Read Thado Chin Ezekiel 42 Bible Online

Ezekiel 42 - Thado Chin bible

Ezekiel 42

¹Chujouvin aman keima sahlam sanga patnin inhong ponunga eipui doh-in; chule aman keima in kisa maitoh kigalsai sahlam sanga mun kikhendoh indanho sunga eipuilut tai.

²Tong jakhatna sao masanga chun sahlam sang kotpi chu aumin, chule availam chu tong somnga ahi.

³Inhong sungnung tong somni maingat, chule inhongsung ponung keng lampi-a chun kempumle kempum kimai ngatnin dan thum cheh-in aumin ahi.

⁴Indanho masanga, sunglam jotna-a chun lampi availam tong soma len le, adunglam tong khatna len aumin, chule akot ho chun sahlam angan ahi.

⁵Tun indan chungnung joho chu anemjep uve, ajehchu kem kidosangho chu in kisa anoinung le alailha penho sangin asangjon ahi.

⁶Ajehchu amaho dan thuma um ahiuvin, ahinla inhongsung khompiho bangin khomho aneipouve; hijeh chun in kisa indan chungnung pen chu tolla patna anoinungpen le alailha penho sangin ajum jouve.

⁷Chule indanho toh kingatto chule indanho maija inhongsung ponung lam sanga bang ponung chu, adung tong somnga ahi.

⁸Ajehchu inhong ponung sunga indanho adung tong somnga ahi, chule veuvin houin mai chu tong jakhat ahi.

⁹Inhon ponunga kona mihem dia aban chelutna ding hiche indan noiho-a kon chun solam sanga lutna chu aume.

¹⁰Indanho chu mun kikhen doh jonna, chule in kisa masanga solam sanga inhong dung bang satah-a chun aume.

¹¹Chule amaho masanga lampi chu sahlam sanga indanho asaojedan le aletdan limso bangin akilange, chule potdohna ho chu akot ho dungjui le alimsoho dungjuija um ahi.

¹²Chule indanho-a kot ho dungjui chun, lhanglam sanga lamlhongpia chun kot khat aumin, khattou chuche sunga agalut tengle solam sanga bang maitah-a chun lamlhah khat aume.

¹³Chujouvin aman kahenga, sahlam sanga indanho le lhanglam sang indanho, mun kikhen doh toh kingatto chu indan thengho, Pakai heng jotlutna thempu hon thiltheng chung nungho anehna dingu mun chu ahi; chuachu amahon thilthengpen, chule anneh thilpeh, chonset thilpeh, chule suhkhelna thilpeh chu akoi dingu ahi. Ajehchu amun chu muntheng ahi.

¹⁴Chule hiche sunga chu thempuho alut tengule, amaho chu munthenga kona inhong ponung sunga potdoh lou dingu, amavang hiche laija chu amahon anaman chah-u avonhou chu akoilhah dingu ahi; ajehchu hicheho chu atheng ahin: chule amaho mipi anga ache masang uva amahon von dangho akivontei dingu ahi, ati.

¹⁵Tun aman insung atejou phatnin, keima solamsang ngat kotpi lama chun eihin puijin, chule aning jouse chu aten ahi.

¹⁶Aman thil tena pengmolin solamsang aten ahile, pengmol janga alhinge.

¹⁷Aman sahlam sang aten ahile, pengmol janga ahi.

¹⁸Aman lhanglam sang chu aten ahile, pengmol janga ahi.

¹⁹Ama lhumlam sanga agakihei kimvelin, pengmol kitena-a chun aten ahile, pengmol janga ahi.

²⁰Hitichun aman hichu aning li in aten ahi; hichun akimvela bang aneijin, munthengle milham umna mun kikah sekhena dingin, pengmol janga saole janga len aumin ahi.