kahin puidoh tengule, keima Pakai kahi nahetdingu ahi.

¹⁴Chule kalhagao nasunguva kakhuma, nahin dingu, keiman nangho nagamsung tah uva kakoi dingu; chuteng nanghon, Pakai keiman hichu kasei ahitan, chule hichu kabol ahitai, ti nahet dingu ahi, tin Pakaiyin aseije.

¹⁵Pakai thu chu avelin kahenga ahung lhungin, hitin aseije,

¹⁶Chukalvallin, mihem chapa, tenggol khat lanlang, achunga chun Judah le akiloipi Israel chate ding tin sunin; chujou tengle tenggol chomkhat lanlang, achunga chun, Joseph ding, Ephraim tenggol, chule akiloipi Israel insung pumpi ding, tin sunnin.

¹⁷Chule hiteni chu khatle khat jopmin lang, tenggol khat hisah-in, chule hiteni chu nakhutna khat hungsoh lhon ding ahi.

¹⁸Chule namite chatehon nahenga, Hichehi ipi natina ahi keiho neivetsah lou dingu ham? ati tengule,

¹⁹Ahenguva seipeh-in, Pakai Pathen'in hitin aseije; Veuvin, keiman Ephraim le agolho Israel phungho khutna um Joseph tenggol chu kalah-a, hiho chu Judah tenggol ngei chutoh kakoikhom ding, hiche teni chu tenggol khat kasoa, hiteni chu kakhutna khat hiding ahi.

²⁰Chule nangman achung najih tenggol teni chu amaho mitmu tah-a nangma khutna umding ahi.

²¹Chule amaho jah-a seijin, Pakai Pathen'in hitin aseije; Veuvin, keiman Israel chate chu Pathen heloute lah-a agachenau munho-a kona kalahdoh ding, chule amaho ningtina kachom khoma, chule amaho chu amaho gamsung ngeija kalhut ding ahi.

²²Chule keiman gamsunga chu, Israel molsang ho chunga amaho chu nam khatna kasema, leng khat chu amaho jouse dinga alengpau hiding; chule amaho chu nam ni hitalou ding, chule lenggam ni-a a-itih-a kikhen kit talouhel ding ahiuve.

²³Ahiloujongle amaho chu asemthu-u milimho ningset umtah thilho le achonkhelna houva jong amahole amaho kisuboh talou dingu; anachon setnaova achennao munho-a kona keiman amaho kahuh doh-a, kasuhtheng dingu ahi. Chutia chu amaho kamite hiuva, keima a-Pathen'u kahi ding ahi.

²⁴ Chule kasoh David chu amaho chunga leng hiding; abonchauva kelngoiching khat anei dingu ahi. Amaho chu keima thutan danho-a chonuva, kadan kisunho anitdiu, chule hiho chu atohdoh dingu ahi.

²⁵Chule amaho chu keiman kalhacha Jacob kanapehna, napu napateu anachenau gama chu cheng diu; chule hia chu amaho, amahotah chule achateu, chule achateu chate a-itih-a chenguva, kasoh David chu a-itih-a apipu-u hiding ahitai.

²⁶Chukalvalla keiman amahotoh chamna thulhun kasema, hichu amahotoh a-itih-a thulhun hiding; chule amaho kachensah-a, chule kapunsah-a, alah uva atonsotna kamun theng katundoh ding ahi.

²⁷ Kahoubuh jong amahotoh umkhom ding; henge, keima amaho Pathen kahia, amaho kamite hidingu ahi.

²⁸ Chule kamun theng chu amaho lahtah-a a-imatih chana aumtengle, Pathen helouhon Pakai keiman Israel kasuhtheng ahi ahet dingu ahitai.