Read Thado Chin Ezekiel 44 Bible Online

Ezekiel 44 - Thado Chin bible

Ezekiel 44

¹Chuin solam ngatna muntheng ponung kotpi lama chun eilepui kitnin; hichu anakikhah-in ahi.

²Chuin Pakai chun kajah-a, hiche kotpihi kikhah ding kihong louhel ding, koimacha hichea lutlouhel ding ahi; ajehchu Israel Pakai Pathen chu hiche-a hi hung lutna ahin, hijeh-a chu hichehi kikhah jing ding ahitai.

³Hichehi leng chapa ding ahin, leng chapa chu Pakai anga an nedinga asunga tou ding; chuche kotpi hongcha lampia chu ama lutding, chule chuche lampi mama-a chu potdoh ding ahi, tin Pakai Pathen'in aseije.

⁴Chuin aman keima sahlam kot lampi inmaija chun eipuijin; chuin kavetle, veuvin, Pakai in chu Pathen loupinan adimsetnin, chuin kamai tolla kasulutai.

⁵Chuin Pakaiyin kajah-a, mihem chapa, melchih phan lang, namitnin ven, Pakai insunga kimanchah ding dan jouse chungchang nahenga kasei jousele, dan jouse chu nanan ngaiphan; chule in'a lut jousele munthenga pot jouse chu phaten melchih in.

⁶Chule nangman thungailou ho, Israel mite ngei henga naseipeh ding ahi; vo Israel insung mite, thet um nabol jouseu chu ngataovin, tin Pakai Pathen'in aseije.

⁷Nanghon kamun theng sunga gamdang mi, atahsao le alungsunga cheptan louho, kamunthenga nahinpuilut tengule ka in jengjong nasuboh-un, nanghon ka changlhah, thao, chule thisan nato tengule amahon kakitepna asukeh un ahi.

⁸Nanghon kathil theng thupeh ho nachingtup pouvin; ahinla nanghon nangho khelin kathupeh nitding midang kamuntheng sunga nakoijo taove.

⁹Pakai Pathen'in, gamdang mi, lungsunga cheptanlou ahilouleh tahsa-a cheptanlou, Israel chate lah-a gamdang mi cheptanlou khatcha kamun theng lutlou dingu ahi, tin aseije.

¹⁰Chule Israel avaveija, keija kona amilim semthu nung ajuijuva avamang laijuva, keija kona gamla tah-a anavahmang Levi ho chun, akhangit lounao akipoh teidiu ahi.

¹¹Hijeng jongle amahon kamun theng sunga kin aboluva, inpi kotpiho ngah-a pang diu, inpia chu kin aboldiu; mipi ho dinga govam thilto ganlhainaho chu athaova, akinu bol dinga amasanguva dingdiu ahi.

¹²Ajehchu amaho amilimhou masanga amaho dinga lhachana atoh uva, Israel insung khansetna achuhsah jeh uva; hijeh-a chu amaho douna-a kakhut kalhah ahin, akhangit lounao chu akipoh dingu ahi, tin Pakai Pathen'in aseije.

¹³Amaho kahenga thempu natoh tong dinga, kahenga hungnailut lou dingu, ahilouleh muntheng chungnung sunga kathil thengho khatcha anailut thei loudiu; amavang ajumnau leh thet umtah abolu chu akipohjoh dingu ahi.

¹⁴Ahinla in'a bolding jousele asunga tohding jouse vetup dinga amaho chu kapansah ding ahi.

¹⁵Ahinla Israel chate keija kona avavei laijuva, kamun theng vetupma anapang thempuho, Levi ho, Zadok chapate amaho chu kahenga kakinbol dinga hungnaijuva, thaole thisan tohdoh dinga kamasanga ding diu ahi, tin Pakai Pathen'in aseije.

¹⁶Amaho kakinbol dinga kamunthenga lutnuva, kakin bol dinga kadokhang phung anailut diu, kathupeh achintup diu ahi.

¹⁷ Chule hung hiti ding ahi, amaho inhong sungnung kotpi ho-a alut tengule, tupat ponnem ho-a kivon diu; inhong sungnungle asung lama kin abol sunguva achunguva samul himhim kailou ding ahi.

¹⁸Alu uva tupat delnem akikopmuva, ataijuva tupat ponchol akichen diu; ulsa sona thei imacha akigah loudiu ahi.

¹⁹ Chule inhong ponung, japi inhon ponunga ahungdoh tengule, akin bolnao vonho chu asutlhah uva dantheng sunga akoidiu, vondang akivon diu; mipi ho chu avonuva asuhtheng loudiu ahi.

²⁰ Amahon asamu akivotol loudiu, ajangtelu jong ahoisao loudiu, alu-u akisemtup jing diu ahi.

²¹ Inhong sungnunga alut tengu jongle, thempu koimachan lengpitwi adon loudiu ahi.

²² Amahon meithai ahilouleh akidasa ji-a anei loudiu; Israel insung chilhah nungah, ahilouleh thempun ji-a ananeisa meithai akichenpi dingu ahi.

²³ Chule amahon kamite chu athengle akisuboh akibah louna chu ahildiu, chule athengle athenglou akibah louna ahetkhen sahdiu ahi.

²⁴Chule kinelna aumteng, thutan na-a dinguva, kathutan dungjuija thu atan dingu; chule keima mina kikhop khomna jouse-a kadan thupeh le kadan kisunho anitdiu, kacholngah ni ajabol dingu ahi.

²⁵ Kisuhbohna dinga thilong phunga hung lou dingu; ahinla apa, ahiloule anu, ahiloule chapa, ahiloule chanu, ahiloule sopipa, ahiloule jinei loulai asopinu dinga vang kisuboh theiju ahi.

²⁶Ama akisuhtheng jouteng, ama dinga nisagi asimdohpeh diu ahi.

²⁷Chule inhong sungnung, muntheng sunga kinbol dinga alut nikho tengle ama dinga chonset thilto ato ding ahi, tin Pakai Pathen'in aseije.

²⁸ Chule amaho agoulo dingdolu chu hiti ding ahi: Keimahi agoulou kahi; Israel insunga amaho gou napeh lou dingu ahi; Keimahi agouvu kahi.

²⁹ Amahon neh thilto, chonset thilto, suhkhelna thilto aneh diu ahin; Israel sunga Pathen'a dinga kitohho jouse chu amaho-a hiding ahi.

³⁰Thil jouse aga masapen lah-a gamasapen le thilto jouse lah-a nathiltou takip chu thempu ho-a ding ahi: aman na insunguva phatthei na aumdensah theina dinga, thempu chu nachanglhah lum masapenu jong napeh dingu ahi.

³¹ Thempuhon sa hihen lang vacha hijongle, akihehtel le achama thikam anehlou dingu ahi.