Read Thado Chin Ezekiel 40 Bible Online

Ezekiel 40 - Thado Chin bible

Ezekiel 40

¹Kasoh channau kum somni le kum nga, alha sunga nisom lhin nikho, khopi suhsetna ahung umjoukal kum somle kum li lhin nikho tah-in, Pakai khut chu kachunga ahung kingamin, chule keima khulama eipuitai.

²Chuin Pathen'a kon muneinaho-a chun, aman keima Israel gamsunga eihin puitan, chule lhanglam sanga khopi khat bang jeng molsangtah khat chunga eitousahtan ahi.

³Chuin aman keima chumun chu eilhuttan, veuvin, chuachun alimso sum-eng bang jeng, akhutna tupat khaojang khatle thil tena penglhon khat choi mipa khat anaumin, kotpi-a chun anadinge.

⁴Chuin mipa chun kahenga, Mihem chapa, keiman nangma kavetsah dingho jousehi namit tenin ve-inlang, nanakhang tenin ja-in, chule kavetsah ding jousehi nalung gilin ngaiton; ajehchu hicheho chu nangma vetsah ding ngaitona-a nangma hilama kipui nahin; nangman namuho jouse chu Israel insung henga naphondoh ding ahi, tin aseije.

⁵Chule veuvin, a-in kimvela chun bang khat aumin; chule mipa chun akhutna thil tena pengmol tong gupma sao achoijin, khatcheh chu tongkhat cheh mihem khut chan chet ahin; hitichun aman in bang sadan chu aten ahile pengmol khat ahin, chule asandan jong pengmol khat ahije.

⁶Chujouvin ama solam maingat kotpi-a chun ahungin, chuche kalbiho chu ajot touvin, kotpi phung chu aten ahile, tena pengmol khatnin alenin, chule kotpi phung dang chu pengmol khatma-in alenin ahi.

⁷Chule indan neo jouse chu pengmol khat asao cheh-in, pengmol khat alen cheh-in; chule indan neoho kikah chu tong nga ahicheh-in, chule kotpi sungnung hongcha-a kotpi phung chu pengmol khat ahi.

⁸Aman kotpi sungnung hongcha jong agaten, pengmol khat ahi.

⁹Chujouvin aman kotpi hongcha chu aten, tong get ahin; chule hichea akhomho chu tong ni ahi. Kotpi hongcha chu sunglama aume.

¹⁰Chule solam kotpi indan neoho chu hilam panga thum aumin, chule khulam panga thum aume. Hiche thumho chu akibang cheh uvin; chule akhomho chu alangto-in akibang cheh-in ahi.

¹¹Chule aman galutna lai kotpi chu availam aten ahile tong som ahin, chule kotpi dunglam chu tong somlethum ahi.

¹²Indan neoho maija chun mun ong aumin, hiche chu hilam panga tong khat, chule khulam panga tong khat ahi; chule indan neoho chu hilam pang tong gup, khulam pang tong gup cheh ahi.

¹³Chujouvin aman kotpi chu indan neo khat tingvuma patnin adang khat tingvum chan geijin aten ahile, kotle kot kikah letdan chu tong somni le tong nga ahi.

¹⁴Aman kotpi kimvela inhongsung khom gei tah-a chun khom tong somgup jong asemin ahi.

¹⁵Chule galutna kotpi maitah-a kipat, kotpi sungung hongcha mai gei chu tong somnga ahi.

¹⁶Kotpi sunglam kimvela khomho geijin indan neoho-a chun bangkot neoho aumpeh-in, kemho-a jong hitobangma chu ahi; asunglam kivela jong bangkot ho aumin, khom khat cheh chunga chu tumthing aum cheh-in ahi.

¹⁷Chujouvin inhong ponung lama eipuitan; veuvin hia chun indanho, chule inhongsung kimvel dinga kisem keng lampi aumim; indan somthumin keng lampi chu amaingatnin ahi.

¹⁸Chule keng lampi kotpiho panga um ahin, kotpi sao dung juija kilhunga, hichu keng lampi noinung hija ahi.

¹⁹Chujouvin aman kotpi noinung masang lama patnin sunglam inhong ponung geijin avai chu aten, solam pangle sahlam pang gei chu tong jakhat ahi.

²⁰Chule inhong ponung sahlam nga-a kotpi khat aumin, aman adung le avai aten ahi.

²¹Chule chuche indan neochaho chu hilam panga thum, khulam panga thum aumim, chule chuche akhomhole kem kidoho chu adung avai kotpi masapena toh akibangin; hichu adung tong somnga, chule avai tong somni le nga ahi.

²²Chule abang kot ho, kem kidoho, atumthingho chu solamsang nga-a kotpiho to kibang ahi; hichu kalbi sagi-a kaltou ahin, chule kem kidoho chu amasanga chun aume.

²³Chule inhong sungnung kotpi chu solam kotpi banga, sahlam ngat kotpi toh kimai ngat ahin, chule aman kotpile kotpi kah aten ahile, tong jakhat ahi.

²⁴Chujou phatnin aman lhanglam sanga eipuitan; chule veuvin, chukoma chun kotpi khat aumin lhanglam sanga angan ahi. Chuin aman chuche-a akhomhole kem kidoho chu hiche tenaho dungjui chun aten ahi.

²⁵Chule hiche sunga chun bangkot ho aumin, chule chuche bangkot ho tobang chun kemkidoho chu akimvela aume; adunglam chu tong somnga ahin chule avai tong somni le tong nga ahi.

²⁶Chule chua chetouna ding chun kalbi sagi aumin, chule kem kidoho chu hicheho masanga chun aume. Chule chuche-a khomho chunga chun tumphungho aumin, hilam panga khat chule khulam panga khat aume.

²⁷Chule inhong sungnunga chun lhanglam sang nga-a kotpi khat aumin; chule aman lhanglam sang kotpi phunga pat kotpi phung chu aten ahile, tong jakhat ahi.

²⁸Chuin aman keima lhanglam kotpi-a inhong sungnunga eipuijin; chuin aman lhanglam sang kotpi chu hiche tenaho dungjui chun aten ahi.

²⁹Chule indan neoho le akhompiho, chule kem kidoho chu hiche tenaho dungjuijin aten; hiche-a chun bangkot ho aumin, chule akimvela kem kidosangho-a jong chun bangkot aumin ahi; hichu tong somnga asaovin, chule tong somni le tong nga alenin ahi.

³⁰Akimvela chun kem kidosang aumin, tong somni le tong nga asaovin, tong nga alenin ahi.

³¹Chuche kem kidosangho chun inhong ponung lam chu amaingatnin, chule akhompiho chunga chun tumthingho aumin, chule chua gakaltouna chun kalbi get aneije.

³²Chule aman keima solamsang nga-a inhong sungnung lama eihin puijin; chule aman hiche tenaho dungjuijin kotpi chu aten ahi.

³³Chule indan neoho le akhompiho, chule kem kidosangho chu hiche tenaho dungjuijin aten ahi. Chule hiche-a chun bangkotho aumin, chule akimvela kem kidosangho-a jong chun bangkot aumin ahi; hichu tong somnga asaovin chule tong somni le tong nga alenin ahi.

³⁴Chule chuche kem kidosangho chun inhong ponung lam amaingatnin, chule akhompiho chunga chun tumthingho hilam pangle alangkhat panga aume; chule chua gakaltouna chun kalbi get aneije.

³⁵Chuin aman keima sahlam kotpi-a eipuijin, chule hichu hiche tena ho dungjuija chun aten,

³⁶Chule indan neoho le akhompiho, chule kem kidosangho jongchu aten ahi. Akimvela chun bangkot ho aumin, asaodan chu tong somnga ahin avai tong somni le tong nga ahi.

³⁷Chule khompiho chun inhong ponung lam amaingatnin, chule chuche khompiho chunga chun tumphungho hilam pangle khulam panga aume; chule chua gakaltouna chun kalbi get aneije.

³⁸Chule indanhole chuche-a lutnaho chu kotpi khomho panga chun aumin, hia chun amahon govam thilto asop uvin agou jiuvin ahi.

³⁹Chule kotpi hongcha-a chun hilam panga dokhang ni, khulam panga dokhang ni, halvam thilto le suhkhel thilpeh chule suhkhel thilpehho thana ding aumin ahi.

⁴⁰Chule khattou sahlam kot galutna geija achetoule, polam panga chun dokhang ni aumin, chule kotpi hongcha lang khat panga dokhang ni aumin ahi.

⁴¹Kotpi pang hilam sanga dokhang li, chule khulam sanga dokhang li aumin; hiche dokhang getho chunga chun amahon aganlhaina hou athat jiuvin ahi.

⁴²Chua chun govam thiltona ding songa kikheng dokhang li aumin, dokhangho chu tong khatle akeh asaovin, tong khatle akeh alenin, tong khat asangin; chuche chunga chun amahon govam thilto le ganlhaina athanajiu manchah ho chu akoijun ahi.

⁴³Chule asung kimvela chun khutpeh tebep koikaho akilbeh kimvelun, chule dokhangho chunga chun thilto sa chu aumin ahi.

⁴⁴Chuche kotpi sungnung polama chun inhong sungnunga lasaho dingin indanho aumin, khatchu sahlam kotpi panga umin lhanglam angan, chule khat chu lhanglam kotpi panga aumin sahlam angan ahi.

⁴⁵Chuin aman kahenga, hiche indan lhanglam maingat hi, hiche in ngahtupma pang thempu ho-a ahin;

⁴⁶Chule indan sahlam maingat hi maicham ngahtup thempu ho-a ding ahi; amahochu Levi chapateho lah-a Zadok chapate, Pakai jen dinga aheng hin nailut ho chu ahiuve, tin aseije.

⁴⁷Hitichun aman inhong chu aten, ningli ahin, tong jakhat asaovin, tong jakhat alenin ahi. Chule maicham chu in maija chun aumin ahi.

⁴⁸Chuin aman keima houin hongcha-a chun eipuijin, chuin hongcha khom jouse chu aten, hilam sang tong nga chule khulam sang tong nga ahin; chule kotpi chu avai hilam sang tong thum, khulam sang tong thum ahi.

⁴⁹Hongcha chu adung tong somni ahin, chule availam chu tong somle tong khat ahi. Chule aman amaho agakaltouna jiu kalbiho-a chun eihin puijin, chule khomho panga chun khompiho hilam panga khat chule khulam panga khat aumin ahi.