Read Thado Chin Ezekiel 46 Bible Online

Ezekiel 46 - Thado Chin bible

Ezekiel 46

¹Pakai Pathen'in hitin aseije, solam ngat inhong sungnung kotpi chu nigup sunga kikhah jing ding, cholngah nikho le vang kihong ding, chule lhathah nikho nile jong kihong ding ahi.

²Leng chapa chu apolama hongcha kotpi-a chu hunglutna, kotpi khom phunga chu ding dena, ama govam thilto le chamna thilto ding chu thempu chun agonpeh ding; ama kotpi bula chu chibai aboh-a, chuteng potdoh ding, nilhah kahse-a kotpi chu kikhah lou ding ahi.

³Hiche banga chu gamsung miten hiche kotpi phunga hi choldo nile lhathah nikho ni-a Pakai anga chibai abohdiu ahi.

⁴Chule choldoni-a Pakai anga lengchapan atoding govam thilto chu, nolnabei kelngoinou gup le kelngoichal nolnabei khat hiding ahi.

⁵Chule kelngoichal khat dinga anneh thilpehho chu ephah khat hintin, kelngoinou ho ding chu apehjou kham cheh, chule ephah khatna dinga thaotwi hin khat hiding ahi.

⁶Chule lhathah nikho nileh nolnabei bongchalgol khat, chule kelngoinou gup, kelngoichal khat hiding, nolnabei cheh hiding ahi.

⁷Aman anneh thilpeh apehding, bongchal khat dinga ephah khat, kelngoichal khat dinga ephah khat, kelngoinou ho ding vang atamto theichan hiding, chule ephah khat dinga thaotwi hin khat hiding ahi.

⁸Leng chapa alut dingteng, hongcha kotpi lama chu lutna, hiche lampia chu potkit ding ahi.

⁹Ahin Kutpi nikho-a gamsung mite Pakai anga ahung tengule, sahlam kotpi-a lutna chu lhanglam kotpi-a pot ding; lhanglam kotpi-a lutna chu sahlam kotpi-a pot ding, ahunglutna kotpi lama kilelouva, amalama chepaipai joding ahi.

¹⁰Alah uva leng chapa chu, amaho alut tengule lutna; amaho achedoh tengule chedoh ding ahi.

¹¹Chule kut sungle anipi niho-a anneh thilpeh chu bongchal khatna ephah khat, kelngoichal khatna ephah khat, chule kelngoinou ho dinga apehjou khambep, chule ephah khatna thaotwi hin khat hiding ahi.

¹²Tun leng chapan ama chama govam thilpeh abola, ahiloule Pakai dinga ama chama thilpeh agon tengle, solam nga-a kotpi chu mikhatnin ahonpeh ding, cholngah nikho-a abol banga, aman agovam thilto le achamna thilpeh akigon ding; chuteng ama potdoh ding, ama potdoh joule kotpi khatnin akhading ahi.

¹³Nangman nolnabei kum khat lhingbep kelngoinou khat niseh-a Pakai dinga govam thilpeh nagon ding ahi. Hichu jingkah seh-a nagon ding ahi.

¹⁴Hiche dinga hi jingkah seh-a anneh thilpeh nagon ding, ephah hop gupma hop khat le thaotwi hin khat hop thuma hopkhat chu changbongnel toh namehtha ding; Pakaiya dinga kumkho-a houdan anneh thilpeh jomjing chu hiding ahi.

¹⁵Hiti achu amahon kelngoinou le anneh thilpeh, chule thaotwi chu jingseh-a tanglouva govam thilto dinga agon jing dingu ahi.

¹⁶Pakai Pathen'in hitin aseije; lengchapan achapate khattou thilpeh apehle, chuche goulo chu achapatea hiding ahi; hichu agoulou thilkeo hiding ahitai.

¹⁷ Aman agouloa kona asohte khattou thilpeh apeh ahilevang, achamlhat kum geija ama-a hintin; chuchejou tengle lengpa chapa kilepeh kitding ahi. Ahinla agoulo chu achapate bou changding ahi.

¹⁸Chukalvalin leng chapa chun mipi ho chu aneijuva kona nodoh nadinga, hunama agoulo-u chu alahpeh louding; amavang aman achapate chu aneija kona alahdoh-a agoulo dingu apeh dingjoh ahi. Chutile kamite jouse aneijuva kona kithecheh loudiu ahi.

¹⁹Chujouvin aman kotpi panga um, lutna-a chun, sahlam sang nga-a thempuho indan theng sunga chun eipuilutin; chuin veuvin, lhumlam sihtenia chun mun khat kamun ahi.

²⁰Chuin aman kajah-a, hichehi thempuhon suhkhel thilto le chonset thiltoho ahon nadiu mun chu ahin, hia chu amahon anneh thilto chu akandiu; chutiachu amahon inhongsung ponunga, mipi ho thensona dinga ahinpoh doh loudiu ahi.

²¹Chujouvin aman inhong ponung sunga chun eipuidoh-in, inhongsung ning li-a chun eipuilen; chuin veuvin, inhongsung ning tina chun inhongsung khat cheh aumin ahi.

²²Inhongsung ning li-a chun tong somli sao, tong somthum len, inhongsung kijopmat aumin, hiche ning li hohi tena kibang ahi.

²³Asungu kimvel, amaho li kimvela chun agola kisa in aumin, atogola chun mei tina thuhho akisemin ahi.

²⁴Chuin aman kajah-a, hichehohi anhonho dinga munho ahin, hia chu houin'a lhachahon mipite kilhainaho chu ahondiu ahi, ati.