Read Thado Chin Ezekiel 39 Bible Online

Ezekiel 39 - Thado Chin bible

Ezekiel 39

¹Hijeh chun, nangma mihem chapa, Gog dounan gaothu seijin, chule hitihin seijin, Pakai Pathen'in aseije; Meshech le Tubal pipu pen O Gog, ven, keiman nangma kadou nahi.

²Keiman nangma kanungno kitna, nangma-a um hop gupma hopkhat kadalhah sah-a, sahlam gambehho-a kona nangma nahungtouva, Israel molsang ho chunga kahinpuiding nahi.

³Chule keiman nakhut veilama um nathalpi chu kajepset peh-a, nathal changho chu nakhut jetna kona kakhehlhah sah ding ahi.

⁴Nangma Israel molsang ho chunga nalhuh-a, nangma le naloiho jouse, chule naumpi mipite jouse nalhuh dingu; keiman nangma sahingne vacha namkim le gama saho valhum dinga kapeh ding nahi.

⁵Nangma gam ong laija nalhuh ding ahi: ajehchu keiman kasei ahitai, tin Pakai Pathen'in aseije.

⁶Chule Magog chungle twikol sunga olmo louva chengho lah-a meikou kasol ding; amahon keima Pakai kahihi ahet dingu ahi.

⁷Chutia chu keiman kamin thenghi kami Israelte hetna kaumsah-a; kamintheng chu amaho kasuhboh sah kit louding ahitai. Chule Pathen helou ten keima Pakai, Israel mithengpa kahi chu ahet dingu ahi.

⁸Veuvin, hichehi aguilhungin, akitong dohtai, tin Pakai Pathen'in aseije, hichehi keiman kanaseidohna nikho chu ahi.

⁹Israel khopiho sunga chengho chu potdoh uva, gal manchah ho, lum le phoho, thalpi le thalchang ho, chule tengpaineiho le tengcha ho chu meija ahaluva, hiho chu kum sagi meija akiti dingu ahi.

¹⁰Chutia chu gama kona thing achomlou dingu, gamanga kona jong thing khatcha atuhlhuhtah loudingu ahi: ajehchu amahon gal manchah ho chu meija akiti dingu; amaho sumangho chu amahon asuhmang dingu, amahon asuhsethou chu achomgam dingu ahi, tin Pakai Pathen'in aseije.

¹¹Chule hiche niteng chule hung hiti ding ahi, keiman Israel gamsung, twipi solama vahle ho phaicham kiti chu, Gog lhankhuh mundinga kapeh ding; hichun vahle ho lampi ahuh ding, chule chuachu amahon Gog le amihonpi jouse avui dingu: hiche mun chu Hamon-Gog phaicham asah dingu ahi.

¹²Chule gamsung chu suhtheng ahina dinga, lhasagi jen Israel insung chun amaho chu avui dingu ahi.

¹³Henge, agama mipite jousen amaho avui dingu; keima choisanga kaumna dinga hichu amaho dinga minthana nikho khat hiding ahi, tin Pakai Pathen'in aseije.

¹⁴Chule gamsung suhtheng nadinga, vahle ho to kitho-a gamsung chonchaija leichunga umnalai thilongho holdoh-a vuidinga, natoh-a neiding mi alhendoh diu; lha sagi joule akholpat diu ahi.

¹⁵Chule gamsunga vahle ho mi khat touvin mihem gu amuteng, avui dinghon Hamon-Gog phaichama avui kahseuva melchihna khat atundoh dingu ahi.

¹⁶Chujongle chuche khopi min chu Hamonah hiding ahi. Hiti achu amahon gamchu asuhtheng dingu ahi.

¹⁷ Chule nangma mihem chapa, nangman chungleng vachate jouse le gama gamsaho jouse henga hitin seijin, Nangho kikhom khomun lang hunguvin; kaganlhaina, nangho ding katodoh ganlhaina, Israel molsang ho chunga ganlhaina lentah kabolna-a, saphe naneh uva, thisan nadon theina dingun, nangho ningtina konin hung kikhom khomun, tin Pakai Pathen'in aseije.

¹⁸Nanghon mihat ho sa naneh uva, chule leiset vaipipo ho thisan, abonchauva Bashan'a kivah thaochet kelngoichalho, kelngoinou ho, keltahho, bongchalho thisan nadon dingu ahi.

¹⁹Chule nangho dinga ganlhaina-a katodoh ganlhaina chu nanghon navaset kahseuva athao naneh dingu, chule nakhamset kahseuva thisan chu nadon dingu ahi.

²⁰Chutia chu nangho kadokhang chunga sakolhole sakol kangtalai ho, mihat ho le gal hat ho sa naneh vaset dingu ahi, tin Pakai Pathen'in aseije.

²¹Chule kaloupina chu Pathen helouho lah-a katundoh ding; chuteng Pathen heloute jousen kathutana kamolso le achunguva kakhut kalhah chu amu dingu ahi.

²²Hiti achu Israel insungin chunikho-a patle akalsea chu Keima Pakai, amaho Pathen kahi chu ahet dingu ahi.

²³Chule Pathen heloute chun Israel insung chu akhangit lounao jeh-a gal hinga kikai anahiuve ti ahet dingu ahi. Ajehchu amahon keima dounan asukhelun, hijeh-a chu amaho-a kona kamai kasela, chule amaho chu amelmateu khutna kanapehdoh ahin; chutiachu amaho chemjam'a louva ahiuve.

²⁴Athenlou nao le asuhkhel nao dungjuija kanabola, amaho-a kona kamai kanasel ahi.

²⁵Hijeh chun Pakai Pathen'in aseije; tuahi keiman Jacob chu asohchanna-a kona kahinlepui kitna, Israel insung pumpi chunga hepina kanei ding, chule kamintheng dinga katompan ding ahi;

²⁶Amahon ajachatnau, keima douna-a suhkhelna-a asuhkhelna hou jouse akipohjou uva, aleisetnuva bitkeija achen tengule, koimachan akichatsah lou dingu ahitai.

²⁷Keiman amaho mipite-a kona kahin puikitna, amelmateu gama kona kahin chopkhoma, chule nam tamtah mitmu-a amaho-a keima kahung umtengle,

²⁸Chuteng amahon keimahi Pathen heloute lah-a amaho sohchang dinga pedohpa, ahivanga agamsung tah ngeijuva hin chomkhom kit, khatcha sohchanga dalhah-a umdensah loupa Pakai amaho Pathen kahi chu ahet dingu ahi.

²⁹Keiman amaho-a kona kamai jong kaselkit tahlou ding ahi: ajehchu keiman kalhagao chu Israel insunga kabuh lhah ahitai, tin Pakai Pathen'in aseije.