Read Thado Chin Ezekiel 5 Bible Online

Ezekiel 5 - Thado Chin bible

Ezekiel 5

¹Chule nangma, mihem chapa, chemcha hemthet khat kilah-in, samvoupa samchem kilah-in, chule hichun naluchang le nakhamul vouvin; chuteng atenadin khaikot lanlang, sam chu homkhenin.

²Khopi akiumna nikhoho chu alhin tengle, hop thuma hopkhat chu khopi lailung tah-a meija nahal ding; chule hopthum-a hopkhat nalah-a, hichu chemcha khatna nasat bong ding; chule hopthum-a hopkhat chu hui lah-a nathejal ding; chule anungu chemjam'a kajui ding ahi.

³Nangman hicheho lah-a kona chu phabep khat nalah-a, chule hicheho chu naponsil monga nakhi ding ahi.

⁴Chuteng nangman hicheho chu nalahkit ding, chule hicheho chu meikong lailung tah-a naselutna, chule hicheho chu meisunga nahalvam ding ahi, ajehchu hichea kona chu meikou khat hungdoh-a, Israel insung pumpi sunga lutding ahi.

⁵Pakai Pathen'in hitin aseije, Hichehi Jerusalem ahi; Keiman amanu hi akimvela um namho le gamho lailung tah-a katundoh ahi.

⁶Chule amanun namdangho sangin kathutana hi gitlounan asodoh-in, chule akimvela um gamho sangin kadan kisunho chu gitlounan aha sodoh-in ahi. Ajehchu amahon kathutana hole kadan kisunho alapouvin, hicheho chu ajuipouvin ahi.

⁷Hijeh chun Pakai Pathen'in hitin aseije, nangho nakimvel uva um namtin ho sanga napunjoh jeh-ule, kadan kisunho jong najui tahlou jeh-un; chule kathutanho jong nanit tahlou jeh-ule, nakimvel uva um namtin ho thutan ho dungjuija jong na natoh tahlou jeh-un;

⁸Hijeh chun Pakai Pathen'in hitin aseije, Ven, keima, keimatah ngeijong nangho douva pang kahitan, chule namtinho mitmu chang tah-a nalah uva thutanna kalhut ding ahi.

⁹Chule keiman kanabol khahlou, chule atobang jong avela kabolkit louding chu, thet umtah nathilbol hou jeh-a nachung uva kabolding ahi.

¹⁰ Hijeh-a chu nalah uva paten chapate ahin neh uva, chule chapaten apateu ahin neh dingu; chule keiman nachunga thutanna kalhunsah ding, chule nalah uva ahingdoh amoh chengse chu abonchauva hui lah-a kathecheh ding ahi.

¹¹Hijeh chun, Pakai Pathen'in, keima hing jingjeng kahito lhonin, nangman kamun theng chu ningset umtahle, thilbohho jouse-a nasuhboh tah jeh-a, thonlouva keiman jong nangma ka kemsuh sah ding; kamitnin jong khen aneideh lou ding, khotona kiti imacha jong kaneilou ding ahitai.

¹²Nangma-a hopthum-a hopkhat chu hise-a thidingu, chule nalah tah-a amaho chu kella suhmanga umdiu; chule hopthum-a hopkhat chu nakimvela chemjam'a lou dingu; chule hopthum-a hopkhat chu keiman huija kathecheh ding, chule chemjam'a kanungdel ding ahi.

¹³Chutia chu kalunghana chu kasuh bulhitna, kalungsatna achunguva chuding, chuteng kalungmon ding ahi, chutia chu kalungsatna achunguva kabulhit teng, Pakai kitipa keiman katom panna-a hichehi kasei ahi ahetdoh dingu ahi.

¹⁴Chukalvala keiman nakimvela um namho lah le achele jouse mitmu-a, khopi chimsa le noise umtah-a kasemdoh ding nahi.

¹⁵Keiman lunghanna le lungsat na-a, chule lungsa tah-a phona-a nachunga thutanna kahinnei tengle, nakimvela um namtin ho dinga noise umtah le isahlou, kihilna le datmo um nahiding ahi. Keima Pakaiyin kaseidoh ahitai.

¹⁶Keiman amaho dinga manthah na, chule nangma sumang dinga kel lhahna thalchang giloutah kahinsol tengle; keiman nachung uva kel lhahna kapunsah ding, nachang lhah-u hungkondohna chu kasuhtan ding ahi.

¹⁷ Chutia chu keiman kel le gamsa gilou nachung uva kahinlan sah ding, hicheho chun nachateo ahinsuhmang ding; chule hisele thisanin nangma nahinphah ding; chule keiman chemjam chu nachunga kahinchuhsah ding ahi. Keima Pakai Pathen'in kaseidoh ahitai.