Read Thado Chin Ezekiel 38 Bible Online

Ezekiel 38 - Thado Chin bible

Ezekiel 38

¹Chuin Pakai thu chu kahenga ahungin, hitin aseije,

²Mihem chapa, Meshech le Tubal vaipo pipen Magog gama Gog lam chu maingatnin lang, ama dounan gaothu seijin,

³Chule seipeh-in, Pakai Pathen'in hitihin aseije; Vo Gog, Meshech le Tubal pipu, ven, keiman nangma kadou nahi.

⁴Chule keima nangma ka nungchon kitding, chule nakhalhang teni-a ngakoi kakoija, nangma galsat mihon jouse, sakol ho le sakol chungtouho, galvon jat kima kivonho jouse, lum le pho tho-a chemjam kichoija mihonpi ho chu aboncha keijuva kahin puidoh ding ahi.

⁵Persia, Ethiopia chule Libya toh pangkhom, abonchauva lumle thih lukhuh tho cheh;

⁶Gomer le aloiho jouse, sahlam sanga Togarmah insungmite le apankhom piho; chule mipi tampi tah-in aumpiho.

⁷Kigosan umin, nangle nang, nangmale nahenga kikhom naloiho jouse kigochaisan umun, chule nangma amaho ngahtupmin pangin.

⁸Ni tampi joule nakivil ding; ninunung lamle, chemjam'a kona kinung puidoh-a, mipi tampiho lah-a kona kichom khom ho chenna mun, sottah kamhela anaum Israel molsang ho dou dinga nahung kon ding ahi; amaho chu namtin lah-a kona kihin puidoh ahin, amaho abonchauvin bitkeichan achengun ahi.

⁹Nangma huipi le gopi banga nakal touva nahung ding, nangmale naloiho jouse, chule nangma toh um mihonpi chu agam khujouhel ding meilompi tobang nahidingu ahi.

¹⁰Pakai Pathen'in hitin aseije; chule hung hitiding ahi, hiche nikhotah chule nalungsunga lunggel tamtah hungsoh doh ding, hiche phat mama chule lunggel gilou khat nahin gelding ahi.

¹¹Chuteng nangman seijin natin, Keima kulpibei khoho-a chetou vingting; mongtah-a uma, bitkeija chengho, aboncha keijuva kulbang bei, kotgolhole kotpiho jong neilouho henga chengting;

¹²Galthil kichomdoh ho ladingle, anchah lading; chule agoh-a anaumsa tu-a mi chenna mun, namtin lah-a kona kichom khom mite chenna mun, gam lailung tah-a cheng, ganchale thilkeo haotahho, chunga kakhut kalap ding ahi nati.

¹³Sheba le Dedan chule Tarshish sumkolvei ho, amaho keipi bahkai chal donglai jouse chun nahenga, Galthil chom dinga hung nahim? mihonpi chu thilkeo podinga nakou khom ham? sanale dangka pomang dinga, ganchale thilkeo pomang dinga, thilchom tamtah podinga nahung ham? atidiu ahi.

¹⁴Hijeh chun mihem chapa, gaovinlang Gog henga hitihin seijin, Pakai Pathen'in hitin aseije; Kami Israelte bitkeija achen nikho tengule, nangman nahetlou dingham?

¹⁵Chule nangma naumna sahlam gamho-a kona, nangle naumpi mipi tamtah, sakol chungtou cheh, mipi tamtah le galmi hattahho toh kilhona nahungdoh ding ahin,

¹⁶Chule nangma kami Israelte kidoupi dinga, meilhangin gamsung akhu banga nahung kon ding; ninunung lamle hiti ding ahi, Vo Gog, kagam doudinga nangma kahinpui ding, Pathen heloute mitmu-a nangma-a kona suhthenga kaumteng, amahon Pathen kahi ahet dingu ahi.

¹⁷Pakai Pathen'in hitin aseije; malaija keiman kasoh Israelte themgaoho kama kanaseisa, amahon kum tampi nikhoho sunga gaothu anaseiju, amaho kidoupi ding kahinpui ding ahi tia kanaseipa chu nangma nahi louham?

¹⁸Chule Israel gamsung doupi dinga Gog ahungtengle, chuche phattahchule hung hitiding ahi, kalungsatna chu kamaija hung kilangdoh ding ahi, tin Pakai Pathen'in aseije.

¹⁹Ajehchu kathangthipna le kalunghana meikouva kasei ahi, tahbeh-in hiche nikho chule Israel gamsunga nasatah-a tijat umtah ling kihot ding ahin;

²⁰Chutia chu twipia ngaho, chunga leng vachaho, gama gamsaho, a-opma tolla kithol ganhing jouse, leiset chunga um mihem kiti jouse chu kamai koh-a kihot hot dingu, molsang ho kisunema, kolho lhanem suh ding, chule kulbang jouse chimlha ding ahi.

²¹Chule keiman Gog kidoupi dinga kamolsangho jouse-a kona chemjam kakou ding, mijousen asopi chunga chemjam alap ding ahi, tin Pakai Pathen'in aseije.

²²Chule hise le thisanna athu katan ding; amale ahonho, chule aumpi tamtah ho chunga alonglet jeng gotwi, song lentah ho, meikou, chule kat kajuhsah ding ahi.

²³Chutia chu keima kei le kei kakichoisanga, chule kakisuhtheng ding; namtin vaipi mitmu-a het kahi ding, chule amahon keima Pakai kahi chu ahet dingu ahi.