Read Thado Chin Ezekiel 4 Bible Online

Ezekiel 4 - Thado Chin bible

Ezekiel 4

¹Mihem chapa, nangman leingan kigoutah khat lanlang, hichu namasanga koijin, chule hiche chunga chun khopi lim, Jerusalem lim chu semin.

²Chule hichu galmiho umkimvel sah inlang, hiche khopi dounan kulbang sah khumin, chule adounan molsang khat tundoh khumin lang, gebuh jong sah khumin, chule akimvela chun kulbang suhsetna manchah ho tung doh-in.

³Chukal valin nangman thihpheng tupeh khat lanlang, hichu nangmale hiche khopi kah-a chun thihbang kidal bangin dalin; chule hiche lam chu mai ngatnin, chule hichu ki-um kimvel ding, nangman naum kimvel ding ahi. Hichehi Israel insung dinga melchihna hiding ahi.

⁴Naveilam pang delphan lumin, chule hiche chunga chun Israel insung khangitlouna ho chu koijin; chutobanga hiche chunga nalup nikho jat dungjuija chu nangman amaho khan gitlouna chu napohpeh ding ahi.

⁵Ajehchu anikho jat dungjuija ni jathum le somko, keiman nachunga akhansetnao kumho chu kakoi ahitai. Hitia hi nangman Israel insung khan gitlouna chu napoh ding ahi.

⁶Chule nangman hiho chu nasuhbulhit tengle, nangma najetlam panga nalup kitna, chule Judah insung khan gitlouna chu nisomli napoh ding ahi. Keiman nangma dinga nikhat chu kum khatna kasimpeh nahi.

⁷Hijeh-a chu nangman Jerusalem ki-um kimvel lam chu namai ngat ding, chule naban chu nahodoh-a, hiche khopi douna-a chu gaothu naseiding ahi.

⁸Chule ven, keiman khaohol ho-a kakanna, chule naki-um kimvelna nikhoho nasuhbei kahse-a, nangma langkhatna kona langkhatna kihei theilouva naum ding ahi.

⁹Chujongle nangman, suhlouchang le sakolchang, chule bepi le bepal, chule butun le lengmusel lan lang umbel khatna koijin, chule hicheho-a kon chun nasih-a nalup ding nikhoho dungjuijin changlhah kisemin, hichu nikho jathum le somko sunga chu nangman naneh ding ahi.

¹⁰Chule nangman nikhatna nanehding anchu agihdan shekel somni hiding; chule aphat phatna hichu naneh ding ahi.

¹¹Nangman twi jong teptena neija nadon ding, hin dimkhat hopgupma kihom hopkhat hiding; hichu aphat phatna nadon ding ahi.

¹²Chule nangman amaho mitmu dinga mihem'a kona hungdoh eh chu changlhah-a nakana, hichu sakol changa kisem changlhah banga naneh ding ahi, ati.

¹³Chuin Pakaiyin aseije, Hitobanga chu Israel chaten, keiman amaho kanodohna chidang namdangho lah-a chu suhbohsa changlhahho aneh dingu ahi, ati.

¹⁴Hichun keiman, Pakai Pathen, vetan, kahinna suhboh-in ana um khapoi; ijeh inem itile kakhang dona pat tuchan geijin athikam, ahiloule akimaltelsa kiti kanehih laije; kakam sunga jong thet um saphe alutkha hih laijin ahi, tin kaseitai.

¹⁵Chuin aman kahenga aseijin, Ven, mihem eh khelin bong eh kape-e, nangman hichea chu changlhah nakisem ding ahi.

¹⁶Chukalvalin aman kahenga aseijin, Mihem chapa, vetan, keiman Jerusalem'a changlhah hung kipohlutna bul chu kasuhtan ding; chule amahon changlhah agih-a ateova chule itcha tah-a aneh dingu; chule amahon twi jong teptena neija chule kidang satah-a adon dingu ahi.

¹⁷Chutia chu amahon changlhah le twi ahin ngaichat uva, chule khatle khat kidatmoto diu, akhan gitlounao jeh-a mangthah diu ahi.