Read Thado Chin Ezekiel 47 Bible Online

Ezekiel 47 - Thado Chin bible

Ezekiel 47

¹Chujouchun aman inkot phung lama eipui kitnin; chuin, veuvin, solam ngat kotbul noija konchun twiho ahung longdoh-in ahi. Ajehchu inmai chun solam angat ahin, twiho chu maicham lhanglam sang, in jetlam sanga noija kon hung longlha ahi.

²Chuphatnin aman sahlam kotpi-a chun eipuidoh-in, polang lampia, kotpi ponung, pamlam solam ngat lampia chun eipuijin, chule veuvin, jetlam sanga chun twiho ahung longdoh-in ahi.

³Chuin akhutna khao choipa chu solam nga-a achedoh phatnin, tong sangkhat atedoh-in, twilah-a chun eipuijin ahile, twi chun kakeng khochong aphan ahi.

⁴Chuin tong sangkhat atedoh kitnin, twilah-a chun eipuijin ahile, twi chun kakhup aphan ahi. Chuin aman tong sangkhat atedoh kitnin, twilah-a chun eipuidoh kitnin ahile, twi chun kakong aphan ahi.

⁵Chujouchun tong sangkhat atedoh kitnin ahile; kapal galkai joulou vadung anahitai. Ijeh inem itile twi chu akhangin, ajapma japtho ding ahitan, palgalkai joulou ding vadung ahitai.

⁶Chuin aman kajah-a, mihem chapa, hichehi namu-em? eiti. Chuin aman eipuijin, vadung panga chun eikinung lesah tai.

⁷Tun keima kakinungle phatnin, veuvin, vadung apang teni-a chun alangto-in thingphung tampitah akeh-in ahi.

⁸Chuin aman kajah-a, hiche twihohi solam gama longlha-a, nelgam lama longsuh-a, twipia longlut ahin; twi hin twipi aphah phahle, twi chu damding ahi.

⁹Chule hung hiti ding ahi, vadung lonna lamjousea, ahing theija chatloh thei jouse chu hing dingu ahi. Ajehchu twiho chu khulama ahunglon jeh-a, nga atama tam umding ahi; ijeh inem itile amaho kisudam dingu, chule vadung lon nalam jouse-a chu imajouse hingding ahi.

¹⁰Chule hung hiti ding ahi, Engedi apat Eneglaim chan geija ngamanho chu kipatdoh dingu, hiche munho chu len sena mun hung hiding; angahou chu amaho jat dungjuija twipi lenho-a nga banga hatama hung tamdiu ahi.

¹¹Ahinla chua bonnganle bonlhoh munchu damlou ding ahi, amaho chi henga kipedoh ding ahiuve.

¹²Chule chua vadung pang, hilam pangle khulam panga chu, nehdinga thingphung jouse kehding, anaho pullou ding, agao jong beithei louding; atwi chu munthenga kona hunglong doh ahijeh-a, lhathah dungjuija gathah ahin sepdoh ding; atheiga chu anneh hija, athingna chu damna hiding ahi.

¹³Pakai Pathen'in hitin aseije; Israel phung somle phung ni dungjuija agam lo dingu gamtum chu hichehi hiding ahi: Joseph chu chan ni chang ding ahi.

¹⁴Nanghon hichu, khat cheh-in kibang cheh-a nalodiu; hiche thudol chu napu napateu pehdinga kakhut kanadopsa ahitan, hiche gamhi nangho goulo dinga hungum ding ahi.

¹⁵Hichehi sahlam sanga gamgi chu hiding ahi: twipilen'a pat Hethlon lampia, Zedad'a mi chena gei,

¹⁶Hamath, Berothah, Sibraim, hichu Damascus le Hamath kikah-a gamgi ahin, Hazarhatticon, hichu Hauran gamkol kom ahi.

¹⁷Chule twipia patna gamgi chu Hazarenan gei Damascus gamsung hintin, chunglam sahlam sanga um chule Hamath gamsung gei hiding ahi. Hichehi sahlam sang gamgi ahi.

¹⁸Chule solamsang chu nanghon Hauran'a pat Damascus apat, Gilead'a pat chule Jordan solam twipi gamgia pat le Israel gamgia pat nate diu ahi. Chule hichehi Solamsang ahi.

¹⁹Chule lhanglam sanga lhanglam chu, Tamar apat Kadesh a twiho, twipilen vadung gei ngei chu hiding ahi. Chule hichehi lhanglam sanga lhanglam ngat chu ahi.

²⁰Lhumlam sang chu gamgia pat twipilen, Hamath a mi hung galkai theina gei chu hiding ahi. Hichehi lhumlam sang ahi.

²¹Hiti-a hi Israel phungho dungjuija gam chu nakihop diu ahi.

²²Chule hung hiti ding ahi, hiti achu vang vetna nangho goulo dingle nalah uva hung pemlut gamdang mi, nalah uva chate hinhing dingho chu nakihop diu ahi. Chule amaho Israel chate lah-a gamsunga pengden nalah uva um tobang hidiu ahin, amahon Israel phung lah-a nang hotoh gou alokhom dingu ahi.

²³Chule hung hiti ding ahi, gamdang mi ipi phung sunga hung pemlut hijongle, nanghon ama chu chua agoulo ding napeh diu ahi, tin Pakai Pathen chun aseije.