Read Thado Chin Ezekiel 45 Bible Online

Ezekiel 45 - Thado Chin bible

Ezekiel 45

¹Chukalvalin nanghon vang vetna-a gamlo ding nakihop tengule, Pakai henga gambih theng khat natodoh dingu ahi. Adunglam chu pengmol sangsomni le sangnga hiding, availam chu sangsom hiding; hichehi gamsung kimvel jouse-a atheng hiding ahi.

²Hichehi muntheng dinga adunglam janga, availam janga kimvel hiding, chule akimvela gam ong tong somnga umding ahi.

³Chule hiche tena-a hi adunglam sangsomni le sangnga, chule availam sangsom natedoh-a, hiche sunga chu munthengle muntheng chungnung umding ahi.

⁴Gambih theng chu muntheng kinbol, Pakai kinbol dinga hungnai thempuho chanding hiding; hichu a-inhou sahna ding mun hiding, chule munthenga dinga atheng hiding ahi.

⁵Chule adunglam sangsomni le sangnga, vailam sangsom jong chu in'a kinbola Levi mite chang diu, indan somni dinga alodiu ahi.

⁶Gambih theng kipedoh chu khopi dinga adunglam sangsomni le sangnga, availam sangnga hiding, hichu Israel insung pumpi-a ding ahi.

⁷Leng chapa chanding chu gamtheng kitohdoh-a kona hilamle khulam panga umding ahin, chule khopi chanding chu, gamtheng kipedoh masanga aumin, chule khopi sungle lhum lama kon chu lhum lama, solama kon solama kijompeh ding; chule adunglam chu lhum lama pat solam gamgi ngahna, gambehho lah-a khattoh kigalsai chan gei chu ahi.

⁸Hichu Israel gamsunga ama chanding ahi; kapipui hon kamite asuhgimbe tahlou diu, chule gam amoh chu aphungu dungjuija Israel insung apeh dingu ahi.

⁹Hitihin Pakai Pathen'in aseije; vo Israel Leng chapaho, phaset tahen; hunamle thilchom haijun lang, thudihle thutanna pandoh-un, kamiteho-a konin hunam haijun tin Pakai Pathen'in aseije.

¹⁰ Nanghon khaikot dihho, ephah dihtah, bath dihtah naman diu ahi.

¹¹Ephah le bath chu tena kibang hiding, bath chun homer hop soma hop khat adolding, chule ephah chun homer hop soma hop khat adolding, thil tena chu homer dungjuija teding ahi.

¹²Shekel chu gerah somni hiding, shekel somni, shekel somni le nga, shekel somlenga chu nangho dinga mina khat hiding ahi.

¹³Hichehi Pathen'a thilto napehdiu chu ahi, suhlou chang homer khat le ephah hop gupma hop khat, sakol chang homer khat le ephah hop gupma hop khat napeh diu ahi.

¹⁴Thaotwi chungchang dan thupeh chu ahile, thaotwi bath khat chu cor a kona bath hop soma hop khat ahin; cor khat chu homer ahiloule bath som ahi. Ajehchu bath som chu homer khat ahi.

¹⁵Anneh thilto dingle govam thilto ding, chamna thilto dingle miho kichamna semna dinga Israel hamhing phatna ho-a kon, kelngoihon lah-a kon khat, jani lah-a kona kelngoinou khat napeh diu ahi, tin Pakai Pathen'in aseijin ahi.

¹⁶Gamsunga mi jousen Israel sunga leng chapa-a dinga hiche thilpeh hi apehcheh diu ahi.

¹⁷Chule hichehi leng chapa kin ding chu; lhathah nikho-a, cholngah nikho-a, Israel insunga lhentum kut jouse-a govam thilpeh, anneh thilpeh, don thilpeh, govam thilpeh, chule chamna thilpeh, Israelte insung dinga chamna thilpeh agon ding ahi.

¹⁸Pakai Pathen'in hitin aseije, lhamasa alhasunga nimasa nileh, bongchal gol nolnabei khatna muntheng chu nasuhtheng diu ahi.

¹⁹Chule thempu chun chonset thilto thisan chu alah-a, inkhom chunga, maicham kitunna ningli chunga, chule inhong sungnung kotpi khom chungchu anu ding ahi.

²⁰Chule chuche lha nisagi ni chule suhkhel neitapou dingle milham dinga nabol ding; chutiachu insung nasuhcham diu ahi.

²¹ Lha masapen-a chuche lha nisomle nili tengchule, nanghon kalchuh kut naman uva, nisagi golvah naboldiu, cholsolou changlhah naneh dingu ahi.

²²Hicheni chule lengchapan ama dingle gamsunga mipi jouse dinga chonset thilto dinga bongchal khat agon ding ahi.

²³Chule nisagi kut sunga chu Pakai henga govam thilto dinga aman nolnabei cheh bongchal sagile kelngoichal sagi niseh-a anisagi-a dinga chu agon ding, chule chonset thilto dinga kelchaho lah-a anou khat atoding ahi.

²⁴Chule aman anneh thilto dinga, bongchal khat dinga ephah khat, kelngoichal khat dinga ephah khat, ephah khat dinga thaotwi hin dimkhat agon ding ahi.

²⁵ Lha sagi lhinna, alha sunga nisomle ninga nikho teng, nisagi kut kiman bang banga chu abolding, chonset thilto, govam thilto le, anneh thilpeh, chule thaotwi agon ding ahi.