Read Thado Chin Ezekiel 43 Bible Online

Ezekiel 43 - Thado Chin bible

Ezekiel 43

¹Chujouvin aman keima kotpi phunga solamsang ngat kotpi phung gei chun eipuijin,

² Chuin veuvin, Israel Pathen loupina chu solamsang lampia konin ahung kilah-in, a-awgin chu twi tamtah gin abangin, aloupina chun leiset asalvah-in ahi.

³Chule hichu keiman kanamu gao thilmu tobangle, hiche khopi sumang dinga kahunglaija kanamu gao thilmu dungjui ngeijin akilangin ahi. Chule gaothil muho chu Chebar vadunglen panga kanamu toh akibangin; chuin tolla kamai kasulut tai.

⁴Chuin Pakai loupina chu solam sanga kotpi-a konin inpi sunga ahung luttai.

⁵Hitichun lhagaovin keima eiphong dingin, chule inhong sung lama chun eipui lutnin; chule vetan, insung chu Pakai loupina adimtan ahi.

⁶Chuin keiman insunga kon chun kahenga thu kisei kajan, chule mipa chu kakoma anadingin ahi.

⁷Chuin aman kahenga, Mihem chapa, kalaltouna munle kakengto ngapna mun, a-itih-a Israel chate lah-a kachenna ding mun, chule Israel insung mite, amaho ahiuvin, alengtehou ahin, ajonthanhoi naova, ahilouleh amunsang houva alengtehou longin jong kamintheng asuhboh kitlou dingu ahitai.

⁸Akotbulu kakotbul ho koma aboluva, akhomu kakhomho koma atunuva, chule keimale amaho kah-a bang akigen tanin, amahon thet umtah abolu chun kamintheng asubohtauve; hijeh-a chu kalung hanna-a amaho kasuhmang ahitai.

⁹Tun ajonthanhoi naole, alengtehou thilongho chu keija konin gamla tah-a koidoh taohen, chutengle a-itih-a akomuva kachen jing ding ahi.

¹⁰Mihem chapa, nangman akhanset naova ajachat theina dingun, in chu Israel insung vetsah-in, chule a-inlim chu amaho tesah-in.

¹¹Amahon athilbol jouseu chu ajachat piuva ahile, amaho chu in limle agong, chule apotdohna hole achelutnaho, chule alimpoh jousele amandan jouse, chule alimpoh jousele adanthu jouse vetsah-in; alimpoh pumpileh adanthu jouse anitnuva abolna dingun amitmuva hichu sunin.

¹²Hichehi in'a dinga dan ahin; molchung vum kimvel pumpi hop chu atheng chungnung hiding ahi. Veuvin hichehi in'a dinga dan chu ahi.

¹³ Hichehohi thil tena tong ho dungjuija maicham tena ahi; tong khat chu tong khatle khutpeh khat, atodop ngei jong chu tong khat hiding, aveilam tong khat, agei pumpi mong kimvel chu khap khat hiding, chule hichehi maicham sangjo mun chu hiding ahi.

¹⁴Atodop tol chunga akitunna noinunga pat tong ni hiding, availam tong khat hiding, atodop neopa-a pat atodop lenpa gei chu tong li hiding, chule asalam pang tong khat hiding ahi.

¹⁵Hiti achu maicham chu tong li hiding, maichama pat chunglam chu aki li umding ahi.

¹⁶Chule maicham chu tong somleni sao, somleni len, aning li kibang hiding ahi.

¹⁷Chule atodop chu tong somle tongli hiding, aninglia aletdan chu tong somle tongli hiding; akimvel geisihho chu tong kehkhat hiding, chule atodop kimvel chu tong khat hiding; chule akalbiho chun solam angat dingu ahi.

¹⁸Chuin aman kajah-a, mihem chapa, Pakai Pathen'in hitihin aseije; amahon govam thilpehho achunga chu aboluva, thisan athin khumni tengule, hichehohi maicham boldan thupeh hiding ahi.

¹⁹Nahenga kalhacha kinbol dinga eihin naija Zadok chilhah, Levi thempuho henga, chonset thilto dinga bongchal gol khat nangman napeh ding ahi, tin Pakai Pathen'in aseije.

²⁰Chule nangman hiche thisan chu nalah-a, hiche aki liho chungle atodop ning liho chunga, chule ageisih kimvela nakoi ding; hiti achu maicham chu nasuh thenga nathenso ding ahi.

²¹Nangman chonset thilpeh bongchal jong chu nalah ding, aman hichu muntheng polam, lhendoh sa-a kikoi in'a chu agovam ding ahi.

²²Chule nini chan nileh nangman kelcha nou nolnabei khat, chonset thilto dinga nato ding; amahon maicham chu bongchala asuhtheng banguva, asuhtheng dingu ahi.

²³Nangman hiche suhthengna chu nachai tengle, nolnabei bongchalgol khatle, ahonlah-a nolnabei kelngoichal khat natodoh ding ahi.

²⁴Nangman hiho chu Pakai masanga natodoh-a, thempuhon achunguva chi atheova, Pakai henga govam thilto atodoh dingu ahi.

²⁵Ni sagi sunga chonset thilto ding niseh-a kelcha khat nagon ding; amahon jong bongchalgol khatle ahon lah-a nolnabei kelngoichal khat akigon dingu ahi.

²⁶Amahon maicham chu ni sagi asopthenguva asuhtheng diu; chule amaho jong kithenso dingu ahi.

²⁷ Chule hiche nikhoho kichai tengle, hiti ding ahi, niget channi chule aban banna thempuhon maicham chunga chu govam thiltoho le chamna thiltoho atodiu, chuteng keiman kasanpeh ding nahiuve, tin Pakai Pathen'in aseije.